IndiGo: సౌదీలో ఉద్రిక్త పరిస్థితులు.. అక్టోబర్ 17 వరకు ఇండిగో విమానాలు రద్దు
ఈ వార్తాకథనం ఏంటి
సౌదీ అరేబియాలో హౌతీ తిరుగుబాటుదారుల దాడులు కొనసాగుతున్న నేపథ్యంలో ఇండిగో విమానయాన సంస్థ కీలక నిర్ణయం తీసుకుంది. భారత్‌ నుంచి సౌదీ అరేబియాకు,అక్కడి నుంచి భారత్‌కు నడిచే విమాన సర్వీసులను తాత్కాలికంగా నిలిపివేస్తున్నట్లు ప్రకటించింది. ఈ నిర్ణయం వెంటనే అమల్లోకి వస్తుందని వెల్లడించింది. అక్టోబర్ 17 వరకు విమానాల రద్దు కొనసాగుతుందని తెలిపింది. ఈ నిర్ణయంతో సౌదీ రాజధాని రియాద్‌తో పాటు జెద్దా,దమ్మాం,మదీనా విమానాశ్రయాలకు భారత్‌ నుంచి వెళ్లే, అక్కడి నుంచి భారత్‌కు వచ్చే ఇండిగో సర్వీసులు నిలిచిపోయాయి. సౌదీలో నెలకొన్న ఉద్రిక్త పరిస్థితులను దృష్టిలో పెట్టుకుని ప్రయాణికుల భద్రత కోసం ఈ చర్య తీసుకున్నట్లు సంస్థ పేర్కొంది. ఈ మార్పుల గురించి ప్రయాణికులకు సమాచారం అందించింది.
వివరాలు
అందుబాటులో సపోర్ట్ టీమ్
విమాన సర్వీసులకు సంబంధించిన తాజా వివరాల కోసం ఇండిగో అధికారిక వెబ్‌సైట్‌ను సందర్శించాలని సూచించింది.
ప్రయాణికుల సందేహాలు, అభ్యంతరాలపై స్పందించేందుకు తమ సపోర్ట్ టీమ్ అందుబాటులో ఉంటుందని తెలిపింది.
ఇండిగోతో పాటు ఇతర విమానయాన సంస్థలు కూడా సౌదీ అరేబియాలోని కొన్ని ప్రాంతాలకు విమాన సర్వీసులను నిలిపివేశాయి.
సౌదీలో రెండో అతిపెద్ద అంతర్జాతీయ విమానాశ్రయంగా పేర్కొనే కింగ్ ఖలీద్ ఇంటర్నేషనల్ ఎయిర్‌పోర్టుతో పాటు ఇతర విమానాశ్రయాలపై హౌతీ తిరుగుబాటుదారులు బాలిస్టిక్ క్షిపణులు, డ్రోన్లతో దాడులు చేస్తున్నట్లు సమాచారం.
ఈ పరిణామాల కారణంగా పలు విమానాశ్రయాల నుంచి విమాన రాకపోకలకు అంతరాయం ఏర్పడింది. కొన్ని ప్రాంతాల్లో విమాన సేవలు నిలిచిపోయాయి.
వివరాలు
యెమెన్ ప్రభుత్వానికి అండగా సౌదీ అరేబియా
ఈ పరిణామాల వెనుక ప్రాంతీయ రాజకీయ ఉద్రిక్తతలు కూడా ఉన్నాయి.
యెమెన్‌లో ప్రభుత్వానికి వ్యతిరేకంగా పోరాడుతున్న హౌతీ తిరుగుబాటుదారులకు ఇరాన్ మద్దతు ఇస్తోంది.
మరోవైపు, యెమెన్ ప్రభుత్వానికి సౌదీ అరేబియా అండగా నిలుస్తోంది.
యెమెన్‌లో తిరుగుబాటు చేస్తున్న సాయుధ ఉద్యమమే హౌతీలుగా గుర్తింపు పొందింది.
సౌదీలో భద్రతాపరమైన పరిస్థితులు ఆందోళన కలిగిస్తున్న నేపథ్యంలో విమానయాన సంస్థలు ప్రయాణికుల భద్రతకు ప్రాధాన్యం ఇస్తూ సర్వీసులపై నిర్ణయాలు తీసుకుంటున్నాయి.