Infosys bonus:ఉద్యోగులకు ఇన్ఫోసిస్‌ గుడ్‌న్యూస్‌.. నవంబర్ శాలరీతో బాటు 85 శాతం పనితీరు ఆధారిత బోనస్‌ చెల్లింపులు
ఈ వార్తాకథనం ఏంటి
ఇన్ఫోసిస్‌ ఉద్యోగులకు శుభవార్త చెప్పింది. అర్హులైన ఉద్యోగులకు సగటున 85 శాతం మేర పనితీరు ఆధారిత బోనస్‌ ఇవ్వడానికి సంస్థ నిర్ణయం తీసుకుంది.
ప్రస్తుత ఆర్థిక సంవత్సరం రెండో త్రైమాసికంలో మెరుగైన ఫలితాలు సాధించిన సందర్భంగా, ఈ బోనస్‌ ప్రకటించారు.
నవంబర్ నెల వేతనంతో పాటు ఈ బోనస్‌ చెల్లించబడుతుందని సంస్థ స్పష్టం చేసింది.
బోనస్‌ మొత్తాన్ని ఉద్యోగుల వ్యక్తిగత పనితీరు మరియు సహకారం ఆధారంగా నిర్ణయించనున్నట్లు పేర్కొంది.
ఈ బోనస్‌ చెల్లింపుల గురించి ఇప్పటికే ఇన్ఫోసిస్‌ ఉద్యోగులకు మెయిల్స్‌ పంపించింది.
క్యూ2లో అధిక వృద్ధిని సాధించడంలో ఉద్యోగుల సహకారం కీలకమైనదని, భవిష్యత్తులో కూడా అదే నిబద్ధతను కొనసాగించాలని సంస్థ అభిలషించింది.
వివరాలు
ఈ బోనస్‌ లాభదాయకం
ముఖ్యంగా డెలివరీ, సేల్స్‌ యూనిట్లలో పనిచేసే మిడ్‌ మరియు జూనియర్‌ స్థాయి ఉద్యోగులకు ఈ బోనస్‌ లాభదాయకమని ఎకనామిక్‌ టైమ్స్‌ నివేదికలో పేర్కొనబడింది.
సెప్టెంబర్‌ నెలతో ముగిసిన త్రైమాసికంలో ఇన్ఫోసిస్‌ రూ.6,506 కోట్ల నికర లాభాన్ని ప్రకటించింది.
సంస్థ ఆదాయం 5.1 శాతం వృద్ధితో రూ.40,986 కోట్లకు చేరుకుంది. ప్రస్తుత ఆర్థిక సంవత్సరంలో 3.75% నుండి 4.5% వరకు వృద్ధి అంచనాలను వెల్లడించింది.
ఈ పరిస్థితుల్లో బోనస్‌ ప్రకటించడం విశేషమైంది. ఇన్ఫోసిస్‌ సంస్థలో ఫ్రెషర్లు, టెక్నికల్‌ లీడర్లు E0-E2 కేటగిరీగా, మిడ్‌ లెవల్‌ ఉద్యోగులు E3-E6 కేటగిరీగా, సీనియర్‌ ఉద్యోగులు E7 ఆపైన కేటగిరీగా పరిగణించబడతారు.
అయితే, ఏ కేటగిరీకి ఎంత బోనస్‌ చెల్లించబడుతుందో ప్రత్యేకంగా సంస్థ వెల్లడించలేదు.