Sankranthiki Vasthunam: వెంకటేశ్‌ హీరోగా తెరకెక్కిన హిట్‌ మూవీ 'సంక్రాంతికి వస్తున్నాం'పై పరుచూరి గోపాలకృష్ణ రివ్యూ
ఈ వార్తాకథనం ఏంటి
ప్రముఖ రచయిత పారుచూరి గోపాలకృష్ణ తన యూట్యూబ్‌ ఛానల్‌ ద్వారా సినిమాలపై విశ్లేషణ అందిస్తున్న సంగతి అందరికీ తెలిసిందే.
తాజాగా వచ్చిన ఎపిసోడ్‌లో ఆయన 'సంక్రాంతికి వస్తున్నాం' సినిమాను సమీక్షించారు.
వెంకటేశ్‌ హీరోగా అనిల్‌ రావిపూడి దర్శకత్వంలో రూపొందిన ఈ చిత్రం సంక్రాంతి సందర్భంగా విడుదలై మంచి విజయాన్ని సాధించింది.
ప్రస్తుతం ఈ సినిమా 'జీ 5' ఓటీటీ ప్లాట్‌ఫామ్‌లో స్ట్రీమింగ్‌ అవుతోంది.
వివరాలు
ఇక ఈ సినిమాపై గోపాలకృష్ణ ఏమన్నారంటే -
''రామానాయుడు, త్రివిక్రమరావు, వడ్డే రమేశ్‌ వంటి నిర్మాతలు జయాపజయాలను పట్టించుకోకుండా సినిమాలను నిర్మించేవారు.
ఈ తరానికి చెందిన నిర్మాతల్లో దిల్‌ రాజు, శిరీష్‌ కూడా అదే విధంగా కనిపిస్తున్నారు. కథ, స్క్రీన్‌ప్లే విషయాల్లో పూర్తి క్రెడిట్‌ దర్శకుడు అనిల్‌ రావిపూడికే చెందుతుంది.
వెంకటేశ్‌ తన నటనా ప్రయాణంలో ఎన్నో విభిన్న పాత్రలు పోషించారు.
తనకు తగ్గ భూమికలను ఎంపిక చేసుకుని, అందులో ఒదిగిపోయేందుకు ఎప్పుడూ శ్రమించేవారు.
ఈ సినిమాలో కూడా ఆయన నటన అద్భుతంగా ఉంది. ఐశ్వర్యా రాజేశ్‌ సహజంగా నటించి ఆకట్టుకుంది.
వివరాలు
వెంకటేశ్‌ బాడీ లాంగ్వేజ్‌కు తగ్గట్టుగా..
కథ విషయానికి వస్తే - ఒక ప్రముఖ వ్యాపారవేత్త కిడ్నాప్‌ అవుతాడు. ఆ వ్యక్తిని హీరో ఎలా కాపాడాడు? అనేదే కథా సారం.
చిన్న పాయింట్‌ను దర్శకుడు అద్భుతంగా మలిచారు. ఇదే కథను చిరంజీవి లేదా బాలకృష్ణలాంటి హీరోలు చేసి ఉంటే, స్క్రీన్‌ప్లే పూర్తిగా భిన్నంగా ఉండేది.
కానీ వెంకటేశ్‌ బాడీ లాంగ్వేజ్‌కు తగ్గట్టుగా దర్శకుడు అనిల్‌ రావిపూడి కథను సమర్థంగా రూపొందించారు.
ప్రధాన కథతో పాటు, ఇందులో రెండు ఉపకథలు కూడా ఉన్నాయి - ఒకటి హీరో పెళ్లికి ముందు జరిగిన ప్రేమకథ, మరొకటి ఓ ఉపాధ్యాయుడి కథ.
అడ్వెంచర్‌ అంశం వెంకటేశ్‌ బాడీ లాంగ్వేజ్‌కు సరిపోదని భావించి, దర్శకుడు, హీరో ఈ చిత్రాన్ని పూర్తిగా వినోదాత్మకంగా తీర్చిదిద్దారు.
వివరాలు
వెంకటేశ్‌కి లేడీస్‌ ఫాలోయింగ్‌తో పాటు మాస్‌ ప్రేక్షకాదరణ
ఇది ఒకప్పుడు శోభన్‌బాబు, అక్కినేని నాగేశ్వరరావు వంటి నటులు చేసిన కథలకు సమానమని చెప్పవచ్చు.
వెంకటేశ్‌కి లేడీస్‌ ఫాలోయింగ్‌తో పాటు మాస్‌ ప్రేక్షకాదరణ కూడా ఉంది. సినిమాలో వెంకటేశ్‌ కుమారుడిగా కనిపించిన బాలనటుడు కెమెరాతో కబడ్డీ ఆడిన తీరు ఆసక్తికరంగా ఉంది.
అలాగే, సాయి కుమార్‌ తన మునుపటి స్టైల్‌ డైలాగులతో మళ్లీ అలరించాడు.
''ఇక సినిమాలో జాతీయ జెండా గురించి ప్రస్తావించడాన్ని అభినందించాల్సిందే. ఓ బాలుడు త్రివర్ణ పతాకాన్ని సరిచేసే సన్నివేశాన్ని చక్కగా మలిచినందుకు దర్శకుడికి హ్యాట్సాఫ్‌.
వివరాలు
జంధ్యాలను గుర్తు చేశాడు
ఇంటర్వెల్‌ భాగాన్ని పూర్తిగా కామెడీ మయం చేశారు. హీరో తన లక్ష్యాన్ని చేరుకున్నాడనుకునేలోపు, కథకు కాస్త మలుపు ఇచ్చి, పది నిమిషాల పాటు యాక్షన్‌ సన్నివేశం జోడించారు.
కథానాయకుడి యాక్షన్‌ పాత్ర పూర్తి కావడానికి, తన గురువు ఉద్యోగం పొందేంత వరకు కథ ముందుకు సాగింది.
సాధారణంగా కథను నడిపించినట్లైతే ఇంత పెద్ద హిట్‌ వచ్చేదా? అనిల్‌ రావిపూడి తన వినోదాత్మక కథన శైలితో గతంలో ఎన్నో హాస్యభరిత చిత్రాలు ఇచ్చిన జంధ్యాలను గుర్తు చేశాడు'' అని గోపాలకృష్ణ పేర్కొన్నారు.