Stock market: స్టాక్ మార్కెట్‌లో భారీ పతనం.. సెన్సెక్స్ 900 పాయింట్లు డౌన్, రూ.6 లక్షల కోట్ల సంపద ఆవిరి!

వ్రాసిన వారు Jayachandra Akuri

Jul 24, 2026

03:35 pm

ఈ వార్తాకథనం ఏంటి

భారతీయ స్టాక్ మార్కెట్ శుక్రవారం ఉదయం ట్రేడింగ్‌లో భారీ అమ్మకాల ఒత్తిడిని ఎదుర్కొంది. కీలక సూచీలు సెన్సెక్స్, నిఫ్టీ-50 రెండూ ఒక శాతానికి పైగా పడిపోవడంతో మార్కెట్‌లో తీవ్ర ఆందోళన నెలకొంది. దీంతో పెట్టుబడిదారుల సంపద ఒక్కరోజులోనే సుమారు రూ.6 లక్షల కోట్లు కరిగిపోయింది. సెన్సెక్స్, నిఫ్టీ భారీగా క్షీణత ఉదయం ట్రేడింగ్‌లో 30 షేర్ల సెన్సెక్స్ 900 పాయింట్లకు పైగా పతనమై 75,474 వద్ద ఇంట్రాడే కనిష్ట స్థాయిని తాకింది. మరోవైపు నిఫ్టీ-50 కూడా 260 పాయింట్లకు పైగా పడిపోయి 23,606 వద్దకు చేరుకుంది. పెద్ద కంపెనీలతో పాటు మిడ్‌క్యాప్, స్మాల్‌క్యాప్ షేర్లలో కూడా భారీ అమ్మకాలు కనిపించాయి. నిఫ్టీ మిడ్‌క్యాప్-100, స్మాల్‌క్యాప్-100 సూచీలు దాదాపు 1.5 శాతం వరకు క్షీణించాయి.

వివరాలు

రూ.6 లక్షల కోట్ల సంపద ఆవిరి

బీఎస్‌ఈలో నమోదైన కంపెనీల మొత్తం మార్కెట్ క్యాపిటలైజేషన్ రూ.477 లక్షల కోట్ల నుంచి రూ.471 లక్షల కోట్లకు పడిపోయింది.

దీంతో పెట్టుబడిదారులు ఒక్కరోజులోనే సుమారు రూ.6 లక్షల కోట్ల సంపదను కోల్పోయారు.

వివరాలు

1. బ్యారెల్‌కు 100 డాలర్లను దాటిన ముడిచమురు ధరలు

అంతర్జాతీయ మార్కెట్లో బ్రెంట్ క్రూడ్ ధర బ్యారెల్‌కు 100 డాలర్లను దాటి 101 డాలర్లకు చేరుకోవడం మార్కెట్‌పై తీవ్ర ప్రభావం చూపింది.

గత వారం 16 శాతం పెరిగిన చమురు ధరలు.. ఈ వారం మరో 15 శాతం ఎగిశాయి. జూలై నెలలోనే దాదాపు 40 శాతం పెరుగుదల నమోదైంది.

చమురు ధరల పెరుగుదలతో భారత్‌లో ద్రవ్యోల్బణం, కార్పొరేట్ లాభాలు, చెల్లింపుల సమతుల్యత (BoP)పై ప్రతికూల ప్రభావం పడుతుందనే ఆందోళన పెట్టుబడిదారులను కలవరపెడుతోంది.

జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వీకే విజయకుమార్ మాట్లాడుతూ.. ఎర్ర సముద్రంలో ఇరాన్ మద్దతు ఉన్న హౌతీ తిరుగుబాటుదారులు సౌదీ చమురు ట్యాంకర్లపై దాడులు చేయడం వల్లే చమురు ధరలు ఒక్కసారిగా పెరిగాయని పేర్కొన్నారు.

వివరాలు

2. అమెరికా-ఇరాన్ ఉద్రిక్తతలు

అమెరికా-ఇరాన్ మధ్య కొనసాగుతున్న ఘర్షణలు కూడా మార్కెట్‌ను ఆందోళనకు గురిచేస్తున్నాయి.

