బలగం దర్శకుడు వేణు ఖాతాలో స్టార్ హీరో: ఈ సారి మాస్ మసాలా గ్యారెంటీ?
ఒక్క ఛాన్స్ ఒకే ఒక్క ఛాన్స్ వస్తే ఎవరిలో ఎంత టాలెంట్ ఉందో బయటపడిపోతుంది. జబర్దస్త్ కమెడియన్ వేణుకు ఆ ఛాన్స్ బలగం ద్వారా వచ్చింది. అంతే, దాంతో తానేంటో నిరూపించుకున్నాడు. మాకు మంచి సినిమా ఇస్తే మేం దాన్ని హిట్ చేసి చూపిస్తామని రెడీగా ఉండే ప్రేక్షకులకు బలగం సినిమాను ఇచ్చాడు. బలగం చిత్రాన్ని నెత్తిన పెట్టుకున్న ప్రేక్షకులు బాహుబాలి సైజు హిట్టును అందించారు. దాంతో ప్రస్తుతం వేణు దగ్గరకు నిర్మాతలు క్యూ కడుతున్నారు. కానీ తన తర్వాత సినిమా దిల్ రాజు కాంపౌండ్ లోనే ఉంటుందని ఆల్రెడీ వేణు చెప్పేసాడు. మరి హీరో ఎవరు? అనే ప్రశ్న అందరికీ వచ్చింది. దానికి సమాధానంగా బాలకృష్ణ పేరు సోషల్ మీడియాలో తిరుగుతోంది.
బాలకృష్ణతో మాస్ మసాలా మూవీ
నందమూరి బాలకృష్ణను వేణు డైరెక్ట్ చేయబోతున్నాడని వార్తలు వస్తున్నాయి. మాస్ మసాలా సినిమాను బాలయ్యతో తెరకెక్కించనున్నాడని అంటున్నారు. ఆల్రెడీ బాలయ్యకు కథ కూడా వినిపించాడనీ, బాలయ్య ఓకే చెప్పేసాడని సోషల్ మీడియాలో చెప్పుకుంటున్నారు. మరి ఈ విషయంలో నిజం ఎంతనేది అధికారిక సమాచారం వస్తేనే తెలుస్తుంది. ఒకవేళ ఇదే నిజమైతే బలగం దర్శకుడికి మంచి అవకాశం వచ్చినట్టే. సెన్సిబుల్ చిత్రాన్ని అందించిన వేణు నుండి మాస్ సినిమాను ఎక్స్ పెక్ట్ చేయవచ్చు. అదలా ఉంచితే, ప్రస్తుతం అనిల్ రావిపూడి దర్శకత్వంలో సినిమా చేస్తున్నాడు బాలయ్య. దసరా కానుకగా రిలీజ్ అవుతున్న ఈ చిత్రంలో కాజల్ అగర్వాల్ హీరోయిన్ గా కనిపిస్తుంది.
