Papa Movie: తెలుగు ప్రేక్షకుల హృదయాలను తాకేందుకు వస్తున్న 'పా..పా..'.. రిలీజ్ ఎప్పుడంటే?
ఈ వార్తాకథనం ఏంటి
టాలీవుడ్‌లో ఇటీవల చిన్న సినిమాల సంఖ్య గణనీయంగా తగ్గిపోవడంతో, ఇతర భాషల చిత్రాలు తెలుగు ప్రేక్షకుల మనసు దోచుకుంటున్నాయి. ముఖ్యంగా తమిళ, మళయాళ, కన్నడ భాషల సినిమాలు తెలుగు మార్కెట్‌లో మంచి ఆదరణ పొందుతున్నాయి. ఇదే ట్రెండ్‌లో 2023 ఫిబ్రవరిలో విడుదలై కోలీవుడ్‌లో బ్లాక్‌బస్టర్‌గా నిలిచిన సినిమా 'దాదా'. యువ నటుడు కవిన్ ప్రధాన పాత్రలో నటించిన ఈ చిత్రం విడుదలైన వెంటనే ఆకట్టుకుని భారీ వసూళ్లను రాబట్టింది. చిన్న సినిమాగా వచ్చినా, గాఢమైన భావోద్వేగంతో సాగిన కథనంతో ప్రేక్షకులను కట్టిపడేసింది. థియేటర్లలో మంచి విజయాన్ని సాధించిన తర్వాత, ఓటిటి ప్లాట్‌ఫామ్‌లో కూడా ఈ మూవీ తిరుగులేని రికార్డు వ్యూస్ సాధించింది.
Details
ట్రైలర్ నుంచి రెస్పాన్స్
భాషతో సంబంధం లేకుండా ఈ సినిమాకు దేశవ్యాప్తంగా సినిమా ప్రేమికుల నుండి గొప్ప స్పందన లభించింది. అయితే, ఒక్క తెలుగు ప్రేక్షకులు మాత్రమే ఈ కథను చూడలేకపోయారు. ఈ నేపథ్యంలో ఈ చిత్రాన్ని తెలుగులో 'పా..పా..' పేరుతో డబ్ చేసి జూన్ 13న విడుదల చేయబోతున్నారు. ఈ సందర్భంగా తాజాగా విడుదలైన తెలుగు ట్రైలర్ మంచి రెస్పాన్స్ తెచ్చుకుంటోంది. ట్రైలర్‌లో హీరో-హీరోయిన్ మధ్య ప్రేమానుభూతుల నుంచి కథ మొదలై, వారి మధ్య గాఢమైన సాన్నిహిత్యం కారణంగా హీరోయిన్‌కి గర్భం రావడం కథలో కీలక మలుపు.
Details
జూన్ 13న రిలీజ్
ఈ చిత్రంలో తండ్రిత్వాన్ని అర్థం చేసుకుంటూ, తాను తండ్రిగా తన కొడుకును ఎలా పోషించాడు అనే అంశం చక్కగా చూపించారు. ముఖ్యంగా హీరో-హీరోయిన్ మధ్య భావోద్వేగ సన్నివేశాలు ఎంతో హృద్యంగా ఉంటాయని ట్రైలర్ ఆధారంగా అంచనా వేయవచ్చు. మొత్తానికి తమిళంలో భారీ విజయాన్ని సాధించిన ఈ చిత్రం, ఇప్పుడు తెలుగు ప్రేక్షకుల హృదయాలను దోచుకుంటుందా అనే ఆసక్తికరమైన ప్రశ్నకు జవాబు ఈ జూన్ 13న థియేటర్లలో దొరకనుంది.