SBI: ఎస్బీఐ Q1 ఫలితాలు.. 10 శాతం పెరిగిన నికర లాభం.. రూ.21,121 కోట్లు వచ్చాయిలా..

వ్రాసిన వారు Moogati Shabari

Aug 07, 2026

05:01 pm

ఈ వార్తాకథనం ఏంటి

దేశంలోని అతిపెద్ద ప్రభుత్వ రంగ బ్యాంకుల్లో ఒకటైన స్టేట్ బ్యాంక్ ఆఫ్ ఇండియా (SBI) ప్రస్తుత ఆర్థిక సంవత్సరం తొలి త్రైమాసికం (Q1FY27) ఫలితాలను ప్రకటించింది. జూన్‌తో ముగిసిన త్రైమాసికంలో బ్యాంక్ నికర లాభం రూ.21,121.22 కోట్లుగా నమోదైంది. గతేడాది ఇదే త్రైమాసికంలో నమోదైన రూ.19,160.44 కోట్లతో పోలిస్తే ఈసారి నికర లాభం 10.23 శాతం పెరిగింది. ఇదే సమయంలో SBI వడ్డీ ఆదాయంలోనూ గణనీయమైన వృద్ధి నమోదైంది. Q1 ఫలితాలు ప్రకటించిన అనంతరం శుక్రవారం స్టేట్ బ్యాంక్ ఆఫ్ ఇండియా షేర్లు భారీగా పుంజుకున్నాయి. బ్యాంక్ షేరు 3.21 శాతం వరకు లాభపడింది.

వివరాలు

రూ.46,992 కోట్లకు చేరిన వడ్డీ ఆదాయం..

జూన్ త్రైమాసికంలో SBI వడ్డీ ఆదాయం రూ.46,992 కోట్లుగా నమోదైంది.

గతేడాది ఇదే కాలంలో వచ్చిన రూ.40,907 కోట్లతో పోలిస్తే వడ్డీ ఆదాయం 14.88 శాతం పెరిగింది.

ఈ త్రైమాసికంలో బ్యాంక్ ఆస్తుల నాణ్యత కూడా మెరుగుపడింది. స్థూల నిరర్థక ఆస్తులు (GNPA) నిష్పత్తి గత త్రైమాసికంలోని 1.49 శాతం నుంచి 1.47 శాతానికి తగ్గింది.

అలాగే నికర NPA నిష్పత్తి కూడా మార్చి త్రైమాసికంలోని 0.39 శాతం నుంచి స్వల్పంగా మెరుగుపడి 0.38 శాతానికి చేరింది.

వివరాలు

రూ.5,047 కోట్లకు పెరిగిన కేటాయింపులు..

SBI కేటాయింపులు (Provisions) ఈ త్రైమాసికంలో రూ.5,047 కోట్లకు పెరిగాయి.

గత త్రైమాసికంలో ఇవి రూ.2,872 కోట్లుగా ఉండగా.. గతేడాది ఇదే త్రైమాసికంలో రూ.4,759 కోట్లుగా నమోదయ్యాయి.

కేటాయింపులు పెరిగినప్పటికీ బ్యాంక్ క్రెడిట్ కాస్ట్ మాత్రం వరుస త్రైమాసిక ప్రాతిపదికన 0.27 శాతం వద్ద స్థిరంగా ఉంది.

ఏడాది క్రితం ఇదే కాలంలో ఉన్న 0.47 శాతంతో పోలిస్తే ఇది మెరుగుదల.

అంటే కేటాయింపుల అవసరం పెరిగినప్పటికీ SBI రుణాల నాణ్యతకు సంబంధించిన కీలక సూచీలను సమర్థంగా నిర్వహించగలిగిందని తెలుస్తోంది.

వివరాలు

దేశీయ కార్యకలాపాల్లో 3 శాతం NIM..

SBI దేశీయ కార్యకలాపాల్లో నికర వడ్డీ మార్జిన్ (NIM) 3 శాతంగా నమోదైంది.

మొత్తం బ్యాంక్‌ NIM మాత్రం వరుస త్రైమాసిక ప్రాతిపదికన 5 బేసిస్ పాయింట్లు పెరిగి 2.86 శాతానికి చేరింది.

బ్యాంక్ వ్యాపార కార్యకలాపాలను పరిశీలిస్తే.. స్థూల రుణాలు (Gross Advances) ఏడాది ప్రాతిపదికన 18.6 శాతం వృద్ధి చెందాయి.

త్రైమాసిక ప్రాతిపదికన కూడా 2.3 శాతం స్వల్ప వృద్ధిని నమోదు చేశాయి.

అయితే కొత్తగా నిరర్థక రుణాలుగా మారిన రుణాల విలువ (Fresh Slippages) రూ.5,548 కోట్ల నుంచి రూ.7,359 కోట్లకు పెరిగింది.

దీంతో స్లిప్పేజ్ రేషియో కూడా గతంలో ఉన్న 0.47 శాతం నుంచి 0.57 శాతానికి పెరిగింది.