RBI: బంగారు ఆభరణాలు తాకట్టు రుణాలకు ఇదే గరిష్ఠ పరిమితి.. రిజర్వు బ్యాంకు కొత్త మార్గదర్శకాలు
ఈ వార్తాకథనం ఏంటి
బ్యాంకులు బంగారం, వెండి తాకట్టు ఆధారంగా ఇచ్చే రుణాలను మనీలాండరింగ్‌కు వినియోగిస్తున్నారా అనే కోణంలో జాగ్రత్తగా పరిశీలించాల్సిన అవసరం ఉందని రిజర్వ్ బ్యాంక్ ఆదేశాలు జారీ చేసింది.
తాకట్టు పెట్టిన ఆభరణాలు లేదా వస్తువులు వాస్తవంగా రుణగ్రహీత సొంతమైనవేనా అన్న విషయాన్ని నిర్ధారించేందుకు బిల్లులు,రసీదులు తప్పనిసరిగా పరిశీలించాలని సూచించింది.
రసీదులు లేకపోతే, ఆ వస్తువులు రుణగ్రహీత సొంతమైనవేనని రాతపూర్వకంగా ధృవీకరణ తీసుకోవాలని పేర్కొంది.
అలాగే, 'బంగారం తాకట్టు పెట్టి త్వరగా రుణాలు పొందండి' వంటి వంచక ప్రకటనలు బ్యాంకులు, ఆర్థిక సంస్థలు విడుదల చేయవద్దని ఆర్బీఐ స్పష్టంగా హెచ్చరించింది.
బంగారం తాకట్టు రుణాల విషయంలో సంస్థలు నిబంధనలను సరిగా పాటించకపోతున్నాయని, ఫలితంగా ఆ రుణాల దుర్వినియోగం జరుగుతోందన్న ఆరోపణల నేపథ్యంలో ఈమార్గదర్శకాలు రూపొందించబడ్డాయి.
వివరాలు
కీలక మార్గదర్శకాలు ఇవే:
తాకట్టు పరిమితి: ఇకపై ఒక్క వ్యక్తి పేరుతో కిలో బంగారం లేదా 10 కిలోల వెండి ఆభరణాలకు మించిన మొత్తాన్ని తాకట్టు పెట్టే అవకాశం ఉండదు.
రుణ మంజూరులో పరిమితులు: రూ.2.5 లక్షల లోపు రుణం కోరితే - తాకట్టు ఆభరణాల విలువలో గరిష్ఠంగా 85 శాతం వరకే రుణం ఇవ్వాలి. ఉదాహరణకు, రూ.2.95 లక్షల విలువైన ఆభరణం ఉంటే, దానికి రూ.2.5 లక్షల వరకూ రుణం పొందవచ్చు.
రూ.2.5 లక్షల నుండి రూ.5 లక్షల వరకూ రుణం కోరితే - గరిష్ఠంగా 80 శాతం వరకే ఇవ్వాలి. రూ.5 లక్షలకు మించి అయితే - గరిష్ఠంగా 75 శాతం వరకే మంజూరు చేయాలి.
వివరాలు
బంగారు నాణేలు & వెండి పరిమితులు:
బంగారు నాణేలు లేదా బిస్కెట్లు అయితే గరిష్ఠంగా 50 గ్రాములు, వెండి అయితే 500 గ్రాములు వరకే తాకట్టు స్వీకరించవచ్చు.
రుణాల విచారణ అవసరం: ఒకే వ్యక్తి అనేక బంగారం తాకట్టు రుణాలు తీసుకుంటున్నట్లయితే, వాటిని ప్రత్యేకంగా పరిశీలించి పూర్తి విచారణ జరపాల్సి ఉంటుంది.
సొమ్ము ఖాతాలోనే జమ చేయాలి: మంజూరైన రుణం మొత్తాన్ని నేరుగా రుణగ్రహీత బ్యాంకు ఖాతాలో జమ చేయాలి. కాష్ రూపంలో ఇవ్వకూడదు.
తిరిగి చెల్లింపు గడువు: రుణం తీసుకున్న తేదీ నుంచి ఒకే ఏడాదిలోగా తిరిగి చెల్లించాలి. లేకపోతే తాకట్టు ఆస్తిని వేలం వేసే ప్రక్రియ ప్రారంభించాలి.
వివరాలు
వేలం ప్రక్రియ రెండు దశల్లో:
మొదటి వేలం - బ్యాంకు ఉన్న జిల్లాలో నిర్వహించాలి. అది పూర్తి కాకపోతే - రెండోసారి ఆన్‌లైన్ ద్వారా లేదా పక్క జిల్లాలో వేలం చేపట్టాలి.
సొత్తు తీసుకోకపోతే:
రుణ బాకీ పూర్తిగా చెల్లించినా, రెండు సంవత్సరాల వరకు తాకట్టు ఆస్తిని తీసుకెళ్లకపోతే, బ్యాంకు పాలక మండలికి ఈ వివరాలను నివేదించాలి. రుణగ్రహీత లేదా వారసులు ఎక్కడ ఉన్నారో గుర్తించి, వారికి సమాచారం అందించాలి.