హాయ్ నాన్న మ్యూజికల్ అప్డేట్: మొదటి పాట ఎప్పుడు రిలీజ్ అవుతుందంటే?
కొత్త దర్శకులను ప్రోత్సహించడంలో నేచురల్ స్టార్ నాని ఎప్పుడూ ముందుంటారు. కొత్త దర్శకుడు శ్రీకాంత్ తో తెరకెక్కించిన దసరా సినిమా ఎంత పెద్ద బ్లాక్ బస్టర్ అయ్యిందో తెలిసిందే. ప్రస్తుతం మరో మారు కొత్త దర్శకుడు శౌర్యువ్ తో హాయ్ నాన్న అనే సినిమా చేస్తున్నాడు నాని. మృణాల్ ఠాకూర్ హీరోయిన్ గా కనిపిస్తున్న ఈ సినిమా నుండి మ్యూజికల్ అప్డేట్ వచ్చింది. ప్యాన్ ఇండియా రేంజ్ లో రూపొందుతున్న ఈ సినిమా నుండి మొదటి పాటను సెప్టెంబర్ 16వ తేదీన రిలీజ్ చేయబోతున్నట్టు మేకర్స్ ప్రకటించారు. తెలుగు, తమిళం, కన్నడ, మలయాళం, హిందీ భాషల్లో ఈ పాటను రిలీజ్ చేస్తున్నారు.
హేషమ్ అబ్దుల్ వాహెబ్ సంగీతం లోంచి వస్తున్న పాట
సమయమా అంటూ సాగే ఈ పాటకు మలయాళీ సంగీత దర్శకుడు హేషమ్ అబ్దుల్ వాహెబ్ స్వరాలు సమకూర్చారు. ఈ పాట, ప్రేక్షకులను ఎప్పటికీ వదిలిపెట్టలేని మెలోడీగా ఉండిపోతుందని మేకర్స్ అన్నారు. మరో ఆసక్తికరమైన విషయం ఏంటంటే, పాట విడుదలవుతుందని తెలియజేయడానికి రిలీజ్ చేసిన పోస్టర్ చాలా ఇంట్రెస్టింగ్ గా ఉంది. రెండు చేతులను గాల్లోకి లేపి ప్రపంచమంతా నాదే అన్నట్టుగా కనిపిస్తున్న నాని ఫోటో ప్రేక్షకులను ఆకట్టుకుంటోంది. వైరా ఎంటర్ టైన్మెంట్స్ బ్యానర్లో రూపొందుతున్న హాయ్ నాన్న సినిమాను మోహన్ చెరుకూరి, కేఎస్ మూర్తి, డాక్టర్ విజేందర్ రెడ్డి తీగల నిర్మిస్తున్నారు. డిసెంబర్ 21వ తేదీన ఈ సినిమాను విడుదల చేస్తున్నారు.
