KA Movie OTT: ఓటీటీలోకి 'క' మూవీ.. స్ట్రీమింగ్ తేదీ వచ్చేసింది!
తెలుగు సినిమాల్లో చిన్న సినిమాగా తెరపై అడుగు పెట్టి బాక్సాఫీస్ వద్ద 'క' సినిమా భారీ విజయాన్ని సాధించింది. టాలీవుడ్ యువ నటుడు కిరణ్ అబ్బవరం ప్రధాన పాత్రలో నటించిన ఈ సినిమాకు సుజీత్, సందీప్ ఇద్దరూ దర్శకులుగా పని చేశారు. ఈ సినిమా కిరణ్ అబ్బవరం స్వంత బ్యానర్‌పై నిర్మించగా, చింతా గోపాలకృష్ణ రెడ్డి భారీ బడ్జెట్‌తో నిర్మాణం చేపట్టారు. కథానాయికగా నయన్ సారిక నటించింది. దీపావళి కానుకగా అక్టోబర్ 31న విడుదలై ప్రేక్షకులను ఆకట్టుకున్న ఈ చిత్రం, బాక్సాఫీస్ వద్ద రూ.50 కోట్లకి పైగా వసూళ్లు రాబట్టింది.
నవంబర్ 28న స్ట్రీమింగ్
ఈ విజయంతో సూపర్ హిట్‌గా నిలిచింది. ఇప్పుడు ఈ సినిమా ఓటీటీలోకి వస్తోంది. ఈటీవీ విన్ ఓటీటీ వేదికపై నవంబర్ 28 నుండి ఈ సినిమా స్ట్రీమింగ్ కాబోతుంది. ఈ సినిమా కథ అభినయ వాసుదేవ్ (కిరణ్ అబ్బవరం) చుట్టూ తిరుగుతుంది. అతను అనాథగా పెరిగి, ఎప్పటికైనా తన తల్లిదండ్రులు తిరిగి వస్తారని నమ్ముకుంటూ జీవిస్తాడు. ఇతరుల ఉత్తరాలు చదివి, అవి తన కుటుంబీకులే రాసినట్లు ఊహించుకుంటూ, తనను పోగొట్టుకున్న బంధాలను గుర్తు చేసుకుంటాడు. చదువు పూర్తి చేసి, కృష్ణగిరి అనే ఊర్లో అసిస్టెంట్ పోస్ట్‌మ్యాన్‌గా ఉద్యోగానికి జాయిన్ అవుతాడు.
