రామబాణం: నాలుగు నెలల తర్వాత ఓటీటీలో విడుదలవుతున్న గోపీచంద్ సినిమా
ఈ మధ్యకాలంలో థియేటర్లో రిలీజైన నెల రోజుల్లోపే సినిమాలన్నీ ఓటీటీలో దర్శనమిస్తున్నాయి. ఎంత పెద్ద సినిమాలైనా సరే నెల రోజుల కంటే ఎక్కువ టైం తీసుకోవట్లేదు. అయితే దీనికి భిన్నంగా గోపీచంద్ హీరోగా వచ్చిన రామబాణం మాత్రం ఓటీటీలో రావడానికి నాలుగు నెలల టైం తీసుకుంది. 2023 మే 5వ తేదీన గోపీచంద్ హీరోగా నటించిన రామబాణం ప్రేక్షకుల ముందుకు వచ్చింది. శ్రీవాస్ దర్శకత్వంలో రూపొందిన ఈ సినిమాలో డింపుల్ హయాతి హీరోయిన్ గా కనిపించింది. గోపీచంద్, శ్రీవాస్ కాంబినేషన్లో అంతకుముందు తెరికెక్కిన లక్ష్యం, లౌక్యం చిత్రాలు సూపర్ హిట్ అందుకున్నాయి. కానీ రామబాణం మాత్రం ప్రేక్షకులను ఆకట్టుకోలేక బాక్సాఫీసు వద్ద చతికిల పడింది.
సెప్టెంబర్ 14నుండి స్ట్రీమింగ్ కానున్న రామబాణం
థియేటర్లలో పెద్దగా ఆకర్షించని రామబాణం ప్రస్తుతం ఓటీటీ విడుదలకు సిద్ధమవుతోంది. థియేటర్లలో రిలీజ్ అయిన 4 నెలల తర్వాత ఓటీటీలో దర్శనమిస్తోంది. సెప్టెంబర్ 14వ తేదీ నుండి నెట్ ఫ్లిక్స్ ఫ్లాట్ ఫామ్ లో తెలుగు, తమిళం, కన్నడ, మలయాళం భాషల్లో అందుబాటులో ఉండనుంది. థియేటర్లలో రామబాణం సినిమాను మిస్ అయిన వారు ఓటీటీలో చూసేయవచ్చు. అదలా ఉంచితే, ప్రస్తుతం గోపీచంద్ కన్నడ దర్శకుడు హర్షతో భీమా అనే సినిమాలో నటిస్తున్నాడు. ఇప్పటివరకు ఈ సినిమా నుండి టైటిల్ పోస్టర్ రిలీజైంది. ఈ సినిమాలో పవర్ ఫుల్ పోలీస్ ఆఫీసర్ గా గోపీచంద్ కనిపించబోతున్నాడు.
