Telangana: నారాయణపేట జిల్లా ప్రభుత్వ ఉన్నత పాఠశాలలో మరోసారి ఫుడ్‌పాయిజన్‌.. 21 మందికి అస్వస్థత
మాగనూరు మండలం నారాయణపేట జిల్లా జడ్పీ ఉన్నత పాఠశాలలో మధ్యాహ్న భోజనం వల్ల మరోసారి విద్యార్థులు అస్వస్థతకు గురయ్యారు. ఈసారి 21 మంది విద్యార్థులు భోజనం అనంతరం అనారోగ్యానికి గురై మాగనూరు ప్రభుత్వ ఆసుపత్రిలో చికిత్స పొందుతున్నారు. గత వారంలో కూడా ఇదే పాఠశాలలో మధ్యాహ్న భోజనం కారణంగా 50 మంది విద్యార్థులు అనారోగ్యానికి గురైన విషయం తెలిసిందే. ఈ ఘటనలపై ముఖ్యమంత్రి రేవంత్ రెడ్డి తీవ్ర ఆగ్రహం వ్యక్తం చేశారు. సమస్యకు కారణాలను గమనించి బాధ్యులపై కఠిన చర్యలు తీసుకోవాలని కలెక్టర్‌ను ఆదేశించారు.
మధ్యాహ్న భోజన సరఫరా ఏజెన్సీ రద్దు
ఈ క్రమంలో పాఠశాల ప్రధానోపాధ్యాయుడు, ఎంఈవో మురళీధర్ రెడ్డి, మధ్యాహ్న భోజన నిర్వహణ ఇన్‌ఛార్జి హెచ్‌ఎం బాపురెడ్డిలను సస్పెండ్ చేస్తూ పాఠశాల విద్యా సంచాలకుడు ఈవీ నర్సింహారెడ్డి చర్యలు చేపట్టారు. మధ్యాహ్న భోజన సరఫరా ఏజెన్సీని కూడా రద్దు చేశారు. అయితే, ఈ పరిణామాల తర్వాత కూడా పరిస్థితి మెరుగుపడకపోవడం ఆందోళనకరంగా మారింది.
