Devi Shri Prasad : దేవి-మైత్రీ వివాదం.. క్లారిటీ ఇచ్చిన నిర్మాత రవి
స్టైలిష్ స్టార్ అల్లు అర్జున్ హీరోగా, సుకుమార్ దర్శకత్వంలో తెరకెక్కుతున్న పుష్ప-2 సినిమాపై క్రేజ్ రోజురోజుకూ పెరుగుతోంది. మైత్రీ మూవీస్ బ్యానర్‌పై నవీన్ ఎర్నేని, రవిశంకర్ యలమంచిలి నిర్మిస్తున్న ఈ భారీ బడ్జెట్ చిత్రానికి దేవి శ్రీ ప్రసాద్ సంగీతం అందిస్తున్నారు. ఇటీవల చెన్నైలో జరిగిన ప్రీ-రిలీజ్ ఈవెంట్‌లో దేవిశ్రీ ప్రసాద్ చేసిన వ్యాఖ్యలు టాలీవుడ్‌లో చర్చనీయాంశమయ్యాయి. మనకు కావలసినది అడగాలని, అది నిర్మాతల దగ్గర నుండి వచ్చే పేమెంట్ అయినా సరే లేదా స్క్రీన్ మీద వచ్చే క్రెడిట్ అయినా సరే అని వ్యాఖ్యానించాడు. ముఖ్యంగా మైత్రీ నిర్మాత రవిని ఉద్దేశిస్తూ లేట్ అని అనవద్దు అని, ప్రతీదీ లేట్ అని ట్యాగ్ చేయడం మంచిది కాదని చెప్పాడు.
దేవి మాటల్లో తప్పు లేదు
దీంతో దేవి ప్రసాద్, మైత్రీ నిర్మాతల మధ్య విబేధాలు ఉన్నాయంటూ పుకార్లు వినిపించాయి. ఇకపై మైత్రీ బ్యానర్ నుంచి దేవికి అవకాశాలు రావంటూ కొన్ని వర్గాలు పేర్కొన్నాయి. తాజాగా మైత్రీ మూవీ మేకర్స్ నితిన్ హీరోగా నిర్మిస్తున్న 'రాబిన్ హుడ్' ప్రెస్ మీట్ సందర్భంగా, నిర్మాత రవి ఈ అంశంపై క్లారిటీ ఇచ్చారు. దేవి మాటల్లో ఎటువంటి తప్పు లేదని, ప్రొడ్యూసర్‌లకు నా మీద లవ్ కూడా ఉంటుందని, కంప్లైంట్స్ కూడా ఉంటాయని, అయితే ఈ మధ్య ఎక్కువగా విన్పిస్తున్నాయని చెప్పారు. అంతేకాకుండా తమకు దేవితో ఎటువంటి సమస్య లేదని, భవిష్యత్తులో దేవి ప్రసాద్‌తో కలిసి తాము మరిన్ని సినిమాలు చేస్తామని రవి పేర్కొన్నారు. దీంతో ఈ వివాదానికి పుల్‌స్టాప్ పడింది.
