Gujarat: గుజరాత్‌లో అరుదైన ఘటన.. ఒకే చెట్టుకు 12 రకాల మామిడి పండ్లు
ఈ వార్తాకథనం ఏంటి
సాధారణంగా ఒక మామిడి చెట్టు ఒక్కటి లేదా రెండే రకాల మామిడి పండ్లను అందిస్తుంది.
అయితే గుజరాత్ రాష్ట్రంలోని అమ్రేలీ జిల్లాలోని దిట్ల అనే గ్రామంలో ఉన్న ఓ మామిడి చెట్టు మాత్రం విచిత్రంగా 12 వేర్వేరు రకాల మామిడి పండ్లను కాస్తోంది.
ఈ చెట్టుపై కాసే పండ్లన్నీ రంగు,రుచి,వాసన,పరిమాణం,బరువుల పరంగా పూర్తిగా భిన్నంగా ఉంటున్నాయి.
50 గ్రాముల నుంచి 2 కిలోల బరువుతో ఉండే మామిడిపండ్లను ఈ చెట్టు ఇస్తోంది.
ఈ విశేషమైన చెట్టు ఉకాభాయ్ అనే రైతు యాజమాన్యంలో ఉన్న మామిడి తోటలో ఉంది.
ఏటా అన్ని కాలాలలోనూ డజను రకాల మామిడి పండ్లను అందించగలగడం ఈ చెట్టు ప్రత్యేకతగా నిలుస్తోంది.
వివరాలు
అంటుకట్టే విధానం ఇలా ఉంటుంది...
ఉకాభాయ్ చాల రోజుల నుంచీ మామిడి సాగులోనే నిమగ్నమై ఉన్నారు. అంటుకట్టే పద్ధతి ద్వారా మేలురకం మామిడి వంగడాల తయారీకి ఆయన నిత్యం ప్రయోగాలు చేస్తుంటారు.
అలా ఆయన చేసిన ప్రయోగాల ఫలితంగానే ఇప్పుడు ఈ 12 రకాల మామిడిపండ్లను ఒకే చెట్టు పైన పొందగలుగుతున్నారు.
ముందుగా మంచి లక్షణాలు కలిగిన ఒక మామిడి మొక్కను ఎంపిక చేసి, దాని వేర్ల భాగాన్ని తొలగిస్తారు.
తదుపరి మరో నాణ్యమైన మామిడి మొక్కను తీసుకొని, దాని కాండం ఎగువభాగాన్ని సగానికి పైగా కత్తిరించి తీసివేస్తారు.
ఈ రెండవ మొక్కకు వేర్లు ఉండడం వల్ల దానినే నేలలో నాటాలి. ఆ తరువాత, ఈ మొక్క కాండంపై మునుపటి మొక్క కాండాన్ని అతికించి బలంగా కట్టాలి.
వివరాలు
మామిడి వంగడాల అభివృద్ధికి ప్రయోగాలను కొనసాగిస్తా: ఉకాభాయ్
ఇలా చేయడం వల్ల ఒక్క మామిడి చెట్టుపైనే పలు రకాల వంగడాలు పండే అవకాశం ఉంటుంది.
ఈ విధంగా తన తోటలో 12 రకాల పండ్లను కాస్తున్న చెట్టును చూసి ఉకాభాయ్ ఎంతో ఆనందపడుతున్నారు.
మామిడి వంగడాల అభివృద్ధికి తన ప్రయోగాలను ఇలాగే కొనసాగిస్తానని ఆయన 'ప్రముఖ మీడియా'తో చెప్పారు.
ఇలాంటి చెట్లు విస్తృతంగా రైతులకు అందుబాటులోకి వస్తే, అది వ్యవసాయ రంగానికి ఎంతో లాభదాయకంగా మారుతుందని ఆయన అభిప్రాయపడ్డారు.