Amaravati: 9 జిల్లాలు,44,962 చ.కి.మీ.ల్లో అమరావతి ఎకనమిక్ రీజియన్.. టెండర్లు పిలిచిన సీఆర్డీఏ
ఈ వార్తాకథనం ఏంటి
ఏపీలోని తొమ్మిది జిల్లాలను కలుపుతూ అమరావతి ఆర్థిక ప్రాంత అభివృద్ధికి సమగ్ర ప్రణాళిక సిద్ధం చేసేందుకు రాష్ట్ర రాజధాని ప్రాంత అభివృద్ధి సంస్థ టెండర్లు ఆహ్వానించింది. పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు, పల్నాడు, బాపట్ల, ప్రకాశం, మార్కాపురం జిల్లాల పరిధిలో 44,962 చదరపు కిలోమీటర్ల విస్తీర్ణానికి ఆర్థిక ప్రాంత ప్రణాళిక రూపొందించనున్నారు. రాష్ట్ర లక్ష్యాలు,కేంద్ర మార్గదర్శకాల ప్రకారం ఈ ప్రణాళికను రూపొందించనున్నట్లు అధికారులు తెలిపారు. ఈ ప్రణాళికలో భూవినియోగం,ఆర్థికాభివృద్ధి,పెట్టుబడుల ఆకర్షణ,మెరుగైన జీవన విధానం,సుస్థిర అభివృద్ధి ముఖ్య అంశాలుగా పరిగణించనున్నారు. ఎంపికైన సంస్థ మొత్తం ప్రాంతాన్ని ఒక సమగ్ర యూనిట్గా తీసుకుని పట్టణాలు,పరిసర ప్రాంతాల అభివృద్ధిని సమన్వయంతో ముందుకు తీసుకెళ్లే విధంగా ప్రణాళిక సిద్ధం చేయాలి.
వివరాలు
ఆసియా అభివృద్ధి బ్యాంకు నుంచి ఆర్థిక, సాంకేతిక సహకారం
ఆసియా అభివృద్ధి బ్యాంకు నుంచి ఆర్థిక, సాంకేతిక సహకారం తీసుకుంటుండగా, సింగపూర్ ప్రభుత్వంతో కూడా సమన్వయం కొనసాగించాల్సి ఉంటుంది. ఈ ప్రణాళికలో తక్షణం నుంచి దీర్ఘకాలం వరకు అమలు చేయాల్సిన లక్ష్యాలను స్పష్టంగా నిర్ణయించాలి. 0 నుంచి 12 నెలలు, 1 నుంచి 3 సంవత్సరాలు, 3 నుంచి 7 సంవత్సరాలు, 7 నుంచి 22 సంవత్సరాల దశల్లో కార్యాచరణ ఉండాలి. 2030, 2035, 2047 సంవత్సరాలకు చేరుకోవాల్సిన లక్ష్యాలను ప్రత్యేకంగా పేర్కొనాలి. ప్రణాళిక సిద్ధమైన తర్వాత ప్రతి శాఖకు అనుగుణంగా కార్యాచరణ మార్గాలు రూపొందించి బాధ్యతలు, గడువులు నిర్దేశించాలి.
వివరాలు
ఆధునిక డిజిటల్ పర్యవేక్షణ వ్యవస్థ ఏర్పాటు
ప్రపంచంలోని ప్రముఖ ఆర్థిక ప్రాంతాలకు సమానంగా ఈ ప్రణాళిక ఉండేలా రూపకల్పన చేయనున్నారు. అలాగే దేశంలోని ప్రధాన మహానగర ప్రాంతాల అభివృద్ధిని దృష్టిలో ఉంచుకుని కార్యాచరణ రూపొందించాలి. వివిధ ఆర్థిక సంస్థల నుంచి నిధులు సమీకరించేలా వందకు పైగా ప్రాజెక్టులు, ఎనిమిది నుంచి పన్నెండు ప్రధాన ప్రాజెక్టులు సిద్ధం చేయాలి. ప్రాజెక్టుల పర్యవేక్షణ, సంస్కరణల అమలుకు ఆధునిక డిజిటల్ పర్యవేక్షణ వ్యవస్థను ఏర్పాటు చేయాలి. తొమ్మిది నెలల్లో ప్రణాళిక సిద్ధం చేయగా, అనంతరం ఆరు నెలలపాటు అమలుకు సహకరించే ప్రత్యేక బృందాన్ని నియమించనున్నారు. విజయవాడ, గుంటూరు నగరాలను పారిశ్రామిక జంట నగరాలుగా అభివృద్ధి చేస్తారు.
వివరాలు
ప్రపంచ స్థాయి పట్టణ సేవలు
అమరావతిని ప్రధాన కేంద్రంగా తీర్చిదిద్దుతూ, ఏలూరు, బాపట్లలను వ్యవసాయ ఆధారిత పరిశ్రమల కేంద్రాలుగా, ఒంగోలు, మార్కాపురాన్ని ఖనిజ, తయారీ రంగ మార్గంగా అభివృద్ధి చేయాలని లక్ష్యంగా పెట్టుకున్నారు. నౌకాశ్రయాలకు అనుసంధానంగా తయారీ యూనిట్లు, విలువ ఆధారిత వ్యవసాయ ఉత్పత్తుల ఎగుమతులు, డ్రోన్లు, రక్షణ, విమాన రంగం, విద్యుత్ ఉపకరణాలు, ఔషధ తయారీ కేంద్రాలు, అధునాతన సేవల కేంద్రాలుగా ఈ ప్రాంతాన్ని తీర్చిదిద్దాలని లక్ష్యంగా పెట్టుకున్నారు. పర్యావరణానికి అనుకూల విధానాలు, బలమైన మౌలిక వసతులు, ప్రపంచ స్థాయి పట్టణ సేవలు, నైపుణ్యంతో కూడిన మానవ వనరులతో ఈ ప్రాంతాన్ని నివాసయోగ్యంగా, సుస్థిరంగా అభివృద్ధి చేయాలని భావిస్తున్నారు.
వివరాలు
250 బిలియన్ డాలర్ల ఆర్థిక వ్యవస్థ లక్ష్యం
2047 నాటికి ఈ ప్రాంతాన్ని 250 బిలియన్ డాలర్ల స్థాయి ఆర్థిక వ్యవస్థగా అభివృద్ధి చేయాలని లక్ష్యంగా పెట్టుకున్నారు. దీనికోసం 10 నుంచి 12 ప్రధాన అభివృద్ధి దారులను, ప్రేరణాత్మక ప్రాజెక్టులను రూపొందించి పెట్టుబడులను ఆకర్షించనున్నారు.