కేంద్రం కీలక నిర్ణయం.. భారీగా పెరిగిన విండ్ఫాల్ టాక్స్
ఈ వార్తాకథనం ఏంటి
విండ్ ఫాల్ టాక్స్ పై కేంద్ర ప్రభుత్వం కీలక నిర్ణయం తీసుకుంది.
దేశీయంగా ఉత్పత్తి అవుతున్న క్రూడాయిల్‌పై (ముడి చమురు) విండ్ఫాల్ టాక్స్ ను భారీగా పెంచుతున్నట్లు వెల్లడించింది.
ఇటీవలే టన్నుకు రూ.6700గా ఉండగా ఇప్పుడు ఏకంగా రూ. 10 వేలకు పెంచేసి షాక్ ఇచ్చింది. సెప్టెంబర్ 16 నుంచి ఈ నిర్ణయం అమల్లోకి వస్తుందని తెలిపింది.
సెప్టెంబర్ 2న కేంద్రం క్రూడ్ పెట్రోలియంపై విండ్ఫాల్ టాక్స్‌ను టన్నుకు రూ.7100 నుంచి రూ.6700 కు తగ్గించింది. అయితే మరో 15 రోజులకే భారీగా పెంచడం గమనార్హం.
మరోవైపు విమాన ఇంధనంపై ప్రత్యేక అదనపు ఎక్సైజ్ డ్యూటీని(SAED)మాత్రం తగ్గిస్తున్నట్లు కేంద్రం చెప్పుకొచ్చింది. ATFపై లీటర్‌కు రూ. 4గా ఉన్న పన్నును రూ. 3.50కి తగ్గించింది.
DETAILS
2022, జులై 1న తొలిసారిగా విండ్ ఫాల్స్ టాక్స్
డీజిల్ ఎగుమతులపైనా ఎస్‌ఏఈడీ(SAED)ని కేంద్రం తగ్గించింది. గతంలో లీటర్‌కు రూ. 6గా ఉంది. తాజా నిర్ణయంతో రూ. 5.50కి పడిపోయింది.
పెట్రోల్ ఎగుమతులపై జీరో టాక్స్ వర్తిస్తుందని మరోసారి స్పష్టం చేసింది. విండ్ఫాల్ టాక్స్ విధానాన్ని తొలిసారిగా 2022, జులై 1న ప్రవేశపెట్టింది.
దేశీయంగా చమురును వెలికితీసి, ఉత్పత్తిచేసి విక్రయిస్తున్న ఆయిల్ కంపెనీలపై ఈ పన్నును కేంద్రం విధిస్తుంది.
గతేడాది రష్యా- ఉక్రెయిన్ యుద్ధం సమయంలో ముడిచమురు ధరలు ప్రపంచవ్యాప్తంగా భారీగా పెరిగాయి.
ఈ నేపథ్యంలోనే భారత ఆయిల్ కంపెనీలు విదేశాలకు పెద్ద ఎత్తున క్రూడాయిల్ ఎగుమతి చేసి లాభాలను సాధించాయి.
స్వదేశంలో విక్రయించకుండా, విదేశాలకు అమ్ముకుంటున్న కారణంగానే కేంద్రం తాజాగా అడ్డుకట్ట కట్ట వేసేందుకు విండ్ఫాల్ టాక్స్ విధిస్తోంది.
DETAILS
హైదరాబాద్ లో లీటర్ పెట్రోల్ రేట్ రూ.109.64, డీజిల్ రూ.97.80
అంతర్జాతీయ మార్కెట్‌లో ముడి చమురు రేటు భారీగా పెరిగింది. ఈ మేరకు బ్యారెల్ ముడిచమురు 90 డాలర్లుగా ఉండగా, బ్రెంట్ క్రూడ్ బ్యారెల్‌కు 93.7 డాలర్లుగా కొనసాగుతోంది.
దీంతో దేశీయంగా చమురు ఉత్పత్తి చేసే కంపెనీలకు కేంద్రం నిర్ణయం ఝలక్ ఇచ్చింది. దేశీయంగా పెట్రోల్, డీజిల్ ధరలు రికార్డు స్థాయిలోనే ఉండటం గమనార్హం.
గత మే నుంచి దేశంలో ధరలు స్థిరంగానే ఉన్నప్పటికీ, నష్టాలను పూడ్చుకునేందుకు ఆయిల్ కంపెనీలు ధరలను తగ్గించలేదు.
ఇవాళ హైదరాబాద్‌లో లీటర్ పెట్రోల్ రేటు రూ.109.64గా ఉంది. లీటర్ డీజిల్ కు రూ. 97.80 ధర పలుకుతోంది.