World Music Day Special Movies: మ్యూజిక్ నేపథ్యంలో తెరకెక్కిన టాప్ 10 తెలుగు సినిమాలివే..
ఈ వార్తాకథనం ఏంటి
మన రోజువారీ జీవితం నుంచి సంగీతాన్ని తొలగించలేము. ఇది మన మనసులను హత్తుకుని, భావోద్వేగాలను స్పృశించి, గుండెను కదిలించే అసాధారణ శక్తిని కలిగి ఉంటుంది.
వేదనలో తేమను తుడిచేసేలా,ఆనందాన్ని రెట్టింపు చేసేలా సంగీతం ప్రభావితం చేస్తుంది.
అది సమయాన్ని మరిచిపోయేలా చేస్తుంది. ఒత్తిడిని దూరం చేస్తూ మానసికంగా నిశ్చలతను కలిగిస్తుంది.
సంగీతం ఒక భావోద్వేగాల భాష, మన ఆత్మను ప్రశాంతపరచే సాధనం.
అందుకే ప్రపంచవ్యాప్తంగా ప్రతి ఏడాది జూన్ 21న 'వరల్డ్ మ్యూజిక్ డే'ని జరుపుకుంటాం.
ఈ సందర్భంగా తెలుగు చలనచిత్రాల్లో సంగీతం నేపథ్యంగా రూపొందిన చిరస్మరణీయ చిత్రాలను ఓసారి గుర్తు చేసుకుందాం.
వివరాలు
శంకరాభరణం (1980)
దిగ్గజ దర్శకుడు కె. విశ్వనాథ్ తీసిన ఈ మ్యూజికల్ డ్రామా, శాస్త్రీయ సంగీతాన్ని ఆధారంగా చేసుకుని రూపొందిన కళా రత్నంగా నిలిచింది.
జెవి సోమయాజులు, మంజుభార్గవి, చంద్రమోహన్ తదితరులు ప్రధాన పాత్రల్లో నటించారు.
ఇది రెండు తరాల వ్యక్తుల సంగీత పట్ల వైవిధ్యమైన దృక్పథాలను చూపిస్తూ, భారతీయ సంప్రదాయాలను వెలుగులోకి తీసుకువచ్చింది.
వేటూరి రాసిన సాహిత్యం, కేవీ మహదేవన్ అందించిన సంగీతం చిత్ర విజయానికి ప్రధానాంశాలు. అనేక అవార్డులను దక్కించుకుని, తెలుగు సినిమాకు గౌరవాన్ని తీసుకొచ్చిన కల్ట్ క్లాసిక్ ఇది.
వివరాలు
సిరివెన్నెల (1986)
విశ్వనాథ్ కెరీర్‌లో మరో మైలురాయి చిత్రంగా నిలిచిన "సిరివెన్నెల" చిత్రం. ఇందులో ఒక బ్లైండ్ ఫ్లూటిస్ట్, ఒక టూరిజం గైడ్, ఒక మూగ పెయింటర్ మధ్య ఉన్న భావోద్వేగాల్ని హృదయాలను తాకేలా అద్భుతంగా చిత్రీకరించారు.
సుహాసిని, సర్వదమన్ బెనర్జీ, మూన్ మూన్ సేన్ నటన ప్రేక్షకులను ఆకట్టుకున్నాయి.
కేవీ మహదేవన్ సంగీతం, సీతారామశాస్త్రి రచించిన సాహిత్యం ఈ చిత్రాన్ని అసాధారణ స్థాయికి తీసుకెళ్లాయి.
సాహిత్యం అందించిన సీతారామ శాస్త్రి సినిమా పేరునే తన ఇంటి పేరుగా మార్చుకున్నారు. ఈ చిత్రంలోని పాటలు ఎప్పటికీ ఎవర్ గ్రీన్.
వివరాలు
శృతిలయలు (1987)
కె. విశ్వనాథ్ దర్శకత్వంలో వచ్చిన ఈ చిత్రం ఓ తండ్రి తన కుమారుడిని కోల్పోయిన తరువాత, సంగీత పాఠశాల స్థాపించాలనే కలను నెరవేర్చే విధంగా ముగ్గురు అబ్బాయిలను దత్తత తీసుకునే కథతో సాగుతుంది.
రాజశేఖర్, సుమలత, కైకాల సత్యనారాయణ ముఖ్య పాత్రలు పోషించారు.
ఎనిమిది నంది అవార్డులతో పాటు ఉత్తమ దర్శకుడిగా ఫిల్మ్‌ఫేర్ గెలిచిన విశేషం ఈ సినిమాకు ఉంది.
వివరాలు
అభినందన (1988)
ఇళయరాజా సంగీతం అందించిన ఈ మ్యూజికల్ రొమాంటిక్ డ్రామాలో కార్తీక్, శోభన ప్రేమజంటగా నటించారు.
నృత్య కళను ప్రేమించే యువతి, సంగీతంతో జీవించే యువకుడి మధ్య ప్రేమ కథ ఇందులో ఆవిష్కృతమవుతుంది.
