Salman Khan: హైదరాబాద్‌లో సల్మాన్ ఖాన్ 'సికిందర్' షూటింగ్.. సెట్స్ వద్ద 70 మందితో భారీ భద్రత
ఈ వార్తాకథనం ఏంటి
బాలీవుడ్‌ స్టార్‌ హీరో సల్మాన్ ఖాన్ ప్రస్తుతం 'సికిందర్' అనే సినిమా షూటింగ్‌లో బిజీగా ఉన్నారు. ఈ సినిమా కోసం సల్మాన్ సరసన హీరోయిన్‌ రష్మిక మందన్నా నటిస్తోంది.
సినిమా షూటింగ్ ప్రస్తుతం హైదరాబాద్‌లో జరుగుతోంది. ఫలక్‌నుమా ప్యాలెస్‌లో ఉన్న రాయల్ హోటల్‌లో షూటింగ్‌‌ను నిర్వహిస్తున్నారు.
ఈ నేపథ్యంలో సల్మాన్ ఖాన్‌కు భారీ భద్రతా ఏర్పాట్లు చేసినట్లు సమాచారం.
ముఖ్యంగా గ్యాంగ్‌స్టర్ లారెన్స్ బిష్ణోయ్ నుంచి తరచూ బెదిరింపులు వస్తుండటం, అలాగే కొన్ని రోజుల క్రితం సల్మాన్ సన్నిహితుడు, మహారాష్ట్ర మాజీ మంత్రి బాబా సిద్ధిఖే హత్యకు గురి కావడంతో పోలీసులు గట్టి భద్రతలను ఏర్పాటు చేస్తున్నారు.
Details
సల్మాన్ ఖాన్‌కు నాలుగు లేయర్ల భద్రత
సల్మాన్‌కు ప్రాణహాని ఉన్న నేపథ్యంలో, 70 మందికి పైగా భద్రతా సిబ్బంది ఆయా చోట్ల విధులు నిర్వహిస్తున్నారు.
వారిలో ఎన్ఎస్‌జీ కమాండోలతో పాటు పోలీసు సిబ్బంది, వ్యక్తిగత రక్షణ దళం ఉన్నారు. ఈ నేపథ్యంలో సల్మాన్‌కు నాలుగు లేయర్ల భద్రతా చర్యలు కల్పించినట్లు తెలుస్తోంది.
ఇప్పటికే కేంద్ర ప్రభుత్వం సల్మాన్‌కి వై ప్లస్ భద్రతను అందించింది.
భద్రతా కారణంగా, హోటల్‌ ఆధీనంలో తీసుకొని, సెక్యూరిటీ సిబ్బంది అక్కడ పర్యవేక్షణ నిర్వహిస్తున్నారు.