NPCI: యూపీఐ చెల్లింపుల సందేహాలకు ఏఐ సహాయం: ఫిమీని ప్రవేశపెట్టిన ఎన్పీసీఐ
ఈ వార్తాకథనం ఏంటి
జాతీయ చెల్లింపుల సంస్థ ఎన్పీసీఐ (NPCI) భారతదేశ డిజిటల్ చెల్లింపుల వ్యవస్థకు అనువుగా రూపొందించిన కృత్రిమ మేధస్సు ఆధారిత భాషా మోడల్ ఫిమీ (FiMI - ఫైనాన్స్ మోడల్ ఫర్ ఇండియా)ని ప్రారంభించింది. ఇండియా ఏఐ ఇంపాక్ట్ సమ్మిట్-2026లో ఈ విషయాన్ని ప్రకటించిన ఎన్పీసీఐ,యూపీఐ లావాదేవీలు, ఫిర్యాదుల పరిష్కారం, మాండేట్ నిర్వహణ, నిబంధనలకు సంబంధించిన సందేహాలను అర్థం చేసుకుని సమాధానాలు ఇవ్వగలిగేలా ఈ మోడల్ను స్వయంగా అభివృద్ధి చేసినట్టు తెలిపింది. ప్రస్తుతం ఫిమీ, ఎన్పీసీఐ యూపీఐ హెల్ప్ అసిస్టెంట్కు శక్తినిస్తోంది. ఏఐ ఆధారిత ఈ సహాయక వ్యవస్థ యూజర్ల చెల్లింపు సంబంధిత ప్రశ్నలకు సమాధానాలు ఇవ్వడంతో పాటు, ఫిర్యాదుల పరిష్కారానికి, మాండేట్ ప్రక్రియల నిర్వహణకు ఉపయోగపడుతోంది.
వివరాలు
చెల్లింపు వ్యవస్థల్లో ఏఐ టూల్స్ వినియోగం
ఇది ఇంగ్లిష్,హిందీ,తెలుగు,బెంగాలీ భాషల్లో అందుబాటులో ఉండగా,రాబోయే ఆరు నుంచి ఎనిమిది నెలల్లో మరిన్ని భారతీయ భాషలను చేర్చనున్నట్టు వెల్లడించారు. చెల్లింపు వ్యవస్థల్లో ఏఐ టూల్స్ వినియోగంతో లావాదేవీల సమస్యలు త్వరగా పరిష్కరించే అవకాశం ఉండటంతో పాటు, యూపీఐ లావాదేవీలు భారీగా పెరుగుతున్న నేపథ్యంలో యూజర్లకు వేగంగా సహాయం అందుతుందని ఎన్పీసీఐ తెలిపింది. ఫిమీని భారతీయ ఆర్థిక డేటా, సింథటిక్ చెల్లింపు డేటాతో ముందుగానే శిక్షణ ఇచ్చి, మరింత ఖచ్చితత్వం కోసం ఫైన్ట్యూన్ చేసినట్టు వివరించింది.
వివరాలు
డిజిటల్ లావాదేవీలకు యూపీఐ ప్రధాన సాధనం
ఈ మోడల్ శిక్షణ, పనితీరు వివరాలను ఓపెన్ యాక్సెస్ రీసెర్చ్ వేదిక ఆర్కైవ్లో సాంకేతిక పత్రంగా కూడా ప్రచురించింది. భవిష్యత్తులో మరింత ఆధునిక మోడళ్లపై పరిశోధన చేయడంతో పాటు, బహుభాషా సామర్థ్యాలను విస్తరించాలన్న యోచనలో ఉన్నట్టు ఎన్పీసీఐ పేర్కొంది. దేశవ్యాప్తంగా యూపీఐ వంటి కీలక రిటైల్ చెల్లింపు వ్యవస్థలను నిర్వహిస్తున్న ఎన్పీసీఐ, వ్యక్తులు, చిన్న వ్యాపారాల డిజిటల్ లావాదేవీలకు యూపీఐ ప్రధాన సాధనంగా మారిందని తెలిపింది.