Exhibitors Association: జీవోలు వచ్చినా టికెట్ ధరలు పెంచం.. ఎగ్జిబిటర్స్ అసోసియేషన్ షాకింగ్ నిర్ణయం
ఈ వార్తాకథనం ఏంటి
తెలంగాణలో సింగిల్ స్క్రీన్ థియేటర్ల నిలుపుదలకు ఎగ్జిబిటర్లు మరోసారి "పర్సెంటేజ్ షేరింగ్ విధానం" అమలు చేయాలని కోరారు. హైదరాబాద్లో నిర్వహించిన సమావేశంలో నిర్మాతలు, ఎగ్జిబిటర్లు పాల్గొని ప్రస్తుత పరిస్థితులపై సమగ్రంగా చర్చించారు. గత కొన్నేళ్లుగా థియేటర్ల ఆదాయం తగ్గిపోవడంతో చిన్న థియేటర్లు తీవ్రమైన ఆర్థిక ఒత్తిడిని ఎదుర్కొంటున్నాయని వారు వెల్లడించారు. ముఖ్యంగా రెంటల్ విధానం కారణంగా నష్టాలు మరింత పెరుగుతున్నాయని అభిప్రాయపడ్డారు.
వివరాలు
వాటిని అభివృద్ధి చేయాల్సిన అవసరం ఉంది..
సమావేశంలో పలువురు నిర్మాతలు, ఎగ్జిబిటర్లు మాట్లాడుతూ సినిమా పరిశ్రమలో నిర్మాతలు, డిస్ట్రిబ్యూటర్లు, ఎగ్జిబిటర్ల మధ్య సమన్వయం అత్యంత అవసరమని పేర్కొన్నారు. ఇతర రాష్ట్రాల్లో అమల్లో ఉన్న పర్సెంటేజ్ షేరింగ్ విధానాన్ని తెలుగు రాష్ట్రాల్లో కూడా తీసుకువస్తే థియేటర్లకు ఊరట లభిస్తుందని తెలిపారు. ప్రేక్షకులకు మెరుగైన సినిమా అనుభవం అందించేందుకు సింగిల్ స్క్రీన్ థియేటర్లలో ఆధునిక సౌకర్యాలను అభివృద్ధి చేయాల్సిన అవసరం ఉందని సూచించారు.
వివరాలు
టికెట్ ధరలు పెంచే ఆలోచన లేదని స్పష్టం..
థియేటర్లు మూతపడితే దాని ప్రభావం మొత్తం సినిమా పరిశ్రమపై పడుతుందని సమావేశంలో స్పష్టం చేశారు. ఎవరినీ లక్ష్యంగా చేసుకుని ఈ నిర్ణయాలు తీసుకోవడం లేదని, కేవలం థియేటర్ల రక్షణ కోసమే ఈ ప్రయత్నమని వివరించారు. పర్సెంటేజ్ షేరింగ్ విధానాన్ని అమలు చేసే నిర్మాతల సినిమాలను ప్రదర్శించేందుకు తాము సిద్ధంగా ఉన్నామని తెలిపారు. అలాగే టికెట్ ధరలను పెంచే ఆలోచన తమకు లేదని కూడా స్పష్టం చేశారు.
వివరాలు
ఎగ్జిబిటర్ల పోరాటం..
సింగిల్ స్క్రీన్ థియేటర్ల పరిరక్షణ, భవిష్యత్ కొనసాగింపుపై ప్రతిపాదిత "పర్సెంటేజ్ షేరింగ్ విధానం" అమలుకు సంబంధించి నిర్ణయం తీసుకునేందుకు తెలంగాణ ఎగ్జిబిటర్ సభ్యుల సమావేశం నిర్వహించారు. ఈ సమావేశంలో నిర్మాతలు చదలవాడ శ్రీనివాస్, శిరీష్ రెడ్డి, సునీల్ నారంగ్తో పాటు పలువురు ఎగ్జిబిటర్లు పాల్గొన్నారు. ఇది ఎగ్జిబిటర్ల జీవన పోరాటమని, సింగిల్ స్క్రీన్ థియేటర్ల మనుగడ కోసం అందరికీ సమానంగా వర్తించే "పర్సెంటేజ్ షేరింగ్" విధానాన్ని అమలు చేయాలని తెలంగాణ ఎగ్జిబిటర్స్ అసోసియేషన్ ప్రెస్మీట్లో విజ్ఞప్తి చేసింది.
వివరాలు
ఎగ్జిబిటర్లను కాపాడాల్సిన బాధ్యత అందరిది: చదలవాడ శ్రీనివాస్
నిర్మాత చదలవాడ శ్రీనివాస్ మాట్లాడుతూ.. ఒక నిర్మాత తండ్రిలాంటివాడు అయితే, ఎగ్జిబిటర్ బిడ్డలాంటి వాడు. ఈ భావనతో ముందుకు సాగితేనే సినిమా పరిశ్రమ ఆరోగ్యంగా ఉంటుంది. తండ్రి ఎంత కష్టపడినా అది బిడ్డల సుఖసంతోషాల కోసమే. గత 20 ఏళ్లుగా ఎగ్జిబిటర్లు అనేక కష్టాలను ఎదుర్కొంటున్నారు. సరైన ఆదాయం లేక, ప్రోత్సాహం తగ్గిపోవడంతో వారి పరిస్థితి దయనీయంగా మారింది. ముఖ్యంగా గత ఏడాది నుంచి పరిస్థితులు మరింత కఠినంగా మారాయి. గత ఆరు నెలలుగా అయితే ఎగ్జిబిటర్ల పరిస్థితి మరింత ఆందోళనకరంగా ఉందని అన్నారు.