Manipur: మణిపూర్లో బాంబు దాడి.. ఇద్దరు చిన్నారుల మృతి.. 5 రోజుల బంద్తో స్థంభించిన జీవనం
ఈ వార్తాకథనం ఏంటి
మణిపూర్లో బాంబు దాడిలో ఇద్దరు చిన్నారులు మరణించిన ఘటనపై ఆగ్రహంతో రాష్ట్రంలో ఐదు రోజుల సంపూర్ణ బంద్ కొనసాగుతోంది. ఈ బంద్ కారణంగా లోయ ప్రాంతాలన్నింటిలో సాధారణ జీవనం పూర్తిగా స్థంభించింది. ఈ నెల 19వ తేదీ ఆదివారం ప్రారంభమైన ఈ బంద్ను 'మీరా పైబీస్' (మహిళా ఉద్యమకారులు), పలు పౌర సమాజ సంస్థలు, అలాగే ఈ ఘటనకు నిరసనగా ఏర్పడిన ప్రజా సంఘాలు కలిసి ముందుకు తీసుకెళ్తున్నాయి.
వివరాలు
కొనసాగుతున్న అత్యవసర సేవలు
ఈ బంద్కు కారణమైన ఘటన ఏప్రిల్ 7న బిష్ణుపూర్ జిల్లాలో జరిగింది. బాంబు పేలుడులో ఐదేళ్ల బాలుడు, ఐదు నెలల పసికందు మృతి చెందడం రాష్ట్రవ్యాప్తంగా తీవ్ర ఆగ్రహాన్ని రేపింది. ఈ ఘటనకు బాధ్యులైన వారిని వెంటనే అరెస్ట్ చేసి కఠిన చర్యలు తీసుకోవాలని నిరసనకారులు డిమాండ్ చేస్తున్నారు. అదేవిధంగా కొండ ప్రాంతాల్లో కార్యకలాపాలు నిర్వహిస్తున్నట్లు ఆరోపణలు ఎదుర్కొంటున్న కుకీ మిలిటెంట్లపై కూడా చర్యలు తీసుకోవాలని కోరుతున్నారు. బంద్ మొదటి రోజున మార్కెట్లు, విద్యాసంస్థలు, ప్రభుత్వ కార్యాలయాలు, రవాణా సేవలు ఎక్కువగా మూతపడ్డాయి. కొన్ని ప్రాంతాల్లో మాత్రం అత్యవసర సేవలు మాత్రమే కొనసాగాయి.
వివరాలు
టియర్ గ్యాస్ ప్రయోగించిన పోలీసులు..
ఇక నిరసనలు హింసాత్మకంగా మారిన ఘటనలు కూడా చోటుచేసుకున్నాయి. ఆదివారం సాయంత్రం లోయ జిల్లాల వ్యాప్తంగా వేలాది మంది రోడ్లపైకి వచ్చి ఆందోళనలు చేపట్టారు. ఇంఫాల్ ఈస్ట్, ఇంఫాల్ వెస్ట్ జిల్లాల్లో రాత్రి ర్యాలీలు నిర్వహించారు. కొన్ని ప్రాంతాల్లో నిరసనకారులు, భద్రతా సిబ్బంది మధ్య ఘర్షణలు జరిగాయి. పరిస్థితిని అదుపులోకి తెచ్చేందుకు పోలీసులు పలుచోట్ల టియర్ గ్యాస్ వినియోగించారు. ఇదిలా ఉండగా, నిరసనల్లో కొన్ని అసామాజిక శక్తులు చొరబడుతున్నాయని మణిపూర్ పోలీసులు హెచ్చరించారు. మీరా పైబీస్ ఆధ్వర్యంలో జరుగుతున్న ర్యాలీలలో కొంతమంది దుండగులు నిరసనకారుల వేషంలో హింసాత్మక చర్యలకు పాల్పడుతున్నారని పోలీసులు తెలిపారు. గత కొన్ని రోజులుగా ఇంఫాల్ ప్రాంతాల్లో జరిగే ర్యాలీల్లో ఈ తరహా ఘటనలు పెరుగుతున్నాయని సోషల్ మీడియాలో వెల్లడించారు.
వివరాలు
రాళ్లు విసిరినట్లు పోలీసులు ఆరోపణ..
పోలీసుల సమాచారం ప్రకారం.. ఈ దుండగులు పెట్రోల్ బాంబులు, ఇనుప గుళికలతో కూడిన క్యాటపల్ట్లు ఉపయోగించడం, రాళ్లు విసరడం వంటి చర్యలకు దిగుతున్నారు. అంతేకాకుండా కొంతమంది నిరసనకారులు మద్యం లేదా ఇతర మత్తు పదార్థాల ప్రభావంలో ఉన్నట్లు కూడా గుర్తించామని తెలిపారు. ముందుగానే కొందరు ఈ ర్యాలీల కోసం పెట్రోల్ బాంబులు, క్యాటపల్ట్లు, ఇనుప గుళికలను సరఫరా చేస్తున్నారని సమాచారం ఉందని పోలీసులు చెప్పారు.
వివరాలు
వారికి పోలీసుల హెచ్చరిక..
అయితే ఈ పరిస్థితుల్లో కూడా భద్రతా సిబ్బంది అత్యంత సహనంతో వ్యవహరిస్తూ ప్రజలకు ఎలాంటి నష్టం కలగకుండా జాగ్రత్తలు తీసుకుంటున్నట్లు పోలీసులు వెల్లడించారు. శాంతి భద్రతలను కాపాడేందుకు ప్రజలు సహకరించాలని, హింసాత్మక చర్యలు, ప్రభుత్వ ఆస్తుల ధ్వంసం వంటి చట్టవిరుద్ధ పనులకు దూరంగా ఉండాలని విజ్ఞప్తి చేశారు. హింసకు పాల్పడిన వారిపై, ప్రేరేపించిన వారిపై కఠిన చట్టపరమైన చర్యలు తీసుకుంటామని పోలీసులు హెచ్చరించారు.