Prakash Raj: నెట్టింట మరోసారి నాగబాబు-ప్రకాశ్ రాజ్ మాటల యుద్ధం
ఈ వార్తాకథనం ఏంటి
సోషల్ మీడియా వేదికగా మెగా బ్రదర్ కొణిదెల నాగబాబు, ప్రముఖ నటుడు ప్రకాష్ రాజ్ మధ్య మరోసారి మాటల యుద్ధం చెలరేగింది. నాయకత్వం, ప్రజల బాధ్యతలు, ప్రశ్నించే హక్కుపై ఇద్దరి మధ్య విభిన్న అభిప్రాయాలు వ్యక్తమవడంతో ఈ వ్యవహారం చర్చనీయాంశంగా మారింది. ఇటీవల నాగబాబు తన ఎక్స్ (ట్విట్టర్) ఖాతాలో నాయకుడి పాత్ర గురించి ఒక పోస్టు చేశారు. ఆ పోస్టులో ఆయన, నాయకుడే సరైన దిశను చూపగలడని, అతడు ఎదుర్కొనే సవాళ్లు, ప్రమాదాల గురించి అందరికీ పూర్తి అవగాహన ఉండదని పేర్కొన్నారు. ఏది సరైనది, ఏది తప్పు అనే విషయాన్ని నాయకుడే బాగా అర్థం చేసుకోగలడని చెప్పిన ఆయన, అనవసర సందేహాలను పక్కనబెట్టి ప్రశ్నలు లేకుండా నాయకుడిని అనుసరించాలని సూచించారు.
వివరాలు
వారిద్దరి మధ్య ప్రశ్నల యుద్ధం..
నాగబాబు చేసిన ఈ వ్యాఖ్యలు సోషల్ మీడియాలో వేగంగా వైరల్ అయ్యాయి. ముఖ్యంగా "ప్రశ్నలు వేయకుండా నాయకుడిని అనుసరించాలి" అనే భావనపై పెద్దఎత్తున చర్చ మొదలైంది. ఈ నేపథ్యంలో నటుడు ప్రకాష్ రాజ్.. నాగబాబు పోస్టుపై స్పందిస్తూ తన అభిప్రాయాన్ని వెల్లడించారు. నాగబాబు ట్వీట్ను రీట్వీట్ చేసిన ప్రకాష్ రాజ్, అదే శైలిలో కౌంటర్ ఇచ్చారు. "ప్రజలు తమ సందేహాలను పక్కన పెట్టి, నోళ్లు మూసుకుని, ప్రశ్నలు అడగకుండా నాయకుడిని అనుసరించాలని చెప్పడం వెనుక ఉద్దేశం ఏమిటి?" అని ప్రశ్నించారు.
వివరాలు
మెగా ఫ్యామిలీపై ప్రకాష్ రాజ్ ఫైర్..
"మేము ఎవరినైనా గుడ్డిగా అనుసరించే గొర్రెలం కాదు. బానిసల మాదిరిగా జీవించడానికి సిద్ధంగా లేం. ప్రజలను బెదిరించే ప్రయత్నాలు ఆమోదయోగ్యం కావు. ప్రశ్నించడం ప్రతి పౌరుడి ప్రాథమిక హక్కు. ప్రజలకు సమాధానం చెప్పే బాధ్యత మాత్రం తప్పదు" అని ప్రకాష్ రాజ్ ఘాటుగా స్పందించారు. ఇదిలా ఉండగా, గతంలో మూవీ ఆర్టిస్ట్స్ అసోసియేషన్ (మా) అధ్యక్ష ఎన్నికల్లో ప్రకాష్ రాజ్ పోటీ చేసిన సమయంలో నాగబాబు సహా మెగా కుటుంబ సభ్యులు ఆయనకు మద్దతు ప్రకటించారు. అయితే ప్రస్తుతం పరిస్థితులు మారినట్లు కనిపిస్తున్నాయి. గత కొంతకాలంగా పవన్ కళ్యాణ్తో పాటు మెగా కుటుంబ సభ్యులపై ప్రకాష్ రాజ్ తరచుగా విమర్శలు చేస్తుండటం గమనార్హం.