ఆస్కార్ అవార్డ్స్: ఆ ఘనత సాధించిన తొలి తమిళ నటుడిగా హీరో సూర్య రికార్డ్
95వ ఆస్కార్ అవార్డుల కార్యక్రమం ఇంకో మూడు రోజుల్లో మొదలు కానుంది. ఈ అవార్డుల కోసం ప్రపంచ సినిమా అభిమానులు అందరూ ఎంతగానో ఎదురుచూస్తున్నారు. ఆ ఎదురు చూపుల్లో ఇండియాకు మొదటి స్థానం దక్కుతుందని చెప్పవచ్చు. ఎందుకంటే ఈ సారి ఆస్కార్ అవార్డుల నామినేషన్లలో ఇండియా నుండి మూడు నామినేషన్లు ఉన్నాయి. ఆర్ఆర్ఆర్ నుండి నాటు నాటు పాట, ఆల్ దట్ బ్రీత్స్ అనే డాక్యుమెంటరీ ఫీఛర్, ది ఎలిఫెంట్ విష్పర్స్ అనే డాక్యుమెంటరీ షార్ట్.. నామినేషన్లలో ఉన్నాయి. ఇవే కాదు ఆస్కార్ అవార్డ్ ప్రెజెంటర్ గా బాలీవుడ్ భామ దీపికా పదుకునేకు ఆహ్వానం దక్కింది. అలాగే ఆస్కార్ అవార్డుల ఓటింగ్ కమిటీలో తమిళ నటుడు సూర్యకు స్థానం దక్కింది.
ఆస్కార్ ఓటు హక్కు వినియోగించుకున్న సూర్య
ఆస్కార్ అవార్డుకు నామినేట్ చిత్రాలకు ఓటింగ్ ఉంటుంది. ఆ ఓటింగ్ లో ఎవరికి ఎక్కువ ఓట్లు వచ్చాయో వారికి మాత్రమే అవార్డు ఉంటుంది. ప్రస్తుతం హీరో సూర్య, తన ఆస్కార్ ఓటు హక్కును వినియోగించుకున్నాడు. ఈ మేరకు ఓటు వేసానంటూ ట్విట్టర్ ద్వారా పంచుకున్నాడు సూర్య. తమిళం నుండి ఆస్కార్ నామినేషన్లకు ఓటు వేసిన మొదటి హీరోగా గుర్తింపు తెచ్చుకున్నాడు సూర్య. ఐతే తన ఓటు దేనికి వేసాడనేది మాత్రం సూర్య వెల్లడి చేయలేదు. బాలీవుడ్ నటి కాజోల్ కి కూడా ఆస్కార్ నామినేషన్లలో ఉన్న సినిమాలకు ఓటు వేయడానికి ఆహ్వానం అందింది. ఆస్కార్ అవార్డుల ప్రధానోత్సవం మార్చ్ 13వ తేదిన ఉదయం 5గంటలకు ప్రారంభం కానుంది.
