Surya Kanguva : సూర్య 'కంగువ' నుంచి లేటెస్ట్ అప్డేట్.. సినిమా ఎన్ని భాషల్లో తెలుసా
తమిళనాట మాస్ డైరెక్టర్ శివ దర్శకత్వంలో కోలీవుడ్ స్టార్ హీరో సూర్య నటిస్తున్న తాజా చిత్రం 'కంగువ'కు సంబంధించి మరో అదిరిపోయే విషయం వెల్లడైంది. ఈ సినిమాని పాన్ ఇండియా రేంజ్'లో కాకుండా పాన్ వరల్డ్ రేంజ్'లో విడుదలకు ఏర్పాట్లు చేస్తున్నారని తెలుస్తోంది. అయితే సూర్య కెరియర్'లోనే కంగువ అత్యంత భారీ బడ్జెట్'తో ఈ సినిమా తెరకెక్కుతోంది. అత్యధిక భాషల్లో విడుదల కానున్న ఫస్ట్ పాన్ వరల్డ్ మూవీ ఇదే కావడం గమనార్హం. పీరియాడికల్ నేపథ్యంలో తెరకెక్కుతున్న ఈ సినిమా నుంచి ఇప్పటికే రిలీజైన టీజర్ మంచి రెస్పాన్స్ పొందింది. సూర్య వేషధారణ ప్రేక్షకులను అమితంగా ఆకట్టుకుంటోంది.
ఏకంగా 38 భాషల్లో రిలీజ్
ఈ నేపథ్యంలోనే సినిమాపై దక్షిణాది పరిశ్రమల్లో భారీ అంచనాలు నెలకొన్నాయి. ప్రస్తుతం ఈ చిత్రానికి సంబంధించి షూటింగ్ శరవేగంగా జరుగుతోంది. ఈ చిత్రానికి సంబంధించి నిర్మాత జ్ఞానవేల్ రాజా చేసిన వ్యాఖ్యలు వైరల్ అయ్యాయి. ఈ సినిమా ప్రస్తుతం షూటింగ్' దశలో ఉందన్న రాజా, విడుదలకు భారీ ప్రణాళిక సిద్ధం చేస్తున్నామన్నారు. అయితే ఈ సినిమాను ఏకంగా 38 భాషల్లో రిలీజ్ చేస్తున్నామన్నారు. ఐమాక్స్, త్రీడీ వెర్షన్ లోనూ ఈ చిత్రాన్ని అందుబాటులోకి తెస్తున్నట్లు ప్రకటించారు. తమిళ చిత్ర పరిశ్రమ స్థాయిని మరింత ఇనుమడించేలా ఈ సినిమాను తీర్చిదిద్దుతున్నామన్నారు. దీంతో సినిమాపై అంచనాలు అమాంతం పెరిగాయి. ఈ సినిమాలో సూర్య ఏకంగా ఆరు విభిన్న పాత్రల్లో కనివిందు చేయనున్నట్లు తెలుస్తోంది.
