India-US: ఎగుమతులను కాపాడుకునేందుకు..US దిగుమతులపై సుంకం తగ్గింపు
ఈ వార్తాకథనం ఏంటి
భారత ప్రభుత్వం అధిక సుంకాలను విధిస్తోందని,అందువల్ల ఏప్రిల్ 2 నుండి ప్రతీకార టారిఫ్ అమలులోకి వచ్చే అవకాశం ఉందని అమెరికా అధ్యక్షుడు డొనాల్డ్ ట్రంప్ హెచ్చరించారు.
ఈ పరిణామాల నేపథ్యంలో,భారత్-అమెరికా మధ్య వాణిజ్య ఒప్పందంపై చర్చలు ప్రారంభమయ్యాయి.
అయితే, ప్రతీకార సుంకాల ప్రభావాన్ని తగ్గించేందుకు భారత ప్రభుత్వం కీలక చర్యలు తీసుకోవచ్చని సమాచారం.
వాణిజ్య ఒప్పందం మొదటి దశలో,23 బిలియన్ డాలర్ల (సుమారు రూ. 1.97 లక్షల కోట్లు) విలువైన అమెరికా దిగుమతులపై సుంకాలను తగ్గించేందుకు భారత్ సిద్ధంగా ఉన్నట్లు తెలుస్తోంది.
ఈ నిర్ణయం అమలులోకి వస్తే, గత కొన్ని సంవత్సరాలలోనే ఇదే అతిపెద్ద సుంకాల తగ్గింపు కానుందని అధికార వర్గాలు చెబుతున్నాయి.
వివరాలు
కొన్ని వస్తువులపై సుంకాల తగ్గింపు
అమెరికా విధించనున్న ప్రతీకార సుంకాల ప్రభావాన్ని తగ్గించేందుకు భారత్ ఈ చర్యలు తీసుకుంటోంది.
ఆర్థికంగా దేశీయ స్టాక్ మార్కెట్లపై ప్రభావం పడకుండా, అలాగే ఇతర పాశ్చాత్య దేశాలతో వాణిజ్య సంబంధాలను సమతుల్యం చేసే విధంగా ఈ నిర్ణయం తీసుకున్నట్లు సమాచారం.
'రాయిటర్స్‌' నివేదిక ప్రకారం,భారత్ నుండి అమెరికాకు సంవత్సరానికి 66 బిలియన్ డాలర్ల (సుమారు రూ. 5.66 లక్షల కోట్లు) విలువైన ఎగుమతులు జరుగుతున్నాయి.
ప్రతీకార సుంకాలు అమలులోకి వస్తే,ఇందులో దాదాపు 87% భారతీయ ఎగుమతులు ప్రభావితమయ్యే అవకాశం ఉంది.
దీన్ని ఎదుర్కొనడానికి, భారత్ దిగుమతులు చేసుకునే అమెరికా ఉత్పత్తులలో సుమారు 55% మేర సుంకాలను తగ్గించేందుకు సిద్ధంగా ఉంది.
ప్రస్తుతం ఈ దిగుమతులపై 5% నుండి 30% మధ్య సుంకాలు విధిస్తున్నాయి.
వివరాలు
రంగాల వారీగా సుంకాల సర్దుబాటు
ముఖ్యంగా, అమెరికా నుంచి దిగుమతి అయ్యే రూ. 1.97 లక్షల కోట్ల విలువైన ఉత్పత్తులపై కొన్ని సుంకాలను పూర్తిగా తొలగించడం, మరికొన్నింటిని గణనీయంగా తగ్గించడం వంటి చర్యలను కేంద్రం పరిగణనలోకి తీసుకుంటోంది.
అయితే, దీనిపై భారత వాణిజ్య మంత్రిత్వ శాఖ, ప్రధాన మంత్రి కార్యాలయం ఇంకా అధికారిక ప్రకటన చేయలేదు.
ప్రపంచ వాణిజ్య సంస్థ (WTO) గణాంకాల ప్రకారం,అమెరికా భారతీయ ఉత్పత్తులపై సగటున 2.2% మేర సుంకం విధిస్తుండగా,భారత్ అమెరికా వస్తువులపై 12%సుంకం విధిస్తోంది.
ప్రస్తుత పరిస్థితులలో,భారత్-అమెరికా వాణిజ్య లోటు 45.6బిలియన్ డాలర్ల (సుమారు రూ. 3.91 లక్షల కోట్లు)గా ఉంది.
ఈ ఫిబ్రవరిలో ప్రధాని నరేంద్ర మోదీ అమెరికా పర్యటన సందర్భంగా,రెండు దేశాలు వాణిజ్య ఒప్పందంపై ముందస్తు చర్చలు జరిపేందుకు అంగీకరించాయి.
వివరాలు
భారత్‌లో పర్యటించనున్న అమెరికా వాణిజ్య ప్రతినిధి
ప్రతీకార సుంకాలను ప్రకటించకముందే, భారత్ ఒక సమగ్ర ఒప్పందాన్ని కుదుర్చుకోవాలని భావిస్తోంది.
ఈ పరిణామాల నేపథ్యంలో, మార్చి 25-29 తేదీల మధ్య అమెరికా వాణిజ్య ప్రతినిధి బ్రెండన్ లించ్ భారత్‌లో పర్యటించనున్నారు.
భారత్, అమెరికా మధ్య జరుగుతున్న చర్చలలో, దిగుమతుల్లో సుంకాలను తగ్గించడం ద్వారా వాణిజ్య సమస్యలకు పరిష్కారం కనుగొనాలని భారత ప్రభుత్వం భావిస్తోంది.
అయితే, కేవలం పన్నుల తగ్గింపు మాత్రమే తుది నిర్ణయం కాకుండా, రంగాల వారీగా సుంకాలను సమీక్షించి, అవసరమైన మార్పులు చేసేందుకు ప్రయత్నాలు జరుగుతున్నట్లు అధికార వర్గాలు వెల్లడించాయి.