ఇన్ కార్ ట్రైలర్: థ్రిల్లింగ్ కాన్సెప్ట్ తో రితికా సింగ్ పాన్ ఇండియా మూవీ
గురు సినిమాలో బాక్సర్ పాత్రలో మెప్పించిన రితికా సింగ్, తెలుగు ప్రేక్షకులను పలకరించక చాలా రోజులైపోయింది. అప్పుడప్పుడు వచ్చిన అనువాద చిత్రాలు రితికా సింగ్ ని గుర్తుంచుకునేలా చేయలేకపోయాయి. ప్రస్తుతం ఆ పని చేయడానికి ఇన్ కార్ మూవీ వస్తున్నట్టు కనిపిస్తోంది. రితికా సింగ్ ప్రధాన పాత్రలో వస్తున్న ఇన్ కార్ మూవీ ట్రైలర్ ఈరోజే విడుదలైంది. సినిమా మొత్తం కార్లోనే జరుగుతుందని ట్రైలర్ లో చూపించేసారు. రితికా సింగ్ పాత్రను ముగ్గురు దుండగులు కిడ్నాప్ చేస్తారు. రేప్ చేయాలనే ఆలోచనతో మనుషులెవరూ కనిపించని చోటుకు తీసుకెళతారు. అక్కడి నుండి పారిపోవాలని ఎన్ని ప్రయత్నాలు చేసినా విఫలమవుతుంది. చివరికి దుండగులపై పోరాడి పారిపోవాలని అనుకుంటుంది. ఇదంతా ఎలా జరిగిందన్నదే కథ.
కథ మొత్తం కార్లోనే
కథ మొత్తం కార్లోనే జరుగుతుంది. థ్రిల్లింగ్ అంశాలు ఎక్కువగా కనిపిస్తున్నాయి. రితికా సింగ్ భుజాల మీదే సినిమా బరువు ఉన్నట్టుగా తెలిసిపోతుంది. 5 భాషల్లో దేశవ్యాప్తంగా రిలీజ్ చేస్తామని మేకర్స్ ప్రకటించారు. ఇన్ కార్ సినిమాను హర్ష వర్ధన్ డైరెక్ట్ చేస్తున్నారు. కథ కూడా ఆయనే అందించారు. ఇన్ బాక్స్ పిక్చర్స్ బ్యానర్ పై అంజుమ్ ఖురేషీ, సాజిద్ ఖురేషి నిర్మిస్తున్నారు. సందీప్ గోయత్, మనీష్ జంజోలియా, జ్ఞాన్ ప్రకాష్ కీలక పాత్రల్లో నటిస్తున్నారు. మార్చ్ 3వ తేదీన రిలీజ్ చేస్తున్నారు. హీరో వెంకటేష్ నటించిన గురు సినిమాలో హీరోయిన్ గా బాక్సర్ కనిపించింది రితికా సింగ్. నిజానికి ఇరుది సుట్రు అనే తమిళ సినిమాను గురు పేరుతో తెలుగులో రీమేక్ చేసారు.
