అర్థరాత్రి తెలుగు నేర్చుకుంటున్న మృణాల్ ఠాకూర్: ఆకాశానికెత్తేస్తున్న అభిమానులు
తెలుగు సినిమా ప్రేక్షకులకు సినిమా అంటే ఎంత ఇష్టమో ప్రత్యేకంగా చెప్పాల్సిన పనిలేదు. అలాగే తమకు నచ్చిన నటీనటులను ఎంతగా ఆరాధిస్తారో కూడా అందరికీ తెలుసు. అలా తెలుగు ప్రేక్షకుల ఆరాధనను సొంతం చేసుకున్న హీరోయిన్లలో మృణాల్ ఠాకూర్ ఒకరు. సీతారామం సినిమాలో సీతగా నటించిన మృణాల్ ఠాకూర్, తన నటనతో తెలుగు ప్రేక్షకులను మంత్రముగ్ధులను చేసింది. అప్పటినుండి ఆమెకు తెలుగులో అభిమానులు పెరిగిపోయారు. బాలీవుడ్ లో సినిమాలు చేసినా కూడా రాని పేరు సీతారామం సినిమాతో తెలుగులో వచ్చేసింది. సీతారామం తర్వాత మృణాల్ ఠాకూర్ కి తెలుగులో అవకాశాలు బాగా వస్తున్నాయి. అయితే ఆ సినిమాల్లో నటించడం కోసం ప్రస్తుతం మృణాల్ ఠాకూర్ తెలుగు నేర్చుకుంటుంది.
రాత్రిపూట తెలుగు నేర్చుకుంటున్న మృణాల్ ఠాకూర్
ప్రస్తుతం నాని హీరోగా తెరకెక్కుతున్న హాయ్ నాన్న సినిమాలో హీరోయిన్ గా కనిపిస్తున్న మృణాల్ ఠాకూర్, తెలుగు నేర్చుకోవడానికి సమయాన్ని కేటాయించింది. రాత్రిపూట లాప్ టాప్ ముందు కూర్చుని ఆన్ లైన్ క్లాసుల ద్వారా తెలుగు నేర్చుకుంటుంది. ఈ మేరకు సోషల్ మీడియాలో ఒకానొక వీడియోను పోస్ట్ చేసింది. ఈ వీడియోలో తాను తెలుగు నేర్చుకుంటే తప్పొప్పులను ఆన్ లైన్ లోని వ్యక్తి సరిదిద్దుతున్నారు. తెలుగు నేర్చుకోవడం పట్ల మృణాల్ ఠాకూర్ చూపుతున్న అంకితభావాన్ని ఆమె అభిమానులు అందరూ మెచ్చుకుంటున్నారు. తెలుగు సినిమాల్లో నటించే మిగతా హీరోయిన్లు కూడా మృణాల్ ఠాకూర్ లాగా తెలుగు నేర్చుకుంటే ఎంత బాగుంటుందోనని కామెంట్స్ చేస్తున్నారు.
