Happy birthday Nagarjuna: అమ్మాయిలకు మన్మధుఢు, అభిమానులకు కింగ్ నాగార్జున పుట్టినరోజు ప్రత్యేక కథనం
ఈ వార్తాకథనం ఏంటి
ఆయన అడుగేస్తే మాస్, ఆయన కన్ను కొడితే క్లాస్, అమ్మాయిలకు మన్మధుడు, అభిమానులకు కింగ్.
నిన్నే పెళ్లాడతా అంటూ ప్రేక్షకులను ప్రేమ మైకంలో ముంచడంలోనూ, అన్నమయ్యగా భక్తి పారవశ్యంలో మైమరిపించేలా చేయడంలో ఆయన సిద్ధ హస్తుడు.
ఆయనే కింగ్ నాగార్జున. 2023 ఆగస్టు 29వ తేదీన 64వ పుట్టినరోజును జరుపుకుంటున్నారు నాగార్జున. ఈ సందర్భంగా ప్రత్యేక కథనం.
నాగార్జున తన 8నెలల వయసులోనే అక్కినేని నాగేశ్వర్ రావు నటించిన వెలుగు నీడలు సినిమాలో పసిబాలుడిగా తెరమీద కనిపించారు. ఆ తర్వాత 1967లో సుడిగుండాలు చిత్రంలో బాలనటుడిగా నటించారు.
Details
నాగార్జున మొట్టమొదటి హిందీ చిత్రం
1986లో హీరోగా విక్రమ్ సినిమాతో తెలుగు సినిమాలోకి ఎంట్రీ ఇచ్చాడు. హిందీలో విజయం సాధించిన హీరో సినిమాకు రీమేక్ గా విక్రమ్ తెరకెక్కింది. విక్రమ్ సినిమా మంచి విజయం అందుకుంది.
ఆ తర్వాత వరుసగా సినిమాలు చేసారు నాగార్జున. 1989లో ఆయన నటించిన శివ చిత్రం తెలుగు సినిమా రూపురేఖలను పూర్తిగా మార్చేసింది. శివ సినిమాను హిందీలో కూడా నాగార్జున హీరోగా రీమేక్ చేసారు. నాగార్జునకు ఇదే మొట్టమొదటి హిందీ చిత్రం.
నాగార్జున కెరీర్లో అన్నమయ్య సినిమా ఎంతో ప్రత్యేకంగా నిలుస్తుంది. నిన్నే పెళ్లాడతా వంటి రొమాంటిక్ సినిమా తర్వాత అన్నమయ్య సినిమా చేయడం అప్పట్లో సంచలనంగా మారింది.
ఈ సినిమాలో నాగార్జున నటనకు జాతీయ అవార్డు రావాల్సి ఉండేదని చాలామంది చెబుతుంటారు.
Details
భక్తుడిగా నాగార్జున నటనకు ప్రేక్షకుల నీరాజనం
దేవుడి పాత్రల్లో నాగార్జున కనిపించిన సినిమాలు ప్రేక్షకులను పెద్దగా అలరించలేదు. కానీ భక్తుడిగా చేసిన అన్నమయ్య, శ్రీరామదాసు చిత్రాలు ప్రేక్షకులను అమితంగా ఆకర్షించాయి.
హీరోగానే కాకుండా ప్రొడ్యూసర్ గానూ నాగార్జున సినిమాలు తెరకెక్కించారు. చిన్న సినిమాలను కూడా అన్నపూర్ణ స్టూడియోస్ బ్యానర్ లో అందిస్తుంటారు. ఉయ్యాలా జంపాలా, నిర్మలా కాన్వెంట్, రంగుల రాట్నం చిత్రాలు అలా వచ్చినవే.
సినిమాల్లో బిజీగా ఉండే అక్కినేని హీరో, టెలివిజన్ లోనూ తనదైన సత్తా చూపించారు. ఆయన హోస్ట్ గా వ్యవహరించిన మీలో ఎవరు కోటీశ్వరుడు ఎంత పెద్ద విజయం అందుకుందో అందరికీ తెలిసిందే.
Details
నాగార్జున పాడిన పాటలు
అలాగే బిగ్ బాస్ రియాల్టీ షో మూడవ సీజన్ నుండి వరుసగా హోస్ట్ గా వ్యవహరిస్తూనే ఉన్నారు. ఇప్పుడు కూడా బిగ్ బాస్ 7 సీజన్ కి హోస్ట్ గా వ్యవహరించనున్నారు.
మరో ముఖ్యమైన విషయం ఏంటంటే, అన్నపూర్ణ స్టూడియోస్ నిర్మాణంలో సీరియల్స్ కూడా రూపొందించారు.
మా టీవీలో ప్రసారమయ్యే యువ సీరియల్ లో తాను అతిథిగా నటించారు కూడా. అంతేకాదు, సినిమాల్లో నాగార్జున పాటలు కూడా పాడారు.
శిరిడి సాయి చిత్రంలో ఒక్కడే దేవుడు, నిర్మలా కాన్వెంట్ చిత్రంలో కొత్త కొత్త భాష, సోగ్గాడే చిన్ని నాయనా సినిమాలో డిక్క డుం డుం, బంగార్రాజు చిత్రంలో లడ్డుండా పాటల్లో తన గొంతును వినిపించారు.