IBAI Warns IRDAI: కొత్త కమిషన్ పరిమితులతో బీమా రంగంలో ఉద్యోగాలు తగ్గుతాయన్న IBAI

వ్రాసిన వారు Sirish Praharaju

Sep 30, 2026

03:46 pm

ఈ వార్తాకథనం ఏంటి

ఇన్సూరెన్స్ పంపిణీ వ్యవస్థలో సంస్కరణల కోసం IRDAI ప్రతిపాదించిన నిబంధనలపై ఇన్సూరెన్స్ బ్రోకర్స్ అసోసియేషన్ ఆఫ్ ఇండియా (IBAI) ఆందోళన వ్యక్తం చేసింది. సెప్టెంబర్ 23, 2026న విడుదల చేసిన 'Reforms for Recalibrating Economics of Insurance Distribution' కన్సల్టేషన్ పేపర్‌లోని కొన్ని ప్రతిపాదనలు పాలసీదారులకు నష్టం చేయడంతో పాటు ఉద్యోగాలు, బీమా రంగ వృద్ధిపై ప్రతికూల ప్రభావం చూపవచ్చని తెలిపింది. పాలసీదారుల రక్షణ,పారదర్శకత,మిస్-సెల్లింగ్ నియంత్రణ,బీమా విస్తరణ వంటి IRDAI లక్ష్యాలకు IBAI మద్దతు తెలిపింది. అయితే 30కి పైగా వేర్వేరు కమిషన్ పరిమితులు,బీమా సంస్థల మొత్తం నిర్వహణ ఖర్చుల పరిమితిని మూడో వంతు తగ్గించే ప్రతిపాదనలపై అభ్యంతరం వ్యక్తం చేసింది.

వివరాలు

IRDAI ప్రతిపాదనలపై IBAI కీలక సూచనలు

కస్టమర్ స్వయంగా ఎంచుకున్న బ్రోకర్‌కు తక్కువ చెల్లింపు చేయడం సరైన విధానం కాదని పేర్కొంది.

2025 మార్చి 31 నాటికి దేశంలోని 27.18లక్షల పాయింట్-ఆఫ్-సేల్ సిబ్బందిలో 14.81లక్షల మందిని బీమా బ్రోకర్లు ప్రోత్సహిస్తున్నారని IBAI తెలిపింది.

ముఖ్యంగా చిన్నపట్టణాల్లో పనిచేసే వారికి కమిషన్ పరిమితులు ప్రభావం చూపవచ్చని పేర్కొంది.

అలాగే ఖర్చుల పరిమితి తగ్గితే బీమాసంస్థలు సేల్స్,సర్వీసింగ్,క్లెయిమ్స్ సిబ్బందిని తగ్గించే అవకాశం ఉందని తెలిపింది.

2023లో అమల్లోకి వచ్చిన ఖర్చుల విధానాన్ని కొనసాగించాలని,బలవంతపు లేదా క్రెడిట్‌-లింక్డ్ విక్రయాలకే కమిషన్ పరిమితులను వర్తింపజేయాలని IBAI సూచించింది.

వాణిజ్య,పెద్ద రిస్క్ పాలసీలకు మినహాయింపు ఇవ్వాలని,తుది నిబంధనలకు ముందు రెగ్యులేటరీ ఇంపాక్ట్ అసెస్‌మెంట్ నిర్వహించాలని కోరింది.

IBAI తన పూర్తి స్పందనను అక్టోబర్ 25లోగా IRDAIకి సమర్పించనుంది.