Stock Market: స్టాక్ మార్కెట్లలో భారీ పతనం.. 2 గంటల్లో ఇన్వెస్టర్లకు రూ.7 లక్షల కోట్ల నష్టం
ఈ వార్తాకథనం ఏంటి
భారత స్టాక్ మార్కెట్లలో అమ్మకాల ఒత్తిడి తీవ్రంగా కొనసాగుతోంది. వరుసగా రెండో ట్రేడింగ్ సెషన్‌లోనూ దేశీయ సూచీలు భారీ నష్టాలను చవిచూస్తున్నాయి. అక్టోబర్ 7న దాదాపు మూడేళ్ల తర్వాత రిజర్వ్ బ్యాంక్ ఆఫ్ ఇండియా (RBI) కీలక రెపో రేటును పెంచడంతో మార్కెట్ సెంటిమెంట్ బలహీనపడింది. దీని ప్రభావంతో బుధవారం సెన్సెక్స్ 400 పాయింట్లకు పైగా,నిఫ్టీ 170 పాయింట్లకు పైగా నష్టపోయాయి. తాజాగా గురువారం కూడా ఇదే ఒత్తిడి కొనసాగుతోంది. అక్టోబర్ 8న ఉదయం 11.50 గంటల సమయంలో బీఎస్ఈ సెన్సెక్స్ 650పాయింట్ల మేర క్షీణించి 71,990స్థాయిలో ట్రేడవుతోంది. మరోవైపు ఎన్ఎస్ఈ నిఫ్టీ 250పాయింట్లు కోల్పోయి 22,350 వద్ద కదులుతోంది. ముఖ్యంగా హెవీవెయిట్ షేర్లలో భారీగా అమ్మకాలు జరగడంతో సూచీలు ఒత్తిడికి లోనవుతున్నాయి.
వివరాలు
ఇంట్రాడేలో 780 పాయింట్లకు పైగా పతనం
గురువారం ట్రేడింగ్‌లో ఒక దశలో సెన్సెక్స్ నష్టాలు మరింత తీవ్రంగా ఉన్నాయి.
సూచీ ఏకంగా 780 పాయింట్లకు పైగా పతనమై 71,853.90 వద్ద ఇంట్రాడే కనిష్ఠాన్ని నమోదు చేసింది.
అనంతరం కొంతమేర కోలుకున్నప్పటికీ మార్కెట్లలో అమ్మకాల ఒత్తిడి మాత్రం కొనసాగుతోంది.
మార్కెట్లు భారీగా క్షీణించడంతో ఇన్వెస్టర్ల సంపదగా పరిగణించే బీఎస్ఈలో లిస్టైన కంపెనీల మొత్తం మార్కెట్ విలువ కూడా భారీగా తగ్గింది.
గురువారం మార్కెట్ ప్రారంభమైన తర్వాత కేవలం రెండు గంటల్లోనే రూ.7 లక్షల కోట్లకు పైగా ఆవిరైంది.
బుధవారం ట్రేడింగ్ ముగిసే సమయానికి బీఎస్ఈ లిస్టెడ్ కంపెనీల మొత్తం మార్కెట్ విలువ దాదాపు రూ.471 లక్షల కోట్లుగా ఉండగా.. గురువారం అది రూ.464 లక్షల కోట్ల దిగువకు పడిపోయింది.
వివరాలు
స్టాక్ మార్కెట్ పతనానికి ప్రధాన కారణాలివే..
దేశీయ మార్కెట్ల పతనానికి పలు అంశాలు కారణంగా కనిపిస్తున్నాయి.
ఇందులో ఆర్బీఐ తీసుకున్న కఠిన నిర్ణయం కీలకంగా మారింది.
పెరుగుతున్న ద్రవ్యోల్బణాన్ని దృష్టిలో ఉంచుకుని అక్టోబర్ 7న ఆర్బీఐ రెపో రేటును 25 బేసిస్ పాయింట్లు పెంచింది.
దీంతో దాదాపు మూడేళ్ల తర్వాత తొలిసారి వడ్డీ రేట్ల పెంపు చోటుచేసుకుంది.
ఇప్పటివరకు కొనసాగిన న్యూట్రల్ పాలసీ వైఖరిని ఆర్బీఐ కాలిబ్రేటెడ్ టైటనింగ్‌గా మార్చడం మార్కెట్ వర్గాల్లో ఆందోళనకు కారణమైంది.
భవిష్యత్తులోనూ వడ్డీ రేట్ల పెంపునకు అవకాశం ఉండొచ్చన్న సంకేతాలు ఇన్వెస్టర్లలో అప్రమత్తతను పెంచాయి. దీంతో షేర్లలో అమ్మకాల ఒత్తిడి మరింత పెరిగింది.
