National Film Awards 2023: ఆరు విభాగాల్లో జాతీయ అవార్డులు అందుకున్న ఆర్ఆర్ఆర్
69వ జాతీయ చలన చిత్ర పురస్కారాల ప్రకటన ఇంతకుముందే వెలువడింది. ఈ అవార్డుల్లో రాజమౌళి తెరకెక్కించిన ఆర్ఆర్ఆర్ చిత్రానికి అవార్డుల పంట పండింది. ఏకంగా ఆరు విభాగాల్లో అవార్డులు కొల్లగొట్టింది. బెస్ట్ యాక్షన్ డైరెక్షన్ అవార్డ్ (స్టంట్ కొరియోగ్రఫీ) విభాగంలో కింగ్ సోలోమన్ కు అవార్డు దక్కింది. బెస్ట్ కొరియోగ్రఫీ విభాగంలో ప్రేమ్ రక్షిత్ జాతీయ అవార్డు గ్గెలుచుకున్నాడు. బెస్ట్ స్పెషల్ ఎఫెక్ట్స్ విభాగంలో శ్రీనివాస్ మోహన్ ను అవార్డు వరించింది. బెస్ట్ మ్యూజిక్ డైరెక్టర్( నేపథ్య సంగీతం) విభాగంలో కీరవాణికి అవార్డు దక్కింది. ఉత్తమ గాయకుడిగా ఆర్ఆర్ఆర్ సినిమాలోని కొమురం భీముడో పాట పాడిన కాలభైరవ అవార్డు అందుకున్నాడు. చివరగా ఉత్తమ ప్రజాదరణ పొందిన చిత్రంగా ఆర్ఆర్ఆర్ నిలిచింది.
రాజమౌళికి దక్కని అవార్డు
69వ జాతీయ చలన చిత్ర పురస్కారాల్లో ఆరు అవార్డులు రావడం సంతోషంగానే ఉన్నా, ఆర్ఆర్ఆర్ వంటి సినిమాను ప్రేక్షకుల ముందుకు తీసుకువచ్చిన రాజమౌళికి ఉత్తమ దర్శకుడిగా అవార్డు రాకపోవడం కొంత నిరాశగా ఉందని సోషల్ మీడియాలో కామెంట్లు వస్తున్నాయి. 69వ జాతీయ చలన చిత్ర పురస్కారాల్లో ఉత్తమ దర్శకుడు పురస్కారాన్ని గోదావరి (మరాఠీ) చిత్ర దర్శకుడు నిఖిల్ మహాజన్ అందుకున్నారు. ఉత్తమ నటుడిగా పుష్ప సినిమాకు గాను అల్లు అర్జున్ జాతీయ అవార్డును అందుకున్నాడు. ఉత్తమ నటిగా గంగూభాయ్ కఠియావాడి సినిమాలోని నటనకు ఆలియా భట్ అందుకున్నారు.