Chiranjeevi: డీప్‌ ఫేక్‌, సైబర్ నేరాలపై చట్టం అవసరం: చిరంజీవి
ఈ వార్తాకథనం ఏంటి
తెలంగాణ పోలీసుల ఆధ్వర్యంలో నిర్వహించిన ఏక్తా దివస్ కార్యక్రమంలో నటుడు చిరంజీవి పాల్గొన్నారు. ఈ సందర్భంగా ఆయన మాట్లాడుతూ, దేశ ఐక్యతకు మార్గదర్శకుడైన సర్దార్ వల్లభ్‌భాయ్ పటేల్‌ వంటి మహనీయుల జీవితం ప్రతి ఒక్కరికీ ప్రేరణగా నిలవాలని పిలుపునిచ్చారు. తెలంగాణ పోలీస్ వ్యవస్థ దేశంలో అత్యంత బలమైనదిగా ఉందని ఆయన ప్రశంసించారు. ప్రజల భద్రత కోసం పోలీసులు అండగా నిలుస్తున్నారని, అందువల్ల ప్రజలు ధైర్యంగా ఉండాలని చిరంజీవి అన్నారు.
వివరాలు
టెక్నాలజీని సమాజ హితానికి ఉపయోగించుకోవాలి: చిరంజీవి
ఇటీవల విస్తరిస్తున్న డీప్‌ ఫేక్‌ వీడియోలు,సైబర్ నేరాలు గురించి ఆయన స్పందిస్తూ, "డీప్‌ ఫేక్‌ సమస్యను ఇప్పటికే పోలీసుల దృష్టికి తీసుకెళ్లాను. డీజీపీ, సీపీ సజ్జనార్ దీన్ని అత్యంత సీరియస్‌గా పరిగణిస్తున్నారు. ఎవరూ ఈ రకమైన సైబర్ నేరాల వల్ల భయపడవలసిన అవసరం లేదు. ఈ అంశంపై ప్రత్యేక చట్టం తీసుకురావడానికి ప్రయత్నాలు జరుగుతున్నాయి. సాధారణ ప్రజలు కూడా ఇలాంటి మోసాల నుండి రక్షణ పొందేలా చర్యలు తీసుకుంటున్నారు. టెక్నాలజీని సమాజ హితానికి ఉపయోగించుకోవాలి. పోలీసుల విధానం ఇప్పుడు ప్రజలకు స్నేహపూర్వకంగా మారింది. కాబట్టి ఎవరూ భయపడకూడదు." అని తెలిపారు.
వివరాలు
హైదరాబాద్ నగర ప్రజలకు ఎల్లప్పుడూ సేవ చేయడానికి సిద్ధంగా ఉన్నాం: సీపీ సజ్జనార్
ఈ కార్యక్రమంలో పాల్గొన్న డీజీపీ శివధర్ రెడ్డి మాట్లాడుతూ, రాష్ట్రంలో శాంతిభద్రతల పరిరక్షణ కోసం పోలీసులు నిరంతరం కృషి చేస్తున్నారని పేర్కొన్నారు. హైదరాబాద్ నగర ప్రజలకు ఎల్లప్పుడూ సేవ చేయడానికి సిద్ధంగా ఉన్నామని సీపీ సజ్జనార్ తెలిపారు. ఆయన, ఏక్తా దివస్ స్ఫూర్తిని అందరం కలసి కొనసాగించాలని పిలుపునిచ్చారు.