ఛాంగురే బంగారు రాజా ట్రైలర్: నవ్వుల్ని పంచడానికి వచ్చేస్తున్న కార్తీక్ రత్నం
కేరాఫ్ కంచరపాలెం, నారప్ప సినిమాలతో గుర్తింపు తెచ్చుకున్న కార్తీక్ రత్నం హీరోగా ఛాంగురే బంగారు రాజా సినిమా తెరకెక్కుతోంది. మాస్ మహారాజ రవితేజ సొంత బ్యానర్ అయిన టీమ్ వర్క్స్ నిర్మించిన ఛాంగురే బంగారు రాజా సినిమా ట్రైలర్ నిన్న విడుదలైంది. పేరుకు తగినట్టుగానే ఈ ట్రైలర్ మొత్తం నవ్వులతో నిండిపోయింది. ట్రైలర్ మొదలుకావడమే, ఊర్లోని జనాలందరూ రంగురాళ్ల కోసం ఒక ప్రదేశానికి వెళ్లడాన్ని, ఆ రంగురాళ్లకు గిరాకీ ఎక్కువగా ఉండడాన్ని చూపించి ఆసక్తి పెంచారు. ట్రైలర్ లో కమెడియన్ సత్య, దర్శకుడు రవిబాబు పాత్రలు మంచి వినోదాన్ని పంచాయి.
సెప్టెంబర్ 15న విడుదల కానున్న ఛాంగురే బంగారు రాజా
ఈ సినిమాలో, సత్య, రవిబాబు మంచి కామెడీ పంచనున్నారని ట్రైలర్ తో అర్థమయింది. 2నిమిషాల 9సెకండ్ల నిడివిగల ట్రైలర్ లో కామెడీ సన్నివేశాలు ఎక్కువగా కనిపించాయి. ప్రేక్షకులను కడుపుబ్బా నవ్వించడమే టార్గెట్ గా ఛాంగురే బంగారు రాజా సినిమా వస్తుందని ట్రైలర్ చెప్పేసింది. దర్శకుడు సతీష్ వర్మ తెరకెక్కించిన ఈ సినిమాకు సంగీతాన్ని కృష్ణ సౌరభ్ అందించారు. వినాయక చవితి రేసులోంచి చాలా తెలుగు సినిమాలు తప్పుకున్నాయి. ఆ ఖాళీని ఛాంగురే బంగారు రాజా నింపడానికి వస్తోంది. సెప్టెంబర్ 15వ తేదీన ఈ సినిమా థియేటర్లలో రిలీజ్ అవుతుంది.
