Jani Master: తెలుగు చిత్ర పరిశ్రమకు జానీ మాస్టర్ బహిరంగ విజ్ఞప్తి.. యూనియన్లో అవినీతిపై తీవ్ర ఆరోపణలు
ఈ వార్తాకథనం ఏంటి
ప్రముఖ కొరియోగ్రాఫర్ జానీ మాస్టర్ తెలుగు ఫిల్మ్ అండ్ టీవీ డ్యాన్సర్స్ అండ్ డ్యాన్స్ డైరెక్టర్స్ అసోసియేషన్ (TFTDDA)లో జరుగుతున్న పరిణామాలపై తీవ్ర ఆందోళన వ్యక్తం చేశారు. యూనియన్లో చోటుచేసుకున్న అవినీతిని అరికట్టేందుకు చర్యలు తీసుకుంటున్న సమయంలో, తప్పు చేసిన వారిని రక్షించాలంటూ తనపై ఒత్తిడి తీసుకువస్తున్నారని ఆరోపిస్తూ తెలుగు చిత్ర పరిశ్రమ నిర్మాతలకు బహిరంగ లేఖ రాశారు. జూలై 17 తేదీతో సిద్ధం చేసిన ఈ లేఖను ఆయన తన 'ఎక్స్' (మాజీ ట్విట్టర్) ఖాతా ద్వారా ప్రజలకు అందుబాటులోకి తీసుకొచ్చారు. ఒక నిర్మాత సినిమా నిర్మించేందుకు ఎంతో శ్రమతో పాటు భారీ పెట్టుబడి పెడతారని, ఆ ఒక్క సినిమాపైనే అనేక కుటుంబాల జీవనోపాధి ఆధారపడి ఉంటుందని జానీ మాస్టర్ పేర్కొన్నారు.
వివరాలు
ఎదగడానికి నిర్మాతలే ప్రధాన కారణం..
అలాంటి నిర్మాతలు అవినీతిని అరికట్టే ప్రయత్నాలకు మద్దతు ఇవ్వాల్సిన సమయంలో, నిందితులను కాపాడేలా ఒత్తిళ్లు రావడం బాధాకరమని వ్యాఖ్యానించారు.
తాను ఎప్పటికీ న్యాయం, నిజాయితీ పక్షాన నిలబడతానని స్పష్టం చేశారు.
సినీ కార్మికుడిగా తన జీవితంలో ఎదగడానికి నిర్మాతలే ప్రధాన కారణమని జానీ మాస్టర్ తెలిపారు.
చిన్న నిర్మాత, పెద్ద నిర్మాత అనే తేడా లేకుండా ప్రతి నిర్మాతను తాము దైవసమానులుగా భావిస్తామని, వారు ఎల్లప్పుడూ సంతోషంగా, క్షేమంగా ఉండాలని కోరుకుంటున్నామని పేర్కొన్నారు.
నిర్మాతలు తమతో పాటు మరెందరికో ఉపాధి కల్పించే వ్యక్తులని ఆయన కొనియాడారు.
డ్యాన్సర్లకు నిర్మాతలు అందించే నగదు పారితోషికంలో కొందరు ప్రోగ్రామ్ ఇన్ఛార్జ్లు అక్రమాలకు పాల్పడుతున్నారని జానీ మాస్టర్ ఆరోపించారు.
వివరాలు
నిధుల వినియోగంపై జానీ మాస్టర్, శేఖర్ మాస్టర్ వర్గాల మధ్య విభేదాలు..
అలాంటి వారిపై చర్యలు ప్రారంభించగానే ఫెడరేషన్ అడ్డంకులు సృష్టిస్తోందని చెప్పారు.
తప్పు చేసిన వారిని కాపాడే ప్రయత్నంలో భాగంగా వారిపై చర్యలు తీసుకోకుండా ఫెడరేషన్ పెద్దలు సహకరిస్తున్నారని ఆయన ఆవేదన వ్యక్తం చేశారు.
నిర్మాతలు కష్టపడి సంపాదించిన డబ్బును డ్యాన్సర్లకు అందించేందుకు ఇస్తుంటే, మధ్యలో కొందరు దుర్వినియోగానికి పాల్పడటం ఆందోళనకరమని పేర్కొన్నారు.
ఇటీవల కాలంలో డ్యాన్సర్స్ యూనియన్ నిధుల వినియోగంపై జానీ మాస్టర్, శేఖర్ మాస్టర్ వర్గాల మధ్య విభేదాలు నెలకొన్నాయని వార్తలు వెలువడ్డాయి.
అనంతరం మెగాస్టార్ చిరంజీవి జోక్యంతో పరిస్థితి చక్కబడిందని, తమ మధ్య ఎలాంటి విభేదాలు లేవని జానీ మాస్టర్ స్వయంగా వెల్లడించారు.
అయినప్పటికీ ఫెడరేషన్ ఆయనపై దేశవ్యాప్త బహిష్కరణ విధించిన విషయం తెలిసిందే.