భోళాశంకర్: చిరంజీవి వాయిదా వేసుకోకక తప్పదా?
ప్రస్తుతం మెగాస్టార్ చిరంజీవి మంచి జోష్ లో ఉన్నారు. సంక్రాంతి కానుకగా వచ్చిన వాల్తేరు వీరయ్య విజయం అందుకుని కలెక్షన్ల సునామీని సృష్టిస్తోంది. ఆచార్య, గాడ్ ఫాదర్ మిగిల్చిన నిరాశను పక్కకు నెట్టి వాల్తేరు వీరయ్య మంచి విజయాన్ని అందుకుంది.. విమర్శకుల నుండి మొదటిరోజు వచ్చిన ప్రతికూల స్పందన ఈ సినిమా మీద పెద్దగా పనిచేయలేదు. మాస్ సినిమాను చూసే దృష్టికోణం ప్రజల్లో మారిందనీ, విమర్శకుల్లో మార్పు రావాలని, లేదంటే విమర్శలను పట్టించుకునే అవకాశం ఉండదని సోషల్ మీడియాలో కామెంట్లు వచ్చాయి. ఏది ఎలా ఉన్నా వాల్తేరు వీరయ్య మాత్రం ఆగట్లేదు. దూసుకుపోతూనే ఉన్నాడు. ఐతే ఈ సినిమా తర్వాత చిరంజీవి నుండి భోళాశంకర్ అనే చిత్రం వస్తోంది.
రిలీజ్ ని వాయిదా వేసే పనిలో భోళాశంకర్ చిత్రబృందం
మెహెర్ రమేష్ దర్శకత్వంలో రూపొందుతున్న ఈ సినిమా షూటింగ్ ఎప్పుడో మొదలైంది. నిజానికి ఈ పాటికి పూర్తి కావాల్సింది. కానీ ఇంకా చిత్రీకరణ జరుగుతూనే ఉంది. మొన్నటికి మొన్న కొత్త షెడ్యూల్ ప్రారంభమైంది. అది పూర్తి కావాలంటే చాలా టైమ్ పట్టేలా ఉంది. ఈ నేపథ్యంలో భోళాశంకర్ చిత్రం అనుకున్న తేదీకి రిలీజ్ అయ్యే అవకాశాలు కనిపించట్లేదు. 14 ఏప్రిల్ 2023 రోజున సినిమాను రిలీజ్ చేస్తామని చిత్రబృందం ప్రకటించింది. కానీ ఆలోపు షూటింగ్ పూర్తయ్యి, పోస్ట్ ప్రొడక్షన్ పనులు పూర్తి కావాలంటే కష్టమని వినిపిస్తోంది. అందుకే నెలరోజులు వాయిదా వేసుకుని మే నెలలో సినిమాని తీసుకురావాలని ప్లాన్ చేస్తున్నట్లు సమాచారం. ఏకే ఎంటర్ టైన్ మెంట్స్, క్రియేటివ్ కమర్షియల్స్ సంయుక్తంగా నిర్మిస్తున్నాయి.
