RC17 : చరణ్ - సుకుమార్ కాంబోలో ట్విస్ట్.. దేవిశ్రీకి గుడ్బై చెప్పారా?
ఈ వార్తాకథనం ఏంటి
మెగా పవర్ స్టార్ రామ్ చరణ్ , క్రియేటివ్ దర్శకుడు సుకుమార్ కలిసి రూపొందిస్తున్న భారీ ప్రాజెక్ట్ 'RC17'పై ఇప్పటికే భారీ అంచనాలు నెలకొన్నాయి. 'రంగస్థలం' వంటి ఘన విజయానంతరం వీరి కలయికలో వస్తున్న ఈ చిత్రం గురించి ఏ చిన్న సమాచారం వచ్చినా సామాజిక మాధ్యమాల్లో విపరీతమైన చర్చకు దారి తీస్తోంది. ఈ నేపథ్యంలో ఈ చిత్రానికి సంగీత దర్శకుడి విషయంలో ఒక ముఖ్యమైన మార్పు జరగబోతుందనే వార్తలు సినీ వర్గాల్లో వినిపిస్తున్నాయి.
వివరాలు
సుక్కూ చూపు..ఆయన వైపు..
సుకుమార్ తెరకెక్కించే చిత్రాలకు దేవిశ్రీ ప్రసాద్ సంగీతం అందించడం ఆనవాయితీగా మారింది. 'ఆర్య' నుండి 'పుష్ప 2' వరకు ఆయనతోనే సుకుమార్ కలిసి పనిచేశారు. అయితే తాజా సమాచారం ప్రకారం 'RC17' ప్రాజెక్ట్ నుంచి దేవిశ్రీ ప్రసాద్ తప్పుకున్నారని తెలుస్తోంది. ఇందుకు గల కారణాలు ఇంకా స్పష్టంగా తెలియకపోయినా, ఈసారి కొత్త సంగీత శైలిని పరిచయం చేయాలనే ఆలోచనలో సుకుమార్ ఉన్నట్లు సమాచారం. ఇటీవల బాలీవుడ్లో విడుదలైన స్పై యాక్షన్ థ్రిల్లర్ 'ధురంధర్'కు అద్భుతమైన సంగీతం అందించిన సంగీత దర్శకుడు శాశ్వత్ సచ్దేవ్ పేరు పరిశీలనలో ఉన్నట్లు వార్తలు వినిపిస్తున్నాయి. ఆ చిత్రానికి ఆయన అందించిన పాటలు, నేపథ్య సంగీతం అంతర్జాతీయ స్థాయిలో ప్రశంసలు అందుకున్నాయి.
వివరాలు
ఆ మ్యూజిక్ డైరెక్టర్ ఫిక్స్ అవుతాడా?
'ఉరి: ద సర్జికల్ స్ట్రైక్' వంటి చిత్రాలతో తన ప్రతిభను నిరూపించుకున్న శాశ్వత్, 'ధురంధర్' ద్వారా మరింత విశేష గుర్తింపు సంపాదించారు. ఆయన ప్రత్యేకమైన సంగీత శైలి ప్రస్తుతం కొత్త ధోరణిగా నిలుస్తోంది. ఇలాంటి ప్రతిభావంతుడు 'RC17' వంటి భారీ చిత్రానికి పని చేస్తే అది మరింత ప్రత్యేకంగా మారుతుందనే అభిప్రాయం అభిమానుల్లో వ్యక్తమవుతోంది. ఈ ఆసక్తికరమైన కలయిక నిజంగా సాకారం అవుతుందా లేదా అనేది చూడాల్సి ఉంది.