మీడియా కథనాల ప్రకారం అమెరికా అధ్యక్షుడు డొనాల్డ్ ట్రంప్ ఇరాన్‌పై మరో భారీ సైనిక చర్య చేపట్టే అవకాశాలను పరిశీలిస్తున్నారు.

ఇదే సమయంలో అమెరికా సైన్యం వరుసగా 13వ రాత్రి కూడా ఇరాన్‌పై దాడులు కొనసాగించినట్లు ప్రకటించింది.

ఈ భౌగోళిక ఉద్రిక్తతలు ప్రపంచ మార్కెట్లపై ప్రతికూల ప్రభావం చూపుతున్నాయి.

వివరాలు

3. పెరుగుతున్న అమెరికా బాండ్ యీల్డ్స్

అమెరికాలో 10 ఏళ్ల ప్రభుత్వ బాండ్ యీల్డ్ 4.711 శాతానికి చేరుకోవడం కూడా భారత మార్కెట్‌కు ప్రతికూల సంకేతంగా మారింది.

బాండ్ యీల్డ్స్ పెరిగితే విదేశీ పెట్టుబడిదారులు అభివృద్ధి చెందుతున్న దేశాల ఈక్విటీ మార్కెట్ల నుంచి నిధులను ఉపసంహరించుకుని, అమెరికా వంటి సురక్షిత రుణ పత్రాల్లో పెట్టుబడులు పెట్టే అవకాశం ఉంటుంది.

దీంతో భారత మార్కెట్ నుంచి విదేశీ పెట్టుబడుల ప్రవాహం తగ్గే ప్రమాదం ఉందని విశ్లేషకులు భావిస్తున్నారు.

వివరాలు

4. ట్రంప్ టారిఫ్ విధానాలు

అమెరికా అధ్యక్షుడు డొనాల్డ్ ట్రంప్ మళ్లీ సుంకాల విధానాన్ని కఠినతరం చేస్తున్నారు.

ఇటీవలే బ్రెజిల్‌పై 25 శాతం, కెనడాపై 50 శాతం, జెనరిక్ ఔషధాలపై 200 శాతం వరకు సుంకాలు ప్రకటించిన అమెరికా.. తాజాగా మరో 60 దేశాలపై 10 నుంచి 12.5 శాతం వరకు కొత్త టారిఫ్‌లు విధించింది.

భారత్‌పై 10 శాతం సుంకం విధించడం వల్ల గ్లోబల్ వాణిజ్యంపై ప్రభావం పడుతుందనే ఆందోళన మార్కెట్‌ను ఒత్తిడిలోకి నెట్టింది.

నిఫ్టీ కీలకమైన 24,000 స్థాయికి దిగువనే ట్రేడవుతుండగా, శుక్రవారం ట్రేడింగ్‌లో 23,700 మార్కును కూడా కోల్పోయింది.

వివరాలు

5. సాంకేతిక (టెక్నికల్) కారణాలు

కొటక్ సెక్యూరిటీస్ ఈక్విటీ రీసెర్చ్ హెడ్ శ్రీకాంత్ చౌహాన్ అభిప్రాయం ప్రకారం.. నిఫ్టీ 24,000 స్థాయిని దాటే వరకు బలహీన ధోరణి కొనసాగొచ్చు.

దిగువన 23,650 నుంచి 23,550 స్థాయిల వరకు మార్కెట్ పడిపోయే అవకాశం ఉందని తెలిపారు.

అలాగే బజాజ్ బ్రోకింగ్ విశ్లేషణ ప్రకారం.. నిఫ్టీ 23,800 దిగువకు జారితే 23,500 స్థాయి వరకు మరింత వేగంగా క్షీణించే అవకాశం ఉందని పేర్కొంది.

మొత్తంగా... ముడిచమురు ధరల పెరుగుదల, అమెరికా-ఇరాన్ ఉద్రిక్తతలు, అమెరికా బాండ్ యీల్డ్స్ ఎగబాకడం, ట్రంప్ కొత్త టారిఫ్‌లు, టెక్నికల్ బలహీనత వంటి అంశాలు కలిసివచ్చి భారత స్టాక్ మార్కెట్‌పై తీవ్ర ఒత్తిడిని సృష్టించాయి.

ఈ పరిణామాలతో ఒక్కరోజులోనే పెట్టుబడిదారుల సంపద రూ.6 లక్షల కోట్ల మేర ఆవిరైపోయింది.