Hit 3 : హిట్ 3 కోసం ఏపీలో టికెట్ ధరల పెంపు..!
ఈ వార్తాకథనం ఏంటి
హిట్ ఫ్రాంచైజీలో భాగంగా వస్తున్న మూడో చిత్రం హిట్ 3. ఇప్పటికే ఈ సిరీస్‌లో వచ్చిన హిట్: ది ఫస్ట్ కేస్, హిట్: ది సెకండ్ కేస్ చిత్రాలు ప్రేక్షకుల మనసులు దోచుకున్నాయి. నేచురల్ స్టార్ నాని ప్రధాన పాత్రలో నటించిన మూడో భాగం మే 1, 2025న ప్రేక్షకుల ముందుకు రానుంది. ఆంధ్రప్రదేశ్‌లో సినిమా టికెట్ ధరల పెంపు అంశం మరోసారి చర్చనీయాంశంగా మారింది. సోషల్ మీడియా వేదిక ఎక్స్‌లో వెలుగుచూసిన సమాచారం ప్రకారం హిట్ 3 కోసం ప్రభుత్వం టికెట్ ధరలను పెంచేందుకు అనుమతి ఇచ్చే అవకాశం ఉందని ప్రచారం జరుగుతోంది. ఈ మేరకు టికెట్ ధరలు రూ.50 నుంచి రూ.75 వరకు పెంచుకునే అవకాశం ఉందని వార్తలు వస్తున్నాయి.
Details
హిట్ 3పై ప్రేక్షకుల్లో భారీ అంచనాలు
ప్రస్తుతానికి ఆంధ్రప్రదేశ్‌లో సింగిల్ స్క్రీన్ థియేటర్లలో టికెట్ ధరలు రూ.110 నుంచి రూ.145 వరకు, మల్టీప్లెక్స్‌లలో రూ.177 వరకు ఉన్నాయి. అయితే భారీ అంచనాలున్న హిట్ 3 వంటి చిత్రాలకు ధరలు పెంచడం వల్ల థియేటర్ యజమానులు, నిర్మాతలు ఆర్థికంగా లాభపడతారని ట్రేడ్ విశ్లేషకులు అభిప్రాయపడుతున్నారు. ఇప్పటికే ప్రమోషనల్ కంటెంట్‌కు విశేష స్పందన లభించడంతో హిట్ 3పై ప్రేక్షకుల్లో భారీ అంచనాలు నెలకొన్నాయి. వారం ముందుగానే టికెట్ బుకింగ్స్ జోరందుకోవడం కూడా సినిమాపై ఉన్న ఆసక్తిని స్పష్టంగా చూపిస్తోంది. శైలేష్ కొలను దర్శకత్వం వహిస్తున్న ఈ చిత్రంలో నానికి జోడీగా శ్రీనిధి శెట్టి నటిస్తుంది. బాక్సాఫీస్ వద్ద హిట్ 3 ఘన విజయాన్ని నమోదు చేయనుందని ట్రేడ్ వర్గాలు అంచనా వేస్తున్నాయి.