Actor Ali: అనుమతి లేకుండా ఫామ్ హౌస్ నిర్మాణం.. చిక్కుల్లో సినీ నటుడు ఆలీ
సినీ నటుడు అలీ వికారాబాద్‌ జిల్లా నవాబుపేట్ మండలంలోని ఎక్మామిడి గ్రామంలో నిర్మించుకున్న ఫామ్ హౌస్ ఇప్పుడు వివాదాస్పదమైంది. గ్రామ పంచాయతీ నుండి అనుమతి తీసుకోకుండా అక్రమ నిర్మాణాలు చేపట్టారనే ఆరోపణలపై గ్రామ కార్యదర్శి శోభారాణి అలీకి నోటీసులు పంపింది. అలీ ఎక్మామిడి గ్రామంలో కొంత వ్యవసాయ భూమిని కొనుగోలు చేసి, పండ్ల తోటలు, పంటల సాగు చేపట్టారు. ఈ వ్యవసాయ భూమిలోనే ఫామ్ హౌస్ నిర్మాణం చేపట్టారని, అందుకు పంచాయతీ అనుమతి లేదని గ్రామ అధికారులు తెలిపారు. ఫామ్ హౌస్‌లో చేపట్టిన నిర్మాణాలపై వివరణ ఇవ్వాలని నోటీసుల్లో స్పష్టంగా పేర్కొన్నారు. ఈ నోటీసులను ఫామ్ హౌస్ నిర్వహణ చూసే వ్యక్తికి అందజేశారు.
స్పందించని ఆలీ
ఫామ్ హౌస్ నిర్మాణంలో అనుమతుల కోసం సంబంధిత అధికారులను సంప్రదించకపోవడం ప్రధాన సమస్యగా నిలిచింది. ఇదే విషయంపై నోటీసులు పంపించడం చర్చనీయాంశమైంది. ఈ నోటీసులపై అలీ ఇంకా స్పందించాల్సి ఉంది. గ్రామ పంచాయతీ నోటీసులు పంపిన తరువాత ఆయన ఏ చర్యలు తీసుకుంటారో తెలియాల్సి ఉంది. హైదరాబాద్ శివారులో ఫామ్ హౌస్‌లను కలిగి ఉండటం టాలీవుడ్‌ ప్రముఖులలో సాధారణ విషయంగా మారింది. వీటిని కుటుంబంతో కలిసి విశ్రాంతి కోసం మాత్రమే కాకుండా, పార్టీలు నిర్వహించేందుకు కూడా ఉపయోగిస్తున్నారు. అలీ వ్యవహారం, ఈ తరహా నిర్మాణాల చట్టబద్ధతపై మరింత చర్చలకు దారితీస్తోంది.