వివరాలు
క్రూడాయిల్ ధరలు మళ్లీ పైకి..
పశ్చిమాసియాలో అమెరికా-ఇరాన్ మధ్య నెలకొన్న ఉద్రిక్త పరిస్థితులు కూడా మార్కెట్లపై ప్రభావం చూపుతున్నాయి.
ఈ పరిణామాలతో అంతర్జాతీయంగా క్రూడాయిల్ ధరలు మరోసారి పెరుగుతున్నాయి.
గురువారం బ్రెంట్ క్రూడ్ ధర 2 శాతానికి పైగా ఎగబాకి బ్యారెల్‌కు 103 డాలర్లకు చేరువైంది.
క్రూడాయిల్ ధరలు పెరగడం వల్ల దేశీయంగా ద్రవ్యోల్బణ ఒత్తిళ్లు మరింత పెరిగే అవకాశం ఉందన్న ఆందోళనలు వ్యక్తమవుతున్నాయి.
ఇది ఆర్థిక వ్యవస్థపై ప్రతికూల ప్రభావం చూపొచ్చన్న భయాలు మార్కెట్ సెంటిమెంట్‌ను దెబ్బతీస్తున్నాయి.
వివరాలు
విదేశీ ఇన్వెస్టర్ల పెట్టుబడుల ఉపసంహరణ
దేశీయ మార్కెట్లలో వరుసగా నష్టాలు నమోదవుతుండటంతో రిస్క్ తీసుకోవడానికి ఇష్టపడని విదేశీ పెట్టుబడిదారులు తమ పెట్టుబడులను వెనక్కి తీసుకుంటున్నారు.
షేర్ల నుంచి నిధులను ఉపసంహరించుకుని బాండ్లు, డాలర్ వంటి సురక్షిత ఆస్తుల వైపు మళ్లుతున్నట్లు మార్కెట్ వర్గాలు చెబుతున్నాయి.
అంతర్జాతీయ మార్కెట్ల నుంచి వస్తున్న ప్రతికూల సంకేతాలు, బాండ్లపై రాబడులు దశాబ్దాల గరిష్ఠ స్థాయులకు చేరడం, రూపాయిపై కొనసాగుతున్న ఒత్తిడి వంటి అంశాలు కూడా ఇన్వెస్టర్లలో ఆందోళన పెంచుతున్నాయి.
ఫలితంగా దేశీయ ఈక్విటీ మార్కెట్లలో అమ్మకాలు మరింత అధికమయ్యాయి.
వివరాలు
ఐటీ స్టాక్స్‌కు మాత్రం కొనుగోళ్ల మద్దతు
సెన్సెక్స్ 30 షేర్లను పరిశీలిస్తే.. ఐటీసీ, అదానీ పోర్ట్స్, ఇండిగో షేర్లు దాదాపు 4 శాతం వరకు నష్టపోయాయి.
ముఖ్యంగా గ్యాస్, ఆయిల్ రంగాలకు చెందిన స్టాక్స్‌లో భారీ అమ్మకాలు నమోదయ్యాయి.
రిలయన్స్, పవర్‌గ్రిడ్, బీఈఎల్ షేర్లు కూడా దాదాపు 3 శాతం వరకు పడిపోయాయి.
అయితే ఐటీ రంగ షేర్లు మాత్రం మార్కెట్‌కు భిన్నంగా రాణిస్తున్నాయి.
దేశంలోని అతిపెద్ద ఐటీ సంస్థ టాటా కన్సల్టెన్సీ సర్వీసెస్ (TCS) గురువారం తన ఫలితాలను ప్రకటించనున్న నేపథ్యంలో ఐటీ స్టాక్స్‌పై ఇన్వెస్టర్ల దృష్టి నెలకొంది.
వివరాలు
ఐటీ స్టాక్స్‌కు మాత్రం కొనుగోళ్ల మద్దతు
ఇంట్రాడే ట్రేడింగ్‌లో టీసీఎస్, కోఫోర్జ్, టెక్ మహీంద్రా, హెచ్‌సీఎల్ టెక్నాలజీస్, ఇన్ఫోసిస్ వంటి ప్రధాన ఐటీ షేర్లు 2 శాతానికి పైగా లాభపడ్డాయి.
ప్రస్తుతం కూడా ఈ షేర్లు దాదాపు ఒక శాతం వరకు లాభాల్లో కొనసాగుతున్నాయి.
మొత్తంగా చూస్తే.. ఆర్బీఐ వడ్డీ రేట్ల పెంపు, క్రూడాయిల్ ధరల పెరుగుదల, విదేశీ పెట్టుబడుల ఉపసంహరణ, రూపాయిపై ఒత్తిడి వంటి అంశాలు మార్కెట్లపై తీవ్ర ప్రభావం చూపుతున్నాయి.