పాన్ ఇండియా రేంజ్ లో విడుదలవుతున్న షారుక్ ఖాన్ డీడీఎల్జే
భారతీయ సినిమా చరిత్రలో మరపురాని చిత్రంగా నిలిచిన దిల్ వాలే దుల్హనియా లేజాయేంగే మూవీ, దేశవ్యాప్తంగా థియేటర్లలో విడుదలకు మళ్ళీ సిద్ధం అవుతోంది. షారుక్ ఖాన్, కాజోల్ జంటగా నటించిన డీడీఎల్జే, అప్పట్లో పెద్ద సంచలనం సృష్టించింది. ప్రస్తుతం ఈ సినిమా, ఫిబ్రవరి 10వ తేదీ నుండి వారం రోజుల పాటు థియేటర్లలో సందడి చేయనుంది. ఈ మేరకు యష్ రాజ్ ఫిలిమ్స్ ప్రకటించింది. ముంబై, పూనా, హైదరాబాద్, బెంగళూరు, చెన్నై, అహమ్మదాబాద్.. ఇలా మొత్తం 37నగరాల్లో థియేటర్లల ప్రదర్శితం కానుంది డీడీఎల్జే. యష్ రాజ్ ఫిలిమ్స్ డిస్ట్రిబ్యూషన్ వైస్ ప్రెసిడెంట్ రోహన్ మల్హోత్రా మాట్లాడుతూ, డీడీఎల్జే మూవీని మళ్ళీ మళ్ళీ విడుదల చేయాలని అభిమానులు పదే పదే కోరుకున్నారని అన్నారు.
అటు పఠాన్, ఇటు డీడీఎల్జే
1995లో రిలీజైన డిడీఎల్జే, ఎక్కువ రోజులు థియేటర్లలో ఆడిన చిత్రంగా రికార్డుల్లో నిలిచింది. ముంబైలోని మరాఠా మందిర్ థియేటర్లో కొన్నేళ్ళ పాటు నడిచింది. ప్రస్తుతం, ఈరోజు నుండి మరో వారం రోజుల పాటు అన్ని ప్రముఖ నగరాల్లోని థియేటర్లలో డీడీఎల్జే కనిపించనుంది. ఇక్కడ విశేషం ఏమిటంటే, అటు పఠాన్ మూవీ, దుమ్ముదులిపే కలెక్షన్లతో దూసుకుపోతుంటే ఇటు డీడీఎల్జే, థియేటర్లలోకి మళ్ళీ రావడం. దీంతో షారుక్ అభిమానులు సూపర్ హ్యాపీగా ఉన్నారు. చాలారోజులుగా షారుక్ ఖాన్ మూవీ కోసం ఎదురుచూస్తున్న వాళ్ళకు అటు పఠాన్ ఆకలి తీరిస్తే, ఇటు డీడీఎల్జే.. మనసుకు తృప్తినిచ్చిందని చెప్పుకుంటున్నారు. యష్ రాజ్ ఫిల్మ్స్ బ్యానర్ లో రూపొందిన డీడీఎల్జే మూవీలో షారుక్ ఖాన్ సరసన కాజోల్ నటించింది.
ఈ టైమ్ లైన్ ని షేర్ చేయండి