Sushmita Sen: ఐశ్వర్య రాయ్‌తో పోటీనా? భయపడి వెనక్కి తగ్గాలనుకున్న సుస్మితా సేన్.. ఆ తర్వాత ఏం జరిగిందంటే?
ఈ వార్తాకథనం ఏంటి
భారత్ తరఫున తొలిసారి మిస్ యూనివర్స్ కిరీటాన్ని గెలుచుకుని చరిత్ర సృష్టించిన నటి సుస్మితా సేన్.. కెరీర్ తొలినాళ్లలో తీవ్రమైన ఆత్మన్యూనతకు గురయ్యారట. అందాల పోటీల్లో ఐశ్వర్య రాయ్ కూడా పాల్గొంటున్నారని తెలిసి, పోటీ నుంచి తప్పుకోవాలని నిర్ణయించుకున్నారట. ఈ ఆసక్తికర విషయాన్ని గతంలో ఓ ఇంటర్వ్యూలో సుస్మిత వెల్లడించారు. తాజాగా ఈ సంఘటన మరోసారి సోషల్ మీడియాలో వైరల్ అవుతోంది.
వివరాలు
ఐశ్వర్య రాయ్ పేరు విని వెనక్కి తగ్గిన సుస్మిత
మిస్ ఇండియా పోటీల కోసం దరఖాస్తు చేసేందుకు వెళ్లిన సమయంలో ఐశ్వర్య రాయ్ కూడా అదే పోటీలో పాల్గొంటున్నారని సుస్మితకు తెలిసింది.
అప్పటికే ఐశ్వర్య అందం గురించి దేశవ్యాప్తంగా చర్చ జరుగుతోంది. ఆమె పోటీలో ఉందని తెలిసి ఏకంగా 25 మంది అమ్మాయిలు తమ దరఖాస్తులను వెనక్కి తీసుకున్నారని నిర్వాహకులు సుస్మితకు చెప్పారట.
దీంతో ఆమె కూడా భయపడి పోటీ నుంచి వైదొలగాలని నిర్ణయించుకున్నారు. ఇంటికి వెళ్లిపోయి ఈ విషయాన్ని తల్లికి చెప్పారు.
వివరాలు
తల్లి మాటలతో మారిన నిర్ణయం
అయితే, సుస్మిత నిర్ణయంపై ఆమె తల్లి తీవ్రంగా మందలించారట.
"ప్రయత్నం చేయకుండానే ఓటమిని అంగీకరిస్తావా? ఆమె ప్రపంచంలోనే అత్యంత అందగత్తె అని నువ్వు భావిస్తే, ఆమె చేతిలోనే ఓడిపో.
అంతేకానీ వేరొకరి చేతిలో ఓటమి పాలవడం ఎందుకు? వెళ్లి నీ శక్తిమేర ప్రయత్నించు" అని తల్లి గట్టిగా చెప్పినట్లు సుస్మిత గుర్తుచేసుకున్నారు.
తల్లి మాటలతో స్ఫూర్తి పొందిన సుస్మిత పోటీలో కొనసాగి మిస్ ఇండియా టైటిల్‌ను గెలుచుకున్నారు.
ఆ తర్వాత మిస్ యూనివర్స్ కిరీటాన్ని సొంతం చేసుకుని ప్రపంచవ్యాప్తంగా గుర్తింపు పొందారు. అదే ఏడాది ఐశ్వర్య రాయ్ మిస్ వరల్డ్ విజేతగా నిలిచి దేశానికి గర్వకారణంగా నిలిచారు.
వివరాలు
నటిగా ప్రత్యేక గుర్తింపు
మిస్ యూనివర్స్ విజయం తర్వాత సుస్మితా సేన్ నటిగా కూడా తనదైన ముద్ర వేశారు.
'బీవీ నెం.1', 'మై హూ నా' వంటి చిత్రాలతో పాటు 'ఆర్య', 'తాలీ' వంటి వెబ్ సిరీస్‌లలో నటించి ప్రేక్షకులకు మరింత చేరువయ్యారు.
అందాల పోటీల్లో ఓటమి భయంతో వెనక్కి తగ్గాలనుకున్న ఆమె.. తల్లి ఇచ్చిన ధైర్యంతో అంతర్జాతీయ స్థాయిలో విజేతగా నిలిచిన తీరు ఇప్పుడు మరోసారి చర్చనీయాంశంగా మారింది.