AP Govt: ఏపీలో మరో పథకం అమలుకు ప్రభుత్వం సిద్ధం.. .'తల్లికి వందనం' పథకంపై కీలక ప్రకటన
ఈ వార్తాకథనం ఏంటి
ఆంధ్రప్రదేశ్‌లో ఆర్థిక పరిస్థితులు క్రమంగా మెరుగుపడుతున్న సమయంలో, ఎన్నికల హామీలను అమలు చేయడానికి కూటమి ప్రభుత్వం సిద్ధమవుతోంది.
ఎన్నికల ప్రచారంలో ప్రకటించినట్లుగా, డీఎస్సీ ఉద్యోగాలకు నోటిఫికేషన్ విడుదల చేశారు.
సామాజిక పింఛన్లు కూడా 1000 రూపాయలు పెంచి అందిస్తోంది. ఇప్పుడు మరో పథకాన్ని ప్రజలకు అందించడానికి రెడీ అవుతోంది.
సూపర్ సిక్స్ పేరుతో కూటమి ప్రభుత్వం అధికారంలోకి వచ్చింది. ఇందులో కీలకమైన హామీ "తల్లికి వందనం". వైసీపీ ప్రభుత్వంలో ఈ పథకం "అమ్మ ఒడి" పేరుతో అమలులో ఉంది.
ఇప్పుడు కూటమి ప్రభుత్వం దీనికి పేరు మార్చి "తల్లికి వందనం" పేరుతో అమలు చేయబోతున్నది.
ఈ పథకం కింద చదువుకునే ప్రతి విద్యార్థి తల్లి ఖాతాలో ఏడాదికి 15,000 రూపాయలు జమ చేయనున్నారు.
వివరాలు
సూపర్ సిక్స్ అమలుపై ప్రభుత్వం ఫోకస్
విద్యాసంవత్సరం జూన్‌లో ప్రారంభమైంది. ప్రభుత్వం కూడా అదే నెలలో కొలువు దీరింది.
అన్ని సర్దుకొని పథకాలు అమలు చేయడానికి ఇంత టైం పట్టింది. ఆర్థికంగా వ్యవస్థలు అస్తవ్యస్తంగా ఉన్నందున వాటిని సరి చేసేందుకు సమయం తీసుకున్నామని ప్రభుత్వం పేర్కొంది.
అందువల్ల పూర్తి స్థాయి బడ్జెట్ కూడా ప్రవేశ పెట్టలేదని సమాచారం. కేంద్ర సాయంతో వాటన్నింటి నుంచి గట్టెక్కేందుకు శతవిధాల ప్రయత్నిస్తున్నట్లు వెల్లడించింది.
ఇప్పుడు పరిస్థితులు కాస్త కుదుట పడుతున్నందున, సూపర్ సిక్స్ అమలుపై ప్రభుత్వం ఫోకస్ చేసినట్టు సమాచారం.
వివరాలు
ప్రతి విద్యార్థి తల్లికి 15,000 రూపాయలు
సూపర్ సిక్స్ అమలులో "తల్లికి వందనం" పథకంతోనే ప్రారంభించాలని భావిస్తున్నారని తెలిసింది.
జనవరి 2025లో ఈ పథకం అమలు చేయాలని ప్రభుత్వం నిర్ణయించిందని సమాచారం. కాలేజీకి, స్కూల్‌కు వెళ్లే ప్రతి విద్యార్థి తల్లికి 15,000 రూపాయలు చొప్పున ఇవ్వబోతున్నారు.
ఇంట్లో ఎంత మంది విద్యార్థులు ఉన్నా,అంతమందికి ఇవ్వడానికి సిద్ధంగా ఉన్నారు.
దీనికి 12,000 కోట్లు ఖర్చు అవుతుందని ప్రభుత్వం అంచనాలు వేసింది. ప్రస్తుతం రాష్ట్రవ్యాప్తంగా దాదాపు 80 లక్షల మంది విద్యార్థులు వివిధ స్కూల్స్, కాలేజీల్లో చదువుతున్నారు.
వారందరికీ ఈ పథకం అమలు చేస్తారా లేదా అందులో కోత విధిస్తారా అనేది తెలియాల్సి ఉంది. ప్రస్తుతం ఉన్న వారందరికీ అమలు చేస్తే 12,000 కోట్లు కావాల్సి ఉంటుంది.
వివరాలు
మూడు వేలు వరకు కోత
వైసీపీ ప్రభుత్వం ఈ పథకాన్ని ప్రవేశ పెట్టినప్పుడు, ఒక విద్యార్థికి మాత్రమే 15,000 రూపాయలు ఇస్తామని చెప్పారు.
అందులో మూడు వేలు వరకు కోత విధించారు. స్కూల్ నిర్వహణకు ఖర్చు చేయడం కోసం వివిధ కారణాలు చెప్పారు. అంతకముందు సంవత్సరం వైసీపీ ప్రభుత్వం ఈ పథకం కింద రూ.6394 కోట్లు ఖర్చు పెట్టింది.
వివరాలు
సూపర్ సిక్స్ ఎప్పుడు అమలవుతుంది: వైసీపీ
కూటమి ప్రభుత్వం అధికారంలోకి వచ్చిన తరువాత, సూపర్ సిక్స్ ఎప్పుడు అమలవుతుందని వైసీపీ ప్రశ్నిస్తోంది.
ఎన్నికల్లో ఇచ్చిన హామీల అమలు విషయంలో ప్రభుత్వం విఫలమైందని ఆరోపిస్తోంది. విద్యా సంవత్సరం ప్రారంభమై ఉన్నప్పటికీ, "తల్లికి వందనం" ఎందుకు ఇప్పటి వరకు అందించలేదని ప్రశ్నిస్తున్నారు.
టీడీపీ కూడా దీనికి సమాధానం ఇచ్చింది. 2019 మేలో అధికారం చేపట్టిన వైఎస్ జగన్మోహన్ రెడ్డి 2020 జనవరిలో అమ్మ ఒడి పథకాన్ని ఆపేశారని గుర్తు చేశారు.
డేటా, ఆర్థిక వనరులు సమకూర్చుకోవడానికి సమయం తీసుకున్నామని ప్రభుత్వ వర్గాలు చెబుతున్నారు.