హైదరాబాద్‌లో విషాదఘటన.. పార్కింగ్ ఏరియాలో చిన్నారిని చిదిమేసిన కారు
ఈ వార్తాకథనం ఏంటి
హైదరాబాద్‌లో భవన నిర్మాణ కార్మికురాలిగా పనిచేస్తోన్న ఓ తల్లి తన మూడేళ్ల పాపను వెంట పట్టుకొని పనికి వెళ్లింది. చాలా సేపు ఆడుకున్న ఆ పాప అలసిపోయింది.
దీంతో పక్కనే ఉన్న అపార్టుమెంట్ పార్కింగ్ స్థలంలో పాపను తల్లి నిద్రపుచ్చింది. ఆ తర్వాత ఆమె పనుల్లో నిమగ్నమైంది.
అయితే అ అపార్టుమెంట్ కు చెందిన ఓ వ్యక్తి బయట నుంచి కారులో వచ్చాడు. పార్కింగ్ స్థలంలో పాప పడుకున్న విషయం తెలియక నేరుగా పాప పైనుంచి కారును పోనిచ్చాడు. దీంతో కారు పాప తలపైకి ఎక్కింది. తీవ్ర గాయాలైన పాప అక్కడిక్కడే మృతి చెందింది.
కర్ణాటక నుంచి రాజు, కవిత బతుకుదెరువు కోసం భాగ్యనగరానికి వచ్చి.. శ్రీ కృష్ణ నగర్లో నివాసం ఉంటున్నారు.
Details
గుండె పగిలేలా ఏడ్చిన తల్లి
స్థానికులు పాపను వనస్థలిపురం ఏరియా ఆస్ప్రతికి తరలించగా అప్పటికే మృతి చెందినట్లు వైద్యులు ధ్రువీకరించారు.
పాప మృతి చెందిన విషయాన్ని తెలుసుకున్న తల్లి గుండె పగిలేలా రోధించింది. కాసేపు పడుకోమని నిద్రపుచ్చితే శాశ్వత నిద్రలోకి వెళ్లిపోయావా అంటూ ఆ తల్లి రోధనలు మిన్నంటాయి.
ఈ ఘటన చూసిన స్థానికులు చలించిపోయారు. ఈ ఘటనపై హయత్ నగర్ పోలీసులు కేసు నమోదు చేసుకొని దర్యాప్తు చేస్తున్నారు.
సీసీ టీవీ కెమెరాలో నమోదైన ప్రమాద దృశ్యాలను పోలీసులు పరిశీలించారు. వాటి ఆధారంగా దర్యాప్తు చేస్తున్నారు. తమకు న్యాయం చేయాలని ఆ పాప తల్లిదండ్రులు కోరుతున్నారు.