ఇందులోని పాటలు ఎన్నో కోణాల్లో శ్రోతల మనసులను ఆకట్టుకున్నాయి. తమిళంలో 'కాదల్ గీతం'గా డబ్ అయ్యింది, కన్నడంలో 'అభినందన్' పేరుతో రీమేక్ కూడా అయింది.
వివరాలు
రుద్రవీణ (1988)
చిరంజీవి, శోభన జంటగా నటించిన ఈ చిత్రానికి కె. బాలచందర్ దర్శకత్వం వహించారు.
ఒక శాస్త్రీయ సంగీత విద్వాంసుని కుమారుడు తన గానం ద్వారా సమాజాన్ని మార్చాలనే సంకల్పంతో ప్రయాణం ప్రారంభించటం ఇందులో ప్రధానాంశం.
ఇళయరాజా సంగీతం, సిరివెన్నెల సాహిత్యం పాటలను అజరామరంగా మార్చాయి. ఇది వాణిజ్య పరంగా పెద్ద విజయం సాధించకపోయినా, చిరంజీవి నటుడిగా కొత్తగా నిలిచేలా చేసింది.
వివరాలు
ప్రేమ (1989)
విక్టరీ వెంకటేష్, రేవతి జంటగా నటించిన ఈ చిత్రాన్ని డి. రామానాయుడు నిర్మించారు.
ఓ యువకుడి సంగీతప్రయాణం, అతని ప్రేమలో ఎదురయ్యే భావోద్వేగాలకు ఇది నిదర్శనం.
ఇళయరాజా సంగీతంతో 'ప్రియతమా నా హృదయమా', 'ఈనాడే ఏదో అయ్యింది' వంటి పాటలు ఆద్యంతం ఆకట్టుకున్నాయి.
స్వాతి కిరణం (1992)
మలయాళ నటుడు మమ్ముట్టి, బాలనటుడు మంజునాథ్, రాధిక నటించిన ఈ చిత్రం ఓ బాల గాయని ప్రతిభను చూసి అసూయపడే సంగీత గురువు కథను చూపుతుంది. భారతీయ నైజాన్ని ప్రతిబింబిస్తూ, గురు-శిష్య సంబంధం ఆధారంగా సాగిన ఈ చిత్రానికి కేవీ మహదేవన్ అద్భుతమైన సంగీతాన్ని అందించారు.
వివరాలు
సరిగమలు (1993)
మలయాళ చిత్రం 'సర్గం'కు రీమేక్ అయిన 'సరిగమలు'లో వినీత్, రంభ నటించారు. సంగీతం ఔషధంగా పనిచేస్తుందని చెప్పే భావన ఈ చిత్రానికి మూలం. బొంబాయి రవి సంగీతం, మనోజ్ కె. జయన్, జెవి సోమయాజులు నటన సినిమాకు ప్రత్యేక ఆకర్షణగా నిలిచాయి.
అన్నమయ్య (1997)
అక్కినేని నాగార్జున ప్రధాన పాత్రలో నటించిన ఈ సినిమా 15వ శతాబ్దానికి చెందిన కీర్తిశేషుడైన అన్నమాచార్య జీవితాన్ని ఆధారంగా తీసుకుంది. కె. రాఘవేంద్రరావు దర్శకత్వంలో రూపొందిన ఈ చిత్రంలో మోహన్ బాబు, సుమన్, భానుప్రియ తదితరులు కీలక పాత్రలు పోషించారు. ఎం.ఎం. కీరవాణి సంగీతం ఈ చిత్రానికి శాశ్వత జ్ఞాపకంగా నిలిచింది.
వివరాలు
స్వరాభిషేకం (2004)
కె. విశ్వనాథ్ దర్శకత్వంలో రూపొందిన ఈ చిత్రం అన్నదమ్ములైన సంగీత విద్వాంసుల మధ్య చోటుచేసుకునే సంఘర్షణను చూపిస్తుంది. శ్రీకాంత్, శివాజీ, ఊర్వశి, లయ ప్రధాన పాత్రల్లో నటించారు. జాతీయస్థాయిలో ఉత్తమ తెలుగు చిత్రంగా అవార్డు గెలుచుకుంది. సంగీత దర్శకుడిగా విద్యాసాగర్ కు జాతీయ అవార్డు వచ్చింది.
ఇలా సంగీతం కేంద్రబిందువుగా రూపొందిన ఎన్నో తెలుగు చిత్రాలు ప్రేక్షకుల హృదయాల్లో స్థిరమైన స్థానాన్ని సంపాదించాయి.
ఈ చిత్రాలు సంగీత శక్తిని కొత్త కోణంలో చూపించడమే కాదు, ప్రేక్షకుల మనసులను మార్మోగించేలా చేశాయి.
ప్రపంచ సంగీత దినోత్సవం సందర్భంగా ఈ సినిమాలను మరోసారి గుర్తు చేసుకోవడం మనకెంతో ప్రేరణనిస్తుంది.