Beer Industry: అల్యూమినియం డబ్బాల కొరత.. బీర్ ఇండస్ట్రీకి కోట్లలోళ నష్టం..!

వ్రాసిన వారు Sirish Praharaju

Oct 13, 2025

01:08 pm

ఈ వార్తాకథనం ఏంటి

దేశీయ బీర్ పరిశ్రమ ప్రస్తుతం అల్యూమినియం డబ్బాల తీవ్రమైన కొరతను ఎదుర్కొంటోంది. ఈ సమస్యను పరిష్కరించేందుకు, విదేశీ మార్కెట్ల నుంచి నిరంతర సరఫరాలు కొనసాగేందుకు నాణ్యత నియంత్రణ ఆదేశాల (QCO)లో తాత్కాలిక సడలింపులు ఇవ్వాలని ప్రభుత్వాన్ని పరిశ్రమ వర్గాలు కోరాయి. బ్రూవర్స్ అసోసియేషన్ ఆఫ్ ఇండియా (BAI) వివరాల ప్రకారం,ప్రస్తుతం 500 మిల్లీలీటర్ల పరిమాణం ఉన్న డబ్బాల కొరత కారణంగా బీర్ ఉత్పత్తి దెబ్బతింటోంది. ఈ పరిమాణంలోని డబ్బాలు దేశవ్యాప్తంగా అమ్ముడయ్యే బీర్‌లో దాదాపు 20 శాతం వాటాను కలిగి ఉన్నందున, ప్రభుత్వానికి సుమారు రూ.1,300కోట్ల ఆదాయ నష్టం సంభవించవచ్చని అంచనా వేసింది. 2025 ఏప్రిల్ 1 నుంచి అల్యూమినియం డబ్బాలను BIS (బ్యూరో ఆఫ్ ఇండియన్ స్టాండర్డ్స్)సర్టిఫికేషన్ పరిధిలోకి ప్రభుత్వం తీసుకువచ్చింది.

వివరాలు

BIS ధృవీకరణ పొందడానికి చాలా నెలలు పట్టే అవకాశం

ఈ నాణ్యత నియంత్రణ ఆదేశం (QCO)అమల్లోకి రావడంతో, దేశీయ బీర్, ఇతర పానీయాల ప్యాకేజింగ్ రంగాలు తాత్కాలిక సరఫరా సమస్యలను ఎదుర్కొంటున్నాయి. ప్రధాన అల్యూమినియం డబ్బాల సరఫరాదారులైన బాల్ బెవరేజ్ ప్యాకేజింగ్ ఇండియా, కాన్-ప్యాక్ ఇండియా వంటి కంపెనీలు ఇప్పటికే తమ తయారీ యూనిట్లలో గరిష్ట ఉత్పత్తి సామర్థ్యాన్ని చేరుకున్నాయి. కొత్త ఉత్పత్తి లైన్లను ఏర్పాటు చేయకుండా ఉంటే,తదుపరి 6 నుండి 12 నెలలలో ఉత్పత్తి పెంచడం సాధ్యం కాదని ఈ సంస్థలు స్పష్టం చేశాయి. దీని ఫలితంగా,BIS సర్టిఫికేషన్ లేకుండా విదేశీ విక్రేతల నుండి డబ్బాలను దిగుమతి చేసుకోవడం సాధ్యం కాకుండా పోయింది. BIS ధృవీకరణ పొందడానికి చాలా నెలలు పట్టే అవకాశం ఉన్నందున, సరఫరా అంతరాయాలు ఏర్పడే ప్రమాదం ఉంది.

వివరాలు

ఒక సంవత్సరం పాటు QCO నిబంధనల్లో తాత్కాలిక సడలింపులు

ఈ నేపథ్యంలో, ఒక సంవత్సరం పాటు QCO నిబంధనల్లో తాత్కాలిక సడలింపులు ఇవ్వాలని BAI కేంద్ర ప్రభుత్వాన్ని అధికారికంగా అభ్యర్థించింది. BAI ప్రాతినిధ్యం వహిస్తున్న దేశంలోని మూడు ప్రధాన బీర్ తయారీ సంస్థలు, ఏబీ ఇన్‌బేవ్,కార్ల్స్‌బర్గ్, యునైటెడ్ బ్రూవరీస్,దేశీయ మార్కెట్‌లో అమ్ముడయ్యే మొత్తం బీర్‌లో దాదాపు 85 శాతం వాటాను కలిగి ఉన్నాయి. ఇటీవల యునైటెడ్ బ్రూవరీస్ లిమిటెడ్ (UBL)మేనేజింగ్ డైరెక్టర్, సీఈఓ కూడా PTIకు ఇచ్చిన ఇంటర్వ్యూలో ఈ సమస్యను ప్రస్తావించి, తక్షణ చర్య అవసరమని పేర్కొన్నారు. ప్రస్తుతం ప్రభుత్వం, BIS సర్టిఫికేషన్ లేకుండా అల్యూమినియం డబ్బాలను దిగుమతి చేసుకోవడానికి 2025 సెప్టెంబర్ 30 వరకు అనుమతి పొడిగింపు ఇచ్చినప్పటికీ, BAI ప్రకారం,దేశంలోకి డబ్బాలను దిగుమతి చేసుకోవడానికి ఈ సమయం సరిపోదు

వివరాలు

BIS సర్టిఫికేషన్ లేకుండా డబ్బాలను దిగుమతి చేసుకునే అనుమతి

BAI ప్రకారం, ఇప్పటికే అవసరమైన పత్రాలతో BIS సర్టిఫికేషన్ దరఖాస్తులు సమర్పించిన అంతర్జాతీయ సరఫరాదారులు, వారి దరఖాస్తులు పరిశీలనలో ఉన్నంత కాలం BIS సర్టిఫికేషన్ లేకుండా డబ్బాలను దిగుమతి చేసుకునే అనుమతి పొందాలని కోరారు. ఈ విధానం ద్వారా నియంత్రణ పర్యవేక్షణ కొనసాగిస్తూ, వ్యాపార కార్యకలాపాలు అంతరాయం లేకుండా సాగుతాయని BAI డైరెక్టర్ జనరల్ వినోద్ గిరి ప్రభుత్వం‌కు రాసిన లేఖలో స్పష్టంచేశారు.