AMCA Fighter Aircraft Project: పుట్టపర్తిలో రూ.15,803 కోట్ల యుద్ధ విమాన ప్రాజెక్టు
ఈ వార్తాకథనం ఏంటి
శ్రీ సత్యసాయి జిల్లా పుట్టపర్తిలో భారీ స్థాయిలో ఏర్పాటు కానున్న ఆధునిక ఏఎంసీఏ యుద్ధ విమానాల తయారీ ప్రాజెక్టులో ప్రైవేటు రంగ సంస్థ భాగస్వామ్యం దాదాపు ఖరారయ్యే దశకు చేరింది. రూ.15,803 కోట్ల వ్యయంతో చేపట్టనున్న ఈ ప్రాజెక్టులో టాటా,ఎల్అండ్టీ,భారత్ ఫోర్జ్ సంస్థల్లో ఏదో ఒకటి భాగస్వామిగా ఎంపిక కానుంది. కేంద్ర ప్రభుత్వం తుది పరిశీలనలో ఉన్న ఈ సంస్థ సుమారు రూ.9,000 కోట్ల పెట్టుబడి పెట్టనున్నట్లు సమాచారం. డీఆర్డీవోకు చెందిన ఏరోనాటికల్ డెవలప్మెంట్ ఏజెన్సీ ఈ ప్రాజెక్టును అభివృద్ధి చేస్తోంది. ప్రారంభం నుంచే ప్రైవేటు భాగస్వామ్యంతో ఈ ప్రాజెక్టును ముందుకు తీసుకెళ్లాలని కేంద్ర ప్రభుత్వం నిర్ణయించింది. ఇందులో భాగంగా భాగస్వామ్య సంస్థ ఎంపిక బాధ్యతను ఏడీఏకు అప్పగించింది.
వివరాలు
పుట్టపర్తిలోనే ఫ్లైట్ పరీక్షల కేంద్రం
వివిధ సంస్థల నుంచి వచ్చిన ప్రతిపాదనలను పరిశీలించిన ఏడీఏ మూడు కంపెనీలను తుది జాబితాలో చేర్చింది. వీటిలో ఒక సంస్థను కేంద్రం ఎంపిక చేసి ప్రాజెక్టులో భాగస్వామ్య హక్కులు కల్పించనుంది. సెప్టెంబరు నాటికి దీనిపై తుది నిర్ణయం వెలువడే అవకాశం ఉంది. ఈ ప్రాజెక్టులో కేంద్ర ప్రభుత్వం కూడా రూ.6,000 కోట్ల పెట్టుబడి పెట్టనుంది. ఏఎంసీఏ ప్రాజెక్టులో భాగంగా యుద్ధ విమానాల సమీకరణ కేంద్రంతో పాటు అత్యాధునిక విమాన పరీక్షల కేంద్రాన్ని కూడా ఏర్పాటు చేయనున్నారు. ఇందుకోసం ప్రస్తుతం పుట్టపర్తిలో ఉన్న విమానాశ్రయాన్ని వినియోగించే అవకాశాలను పరిశీలిస్తున్నారు. ప్రాజెక్టు కోసం రాష్ట్ర ప్రభుత్వం ఇప్పటికే 650 ఎకరాల భూమిని కేటాయించింది.
వివరాలు
2035 నాటికి పూర్తిస్థాయిలో తయారీ దశకు తీసుకురావాలని ప్రాజెక్టు లక్ష్యం
ఈ ప్రాజెక్టులో తయారయ్యే తొలి యుద్ధ విమానం పుట్టపర్తి నుంచే గగనతలంలోకి ఎగరనుంది. తొలి నమూనాను 2029 నాటికి సిద్ధం చేయాలని లక్ష్యంగా పెట్టుకున్నారు. మొత్తం ఐదు నమూనా విమానాలను అభివృద్ధి చేయాలనే ప్రణాళిక రూపొందిస్తున్నారు. సుమారు 25 టన్నుల బరువుతో ఉండే ఈ యుద్ధ విమానాన్ని 2035 నాటికి పూర్తిస్థాయిలో తయారీ దశకు తీసుకురావాలని ప్రాజెక్టు లక్ష్యంగా నిర్ణయించారు.