మరో మళయాలం సినిమా రీమేక్ లో మెగాస్టార్ చిరంజీవి?
ఈ వార్తాకథనం ఏంటి
మెగాస్టార్ చిరంజీవి వరుసపెట్టి సినిమాలు చేస్తున్నారు. వాల్తేరు వీరయ్య విజయం తర్వాత మెహెర్ రమేష్ దర్శకత్వంలో భోళాశంకర్ సినిమాతో వస్తున్నారు చిరంజీవి.
తమిళంలో సూపర్ హిట్ అందుకున్న వేదాళం చిత్రానికి రీమేక్ గా భోళాశంకర్ రూపొందుతోంది. తాజాగా చిరంజీవి ఖాతాలో మరో రీమేక్ చేరిందని తెలుస్తోంది.
మళయాల చిత్రమైన బ్రోడాడీ సినిమాను రీమేక్ చేయాలని చిరంజీవి భావిస్తున్నట్లు కథనాలు వస్తున్నాయి. కామెడీ డ్రామాగా రూపొందిన బ్రోడాడీ సినిమాలో మోహన్ లాల్, పృథ్వీరాజ్ సుకుమారన్, కళ్యాణి ప్రియదర్శన్ నటించారు.
ఈ సినిమా తెలుగు రీమేక్ మరికొద్ది రోజుల్లో మొదలవుతుందని చెప్పుకుంటున్నారు.
Details
చిరంజీవి కొడుకుగా డీజే టిల్లు ఫేమ్ సిద్ధు
బ్రోడాడీ సినిమా తండ్రీ కొడుకుల కథ అనీ, ఈ సినిమా తెలుగు రీమేక్ లో తండ్రిగా చిరంజీవి నటిస్తారనీ, కొడుకుగా డీజే టిల్లు ఫేమ్ సిద్ధు జొన్నలగడ్డ నటించనున్నారని టాక్ వినిపిస్తోంది.
సిద్ధు జొన్నలగడ్డకు జోడీగా శ్రీలీల కనిపించనుందని అంటున్నారు. ప్రస్తుతం దర్శకుడి కోసం వెతుకుతున్నట్లు తెలుస్తోంది.
అయితే రీమేక్ సినిమాల్లో చిరంజీవి ఎక్కువగా కనిపించడాన్ని కొంతమంది అభిమానులు ఒప్పుకోవడం లేదు. ఇతర ఇండస్ట్రీల్లో సీనియర్లు చేస్తున్నట్లుగా కంటెంట్ బాగున్న కొత్త సినిమాల్లో చిరంజీవి నటిస్తే బాగుంటుందని అనుకుంటున్నారు.
మరి రీమేకులు చేయడం చిరంజీవి ఆపుతారా? లేదా ఇలాగే కొనసాగిస్తారా అనేది చూడాలి. ప్రస్తుతం తెరకెక్కుతోన్న భోళాశంకర్ చిత్రం, ఆగస్టు 11న రిలీజ్ అవుతుంది. ఈ సినిమాలో తమన్నా, కీర్తి సురేష్ నటిస్తున్నారు.