Stock Market: సెన్సెక్స్‌కు భారీ షాక్.. 800 పాయింట్లు పతనం, 24 వేల దిగువకు నిఫ్టీ

వ్రాసిన వారు Sirish Praharaju

Jul 22, 2026

03:27 pm

ఈ వార్తాకథనం ఏంటి

భారతీయ స్టాక్ మార్కెట్‌లో బుధవారం భారీ అమ్మకాల ఒత్తిడి కనిపించింది. ఇంట్రాడే ట్రేడింగ్‌లో ప్రధాన సూచీలు దాదాపు ఒక శాతం వరకు పడిపోయాయి. ముఖ్యంగా మిడ్‌క్యాప్, స్మాల్‌క్యాప్ షేర్లు మరింత ఒత్తిడికి గురయ్యాయి. సెన్సెక్స్ 800 పాయింట్లకు పైగా క్షీణించి ఇంట్రాడేలో 76,641.19 వద్ద కనిష్ఠాన్ని తాకగా, నిఫ్టీ 50 కూడా 200 పాయింట్లకు పైగా పడిపోయి కీలకమైన 24,000 మార్కు దిగువకు జారింది. ఇంట్రాడేలో 23,961.40 వద్ద కనిష్ఠ స్థాయిని నమోదు చేసింది. ఇదే సమయంలో నిఫ్టీ మిడ్‌క్యాప్ 100, స్మాల్‌క్యాప్ 100 సూచీలు దాదాపు 1.5 శాతం వరకు నష్టపోయాయి.

వివరాలు

మార్కెట్ సెంటిమెంట్‌ను దెబ్బతీసిన ట్రంప్ కొత్త టారిఫ్‌లు

ఈ భారీ పతనానికి పలు అంతర్జాతీయ పరిణామాలు కారణమయ్యాయని మార్కెట్ నిపుణులు చెబుతున్నారు.

ముఖ్యంగా అమెరికా అధ్యక్షుడు డొనాల్డ్ ట్రంప్ ప్రకటించిన కొత్త టారిఫ్‌ల ప్రభావం మార్కెట్ సెంటిమెంట్‌ను దెబ్బతీసింది.

అమెరికాకు దిగుమతి అయ్యే అన్ని జనరిక్ ఔషధాలపై 2026 ఆగస్టు 1 నుంచి రెండేళ్లపాటు సున్నా శాతం టారిఫ్ కొనసాగుతుందని,ఆ తర్వాత ఏడాది 100 శాతం, అనంతరం 200 శాతం టారిఫ్ విధిస్తామని ట్రంప్ ప్రకటించారు.

అలాగే మరిన్ని దేశాలపై కొత్త టారిఫ్‌లు త్వరలో ప్రకటించే అవకాశముందని అమెరికా వాణిజ్య ప్రతినిధి జేమిసన్ గ్రీర్ వెల్లడించడం కూడా మార్కెట్లపై ప్రతికూల ప్రభావం చూపింది.

వివరాలు

వరుసగా నాలుగో రోజు పెరిగిన ముడి చమురు ధరలు

అమెరికా-ఇరాన్ మధ్య కొనసాగుతున్న ఉద్రిక్తతలు మరింత తీవ్రరూపం దాల్చడం కూడా పెట్టుబడిదారుల్లో ఆందోళన పెంచింది.

మీడియా కథనాల ప్రకారం కువైట్‌లోని అమెరికా ఆయుధ నిల్వలు, లాజిస్టిక్ కేంద్రాలపై ఇరాన్ డ్రోన్లతో దాడులు చేసినట్లు సమాచారం.

మరోవైపు ఇరాన్ అణు కేంద్రాల సమీపంలోని ప్రాంతాలను లక్ష్యంగా చేసుకుని అమెరికా దాడులు కొనసాగిస్తుండగా,అలాంటి చర్యలు యుద్ధాన్ని మరింత విస్తరిస్తాయని ఇరాన్ హెచ్చరించింది.

ఈ పరిణామాల కారణంగా అంతర్జాతీయ మార్కెట్లలో అనిశ్చితి పెరిగింది.

అమెరికా-ఇరాన్ ఉద్రిక్తతలతో అంతర్జాతీయ మార్కెట్లో ముడి చమురు ధరలు వరుసగా నాలుగో రోజు కూడా పెరిగాయి.

బ్రెంట్ క్రూడ్ ధర బ్యారెల్‌కు 92.67 డాలర్లకు చేరి ఈ ఏడాది జూన్ 11 తర్వాత గరిష్ఠ స్థాయిని నమోదు చేసింది.

వివరాలు

బలహీనపడిన రూపాయి విలువ

చమురు ధరలు పెరగడం వల్ల ద్రవ్యోల్బణం, దిగుమతి వ్యయం పెరిగే అవకాశంపై పెట్టుబడిదారులు ఆందోళన చెందుతున్నారు.

చమురు దిగుమతులపై అధికంగా ఆధారపడే భారత్‌కు ఇది ప్రతికూల అంశంగా మారింది.

అంతేకాకుండా రూపాయి విలువ కూడా బలహీనపడింది.

బుధవారం ప్రారంభ ట్రేడింగ్‌లో డాలర్‌తో పోలిస్తే రూపాయి 11 పైసలు క్షీణించి 96.36 వద్ద ట్రేడైంది.

పెరుగుతున్న చమురు ధరలు, భౌగోళిక ఉద్రిక్తతలు, డాలర్‌కు పెరుగుతున్న డిమాండ్ రూపాయిపై ఒత్తిడి తీసుకొచ్చాయి.

ఈ నెల 29న జరగనున్న అమెరికా ఫెడరల్ రిజర్వ్ వడ్డీ రేట్ల నిర్ణయంపై ఇప్పుడు మార్కెట్ దృష్టి ఉందని విశ్లేషకులు చెబుతున్నారు.

సమీప కాలంలో రూపాయి 96 నుంచి 96.45 మధ్య ట్రేడ్ అయ్యే అవకాశం ఉందని అంచనా వేస్తున్నారు.

వివరాలు

అమెరికా 10 ఏళ్ల ప్రభుత్వ బాండ్ యీల్డ్ 4.635 శాతానికి చేరడం కూడా మార్కెట్‌పై ప్రభావం చూపింది

మరోవైపు అమెరికా డాలర్ బలపడటం, అమెరికా 10 ఏళ్ల ప్రభుత్వ బాండ్ యీల్డ్ 4.635 శాతానికి చేరడం కూడా భారత మార్కెట్‌పై ప్రభావం చూపింది.

డాలర్ బలపడినప్పుడు విదేశీ పెట్టుబడిదారులు అభివృద్ధి చెందుతున్న దేశాల మార్కెట్ల నుంచి పెట్టుబడులు ఉపసంహరించుకుని అమెరికా బాండ్ల వంటి సురక్షిత పెట్టుబడుల వైపు మొగ్గు చూపుతారు.

దీంతో విదేశీ పెట్టుబడుల ప్రవాహం తగ్గే అవకాశం ఉండటంతో భారతీయ స్టాక్ మార్కెట్‌పై అమ్మకాల ఒత్తిడి మరింత పెరిగిందని మార్కెట్ నిపుణులు విశ్లేషిస్తున్నారు.