World Richest Families: ప్రపంచ ధనికుల కుటుంబం జాబితా విడుదల.. ముఖేష్ అంబానీ ఫ్యామిలీకి చోటు
ఈ వార్తాకథనం ఏంటి
ప్రపంచవ్యాప్తంగా అత్యంత సంపన్న కుటుంబాల జాబితా తాజాగా వెలువడింది. ప్రపంచంలోని టాప్ 25 ధనిక కుటుంబాల ర్యాంకింగ్ను బ్లూమ్బెర్గ్ ప్రకటించింది. ఈ ప్రతిష్ఠాత్మక జాబితాలో భారత్ నుంచి అంబానీ కుటుంబానికి స్థానం లభించింది. మొత్తం 25 కుటుంబాల్లో అంబానీ ఫ్యామిలీ 8వ స్థానంలో నిలిచినట్లు బ్లూమ్బెర్గ్ పేర్కొంది. అపారమైన సంపదతో పాటు ప్రపంచ ఆర్థిక వ్యవస్థపై అంబానీ కుటుంబానికి ప్రత్యేక ప్రభావం ఉందని తెలిపింది. బ్లూమ్బెర్గ్ అంచనాల ప్రకారం అంబానీ కుటుంబం నికర సంపద 105.6 బిలియన్ డాలర్లుగా ఉంది. దీంతో ప్రపంచంలో అత్యంత ప్రభావవంతమైన వ్యాపార వంశాలలో ఒకటిగా అంబానీలు గుర్తింపు పొందారు. రిలయన్స్ ఇండస్ట్రీస్ ఆధ్వర్యంలో శక్తి, పెట్రోకెమికల్స్, టెలికమ్యూనికేషన్స్ రంగాల్లో విస్తృతంగా కార్యకలాపాలు సాగిస్తున్నారు.
వివరాలు
అగ్రస్థానంలో 513.4 బిలియన్ డాలర్ల నికర విలువతో వాల్టన్ కుటుంబం
ఇదే సమయంలో డిజిటల్ సేవలు, స్థిరత్వాన్ని ఆధారంగా చేసుకున్న కొత్త వ్యాపారాల వైపు కూడా అడుగులు వేస్తున్నారని నివేదిక స్పష్టం చేసింది. అగ్రస్థానం మాత్రం అమెరికాకు చెందిన రిటైల్ దిగ్గజం వాల్మార్ట్ యజమానులైన వాల్టన్ కుటుంబానిదే. 513.4 బిలియన్ డాలర్ల నికర విలువతో ఈ కుటుంబం జాబితాలో తొలి స్థానంలో నిలిచింది. తొలిసారిగా అర ట్రిలియన్ డాలర్ల మైలురాయిని దాటిన కుటుంబంగా వాల్టన్లు రికార్డు సృష్టించారు. వాల్మార్ట్ సంస్థ గత ఆర్థిక సంవత్సరంలో 681 బిలియన్ డాలర్ల ఆదాయాన్ని నమోదు చేయగా, ప్రపంచవ్యాప్తంగా తన స్టోర్ల విస్తరణను కొనసాగిస్తోంది. ఈ ప్రత్యేక ర్యాంకింగ్లో చోటు దక్కాలంటే కనీసం 46.4 బిలియన్ డాలర్ల నికర సంపద ఉండాల్సి ఉంటుంది.
వివరాలు
నాలుగు ఖండాలకు చెందిన నాలుగు కొత్త కుటుంబాలు
అటువంటి స్థాయిలో సంపద కలిగిన కుటుంబాలనే ఈ జాబితాలోకి ఎంపిక చేశారు. 2025 సంవత్సరానికి విడుదలైన జాబితాలో నాలుగు ఖండాలకు చెందిన నాలుగు కొత్త కుటుంబాలు చేరాయి. అందులో మెక్సికోకు చెందిన లారియా మోటా వెలాస్కో కుటుంబం,ఇటలీకి చెందిన డెల్ వెచియో కుటుంబం, సౌదీ అరేబియాకు చెందిన ఒలాయన్ కుటుంబాలు ఉన్నాయి. ఇతర ప్రముఖ కుటుంబాల విషయానికి వస్తే.. అబుదాబి పాలక రాజవంశమైన అల్ నహ్యాన్ కుటుంబం కూడా జాబితాలో ఉంది. ఈ కుటుంబం నికర సంపదను సుమారు 335.9 బిలియన్ డాలర్లుగా అంచనా వేశారు. షేక్ మొహమ్మద్ బిన్ జాయెద్ అల్ నహ్యాన్ నాయకత్వంలో ఈ సంపద మరింత విస్తరిస్తోంది. ముఖ్యంగా పెట్రోలియం నిల్వల ద్వారానే వీరి ఆదాయం ఎక్కువగా వస్తోంది.
వివరాలు
అల్ థాని కుటుంబం నికర సంపదను 199.5 బిలియన్ డాలర్లు
సౌదీ అరేబియా రాజకుటుంబమైన అల్ సౌద్ కుటుంబం నికర విలువ 213.6 బిలియన్ డాలర్లుగా అంచనా. చమురు వనరులే ఈ కుటుంబ సంపదకు ప్రధాన ఆధారం. కుటుంబంలో సుమారు 15 వేల మంది సభ్యులు ఉన్నప్పటికీ, సంపద ప్రధానంగా సీనియర్ రాజకుటుంబం చేతుల్లోనే ఉంది. ముఖ్యంగా క్రౌన్ ప్రిన్స్ మొహమ్మద్ బిన్ సల్మాన్ ఆధ్వర్యంలో సంపద కేంద్రీకృతమై ఉన్నట్లు నివేదిక తెలిపింది. ఖతార్ పాలక వంశమైన అల్ థాని కుటుంబం నికర సంపదను 199.5 బిలియన్ డాలర్లుగా అంచనా వేశారు. 1940లో చమురు కనుగొనిన తర్వాత ఈ కుటుంబ సంపద వేగంగా పెరిగింది.
వివరాలు
ఈ జాబితాలో చోటు సంపాదించిన హెర్మేస్ కుటుంబం
ఇటీవల తాత్కాలిక ఎయిర్ ఫోర్స్ వన్గా ఉపయోగించుకునేందుకు అమెరికా అధ్యక్షుడు ట్రంప్కు విలాసవంతమైన బోయింగ్ 747 విమానాన్ని అల్ థాని కుటుంబం బహుకరించడం కూడా వార్తల్లో నిలిచింది. అలాగే హెర్మేస్ కుటుంబం కూడా ఈ జాబితాలో చోటు సంపాదించింది. ఆరు తరాలుగా కొనసాగుతున్న ఈ కుటుంబ వ్యాపారం నికర విలువ సుమారు 184.5 బిలియన్ డాలర్లుగా అంచనా. అల్ట్రా లగ్జరీ ఉత్పత్తులకు పేరుగాంచిన హెర్మేస్ బ్రాండ్, ముఖ్యంగా బిర్కిన్ హ్యాండ్బ్యాగ్ ప్రపంచవ్యాప్తంగా ప్రసిద్ధి చెందింది. ప్రపంచంలోని అతిపెద్ద లగ్జరీ బ్రాండ్లలో ఒకటిగా హెర్మేస్ నిలుస్తోంది.