Kalki 2898 AD Pre-release Event: 'కల్కి 2898 AD' కోసం అమితాబ్..ఆ మాత్రం మాట్లాడం గొప్పే అన్న దీపికా
ప్రభాస్ నటించిన కల్కి 2898 AD సినిమా రిలీజ్‍కు రెడీ అయింది. భారత పురాణాల స్ఫూర్తితో ఈ సైన్స్ ఫిక్షన్ చిత్రాన్ని తెరకెక్కిస్తున్నట్లు దర్శకుడు నాగ్ అశ్విన్ తెలిపారు. ఈ సినిమాలో రెబల్ స్టార్ ప్రభాస్ హీరోగా నటించారు. కల్కి 2898 AD సినిమా మరో వారంలో జూన్ 27వ తేదీన రిలీజ్ కానుంది. ఈ క్రమంలో ఈ మూవీ ప్రీ-రిలీజ్ ఈవెంట్ బుధవారం ముంబైలో జరిగింది. ఈ ప్రీ-రిలీజ్ ఈవెంట్‍కు హీరో ప్రభాస్, అమితాబ్ బచ్చన్, కమల్ హాసన్, దీపికా పదుకొణ్, నిర్మాత అశ్వినీదత్ హాజరయ్యారు. అయితే,ఈ ఈవెంట్‍లో దర్శకుడు నాగ్ అశ్విన్ కనిపించలేదు. ఈ ఈవెంట్‍ను హీరో దగ్గుబాటి రానా హోస్ట్ చేశారు.
అలా చేయద్దని అమితాబ్ హెచ్చరించారు: ప్రభాస్
ఈవెంట్ సందర్భంగా అమితాబ్, కమల్ హాసన్ లాంటి దిగ్గజాలతో నటించిన అనుభవం గురించి చెప్పాలని ప్రభాస్‍ను రానా అడిగారు. దీంతో తాను ప్రభాస్ కాళ్లు మొక్కుతానంటూ టీజ్ చేశారు అమితాబ్. ఆ తర్వాత ప్రభాస్ అసలు విషయం చెప్పారు. తాను అమితాబ్‍కు పాదాభివందనం చేస్తే అయన ఇంకోసారి అలా చేయవద్దని అన్నారని తెలిపారు. "నేను మొదటిసారి కలిసినప్పుడు అమితాబ్ బచ్చన్ కాళ్లకు నమస్కరిస్తే .. అలా చేయద్దని అమితాబ్ వారించారు. ఇంకోసారి అలా చేస్తే నేను కూడా అలా చేస్తానని అమితాబ్ హెచ్చరించారు" అని ప్రభాస్ చెప్పారు. ఇక, కమల్ హాసన్ సినిమాలు అంటే తనకు చాలా ఇష్టమని .. చిన్నప్పుడు ఆయనలా కనిపించేందుకు ట్రై చేసేవాడినని ప్రభాస్ చెప్పారు.
ప్రభాస్ ఈ మాత్రం మాట్లాడడమే గొప్ప: దీపికా
అమితాబ్, కమల్ లాంటి దిగ్గజాలతో నటించే ఛాన్స్ ఇచ్చిన దర్శకుడు నాగ్ అశ్విన్, నిర్మాత అశ్వినీదత్‍కు థ్యాంక్స్ చెప్పారు ప్రభాస్. దీపికా పదుకొణ్ గురించి ప్రభాస్ మాట్లాడుతున్న సమయంలో దీపిక కల్పించుకొని "ప్రభాస్ రెండు వాక్యాలు మాట్లాడడాన్ని మనం సెలెబ్రేట్ చేసుకోవాలి" అని అన్నారు. ఇంట్రోవర్ట్‌గా ఉండే ప్రభాస్ ఈ మాత్రం మాట్లాడడమే గొప్ప అన్నారు. దీపిక సూపర్ స్టార్ అని, గొప్ప నటి అని ప్రభాస్ కూడా ప్రశంసించారు. తన బేబీ బంప్‍ను చూపిస్తూ ప్రభాస్ తినిపించిన తిండి వల్లే అంటూ సరదాగా జోక్ వేశారు దీపిక.
ఈ సినిమాలో నటించడం గొప్ప గౌరవం: అమితాబ్
కల్కి 2898 AD సినిమాపై తనకు మొదట ఆసక్తి కలిగిందని, ఆ తర్వాత ఆశ్చర్యం వేసిందని కమల్ హాసన్ అన్నారు. డైరెక్టర్ నాగ్ అశ్విన్‍పై ప్రశంసలు కురిపించారు. కల్కి 2898 AD చిత్రంలో నటించడం గొప్ప గౌరవం అని అమితాబ్ బచ్చన్ అన్నారు. నిర్మాత అశ్వినీదత్ చాలా వినయంగా ఉంటారంటూ ఆయన కాళ్లకు మొక్కబోయారు బిగ్‍బీ. డైరెక్టర్ నాగ్ అశ్విన్‍ను ప్రశంసించారు.
