Tsutomu Shibayama: షాకింగ్..స్టార్ డైరెక్టర్ కన్నుమూత
ఈ వార్తాకథనం ఏంటి
ప్రపంచవ్యాప్తంగా కోట్లాది చిన్నారుల హృదయాలను గెలుచుకున్న యానిమేషన్ దర్శకుడు షిబాయామా సుటోము (84) ఇక మన మధ్య లేరు. కొంతకాలంగా ఊపిరితిత్తుల క్యాన్సర్తో బాధపడుతూ వచ్చిన ఆయన మరణించారు. ఈ విషాద వార్తను ఆయన సహ వ్యవస్థాపకుడిగా ఉన్న 'అజియా-డో యానిమేషన్ వర్క్స్' సంస్థ అధికారికంగా వెల్లడించింది. షిబాయామా సుటోము పేరు వినగానే ముందుగా గుర్తుకు వచ్చేది 'డోరేమాన్'. 1979లో ఈ ప్రసిద్ధ సిరీస్కు దర్శకత్వ బాధ్యతలు చేపట్టిన ఆయన, దాదాపు 20 సంవత్సరాల పాటు విజయవంతంగా ఆ బాధ్యతలను నిర్వర్తించారు. టెలివిజన్ సిరీస్తో పాటు, డోరేమాన్ ఫ్రాంచైజ్లో రూపొందిన 22 ఫీచర్ సినిమాలకు కూడా ఆయన దర్శకత్వం వహించడం ప్రత్యేకతగా నిలిచింది. జపాన్లో ఆయనను గౌరవార్థం "జాతీయ యానిమేషన్ పితామహుడు"గా పిలుస్తారు.
వివరాలు
రెండు దశాబ్దాల ప్రస్థానం
1963లో టోయీ యానిమేషన్ సంస్థతో తన వృత్తి జీవితాన్ని ప్రారంభించారు షిబాయామా సుటోము. యానిమేషన్ రంగంలో విశిష్ట స్థానం సంపాదించారు. డోరేమాన్తో పాటు చిబీ మారుకో చాన్, లూపిన్ III, కైకెట్సు జోరోరి వంటి ప్రసిద్ధ సిరీస్లకు కూడా ఆయన సేవలందించారు. 1978లో ఒసాము కోబయాషి, మిచిషిరో యమడాలతో కలిసి 'అజియా-డో యానిమేషన్ వర్క్స్' అనే సంస్థను స్థాపించారు. యానిమేషన్ రంగానికి ఆయన చేసిన అమూల్యమైన సేవలను గుర్తించి, 2012లో జపాన్ ప్రభుత్వం ఆయనకు 'జీవిత సాఫల్య పురస్కారం'ను ప్రదానం చేసింది.