గోపీచంద్ 32: అటు పాట, ఇటు యాక్షన్ పూర్తి చేసిన శ్రీనువైట్ల
వరుసగా పరాజయాలను ఎదుర్కొంటున్న గోపీచంద్ ప్రస్తుతం కన్నడ దర్శకుడు హర్ష తో భీమా అనే సినిమాలో నటిస్తున్నాడు. అలాగే వరుసగా పరాజయాలను ఎదుర్కొన్న దర్శకుడు శ్రీనువైట్ల తో మరొక సినిమా చేస్తున్నాడు. తాజాగా శ్రీనువైట్లతో చేస్తున్న సినిమా నుండి ఒకానొక అప్డేట్ బయటకు వచ్చింది. కావ్య థాపర్ హీరోయిన్ గా నటిస్తున్న ఈ సినిమా ఫస్ట్ షెడ్యూల్ చిత్రీకరణ ఇటలీలోని మిలాన్ నగరంలో జరిగింది. ఈ మేరకు చిత్ర దర్శకుడు శ్రీనువైట్ల, మిలాన్ ప్రాంతంలో షూటింగ్ చాలా బాగా జరిగిందని సోషల్ మీడియా ఖాతా ద్వారా వెల్లడి చేశారు. అంతేకాదు హీరోయిన్ కావ్య థాపర్ తో ఒకానొక పాట చిత్రీకరణ కూడా పూర్తయిందని కొరియోగ్రాఫర్ శేఖర్ మాస్టర్ తెలియజేశారు.
విశ్వం టైటిల్ ని ఎంపిక చేసే ఆలోచనలో మేకర్స్
గోపీచంద్, శ్రీనువైట్ల కాంబినేషన్లో రూపొందుతున్న ఈ సినిమాకు ఇప్పటివరకు టైటిల్ ని ఫిక్స్ చేయలేదు. ప్రస్తుతం గోపీచంద్ 32మూవీ అనే వర్కింగ్ టైటిల్ తో ఈ సినిమాను పిలుస్తున్నారు. అయితే విశ్వసనీయ వర్గాల సమాచారం ప్రకారం ఈ సినిమాకు విశ్వం అనే టైటిల్ ని ఎంపిక చేసే ఆలోచనలో మేకర్స్ ఉన్నారని తెలుస్తోంది. మరొక ఇంట్రెస్టింగ్ విషయం ఏంటంటే, శ్రీను వైట్లతో వెంకీ, దుబాయ్ శీను, ఢీ వంటి చిత్రాలకు పని చేసిన గోపీ మోహన్, గోపీచంద్ తో రూపొందిస్తున్న ఈ సినిమాకు స్క్రీన్ ప్లే ను అందిస్తున్నారు. చైతన్ భరద్వాజ్ సంగీతమందిస్తున్న ఈ సినిమాను చిత్రాలయం స్టూడియోస్ బ్యానర్ పై వేణు దోనెపూడి నిర్మిస్తున్నారు.